1925​​—Selau Tausaga ko ˋTeka

FAKAMOEMOEGA KO SE TAUNU

Ne fakamoeˋmoe a Tino Aˋkoga ki te Tusi Tapu me ka fai a te lalolagi mo fai se palataiso i te 1925. Kaia? Ne fai mai te taina ko Albert Schroeder, telā ne tavini fakamuli pelā me se tino o te Potukau Pule, penei: “Ne taliˋtonu matou me i te ˋtoega o soko fakaekegina o Keliso ka olo aka ki te lagi ke fai pelā me ne vaega o te Malo, kae ko tāgata fakamaoni i aso mua e pelā mo Apelaamo, Tavita mo nisi tino, ka toe fakaˋtu ke fai pelā me ne pelenise kolā ka takitaki ne latou a te pulega i te lalolagi mai lalo i te malo o te Atua.” I te taimi ne seki taunu ei te mea tenā, ne seki fiaˋfia malosi a nisi taina mo tuagane.—Faata. 13:12.

Faitalia te lotou fanoaˋnoa, ne tumau a te tokoukega o Tino Aˋkoga ki te Tusi Tapu i te gaˋlue malosi o fai te galuega talai, kae ne kamata o lavea ne latou a te tāua o te lotou tiute ke fai pelā me ne Molimau a Ieova. Ke mafauˋfau ki te galuega ne fai ne latou ke fakasalalau atu te munatonu ki koga ˋmao e auala i te leo fakasalalau.

KO TOE FAITE NISI KOGA FAKASALALAU

Ona ko te fanofano ˋlei o te koga fakasalalau ko te WBBR i te tausaga mai mua, ne toe faite i ei ne Tino Aˋkoga ki te Tusi Tapu se suā koga fakasalalau tai malosi atu, i te taimi nei i tafa o Chicago, Illinois. A te igoa o te koga fakasalalau fou tenei ko te WORD. Ne fai mai a Ralph Leffler, se initinia i mea tau letio telā ne galue ke fakatu aka te koga fakasalalau tenei, penei: “I po i taimi o te ˋtau ˋmoko, ne mafai o lagona atu a te leo fakasalalau ko te WORD i koga ˋmao e uke.” E pelā mo se kāiga telā e ˋnofo i Pilot Station, Alaska, telā e nofo ki se 5,000 tupu kilomita te ˋmao, ne mafai o fakalogoˋlogo ki te fakasalalauga e tasi mai konā. I te otiga ne fakalogoˋlogo ki ei, ne tusi mai ne te kāiga se tusi ki tino gaˋlue i te koga fakasalalau o fakafetai ki a latou mō te polokalame faka-te-agaga gali kae fakamalosi loto ne fakatoka ne latou.

Ne fai mai ne The Watch Tower i a Tesema 1, 1925, a te pogai ne mafai o lagona ne tino e tokouke i koga ˋmao a te leo fakasalalau tenei: “Te WORD ko te ˋtoe koga fakasalalau malosi eiloa i Amelika telā e fakaaoga i ei te 5,000 watts. A tino mai te feitu ki saegala mo togala o Amelika ke oko foki ki Cuba mo toe koga ˋmao i te feitu ki mātū o Alaska, ne mafai o fakalogoˋlogo ki ei. A tino e tokouke kolā ne seki lagona eiloa ne latou a te munatonu, ne kamata o fiaˋfia i te taimi ne fakalogoˋlogo latou ki polokalame mai te leo fakasalalau tenei.”

I te taimi foki eiloa tenā, ne maˋnako a Tino Aˋkoga ki te Tusi Tapu ke fakasalalau atu a te tala ˋlei i Kanata mai te fakaaogaga o te leo fakasalalau i te letio. I te 1924, ne faite a te koga fakasalalau ko te CHUC i Saskatoon, Saskatchewan. A te koga tenei se tasi o koga fakasalalau fakalotu muamua eiloa i Kanata. I te 1925, ne manakogina se koga tai lasi atu mo fakatu a te koga fakasalalau tenei. Tenā ne fai ei ne te Watch Tower Society ke fakatu te leo fakasalalau tenei i te Regent Building, se koga fai koniseti mua i Saskatoon, telā ne ˋtogi ne latou kae fakafou mō te pogai eiloa tenei.

Fakafetai ki te leo fakasalalau tenei, e tokouke a tino kolā ne ˋnofo i fakai foˋliki kae ˋmao o Saskatchewan ne mafai o lagona ne latou te tala ˋlei mō te taimi muamua mai te leo fakasalalau. E pelā mo se fakai ˋmao e tasi, ne tusi mai se fafine e igoa ki a Mrs. Graham ke maua ne ana tusi faka-te-Tusi Tapu mai tua o tena fakalogologoga ki te leo fakasalalau tenā. Ne fai mai te taina ko George Naish penei, “A tena fakamolemole ke ‘Akoako matou!’ e fakaasi mai ei me manakogina fakavave ne ia se fesoasoani, tenā ne lafo atu ei ne matou a tusi katoa o te Studies in the Scriptures.” E seki leva kae ne kamata o folafola atu ne Mrs. Graham a te fekau o te Malo ki koga tai ˋmao atu.

NE TAULOTO NE MATOU SE MUNATONU TĀUA

Te lōmiga o The Watch Tower i a Mati 1, 1925, ne maua i ei se mataupu tāua e fakaulutala penei, “Birth of the Nation.” Kaia ne tāua malosi ei te mataupu tenei? Ko leva ne iloa ne Tino Aˋkoga ki te Tusi Tapu me e isi se fakapotopotoga a Satani, telā e aofia i ei a agaga maˋsei sē lavea ki mata i te lagi e pelā foki mo lotu, mea fakapisinisi mo malo fakapolitiki i te lalolagi. Kae e auala i te mataupu tenei, ne fesoasoani atu a “te tavini fakamaoni kae poto” ki te kautaina ke iloa ne latou me isi foki se fakapotopotoga a Ieova, telā e ˋkese ˋki mo te fakapotopotoga a Satani kae ˋteke malosi ki ei. (Mata. 24:45) I tafa i ei, ne fakamatala mai foki ne te tavini poto me ko oti ne fakatu aka te Malo o te Atua i te 1914 kae i te tausaga eiloa tenei, ona ko te ‘taua telā ne tupu i te lagi,’ ne ˋpei ifo ei a Satani mo ana temoni mai te lagi, kae ko ˋnofo tumau i te lalolagi.—Faka. 12:​7-9.

Ne faigata ki nisi tino ke talia ne latou a te mainaga fou tenei. Ona ko te mea tenei, ne fakamalosi mai te mataupu tenā penei: “Kafai e isi ne tino faiˋtau o te Watch Tower kolā e se lotomaˋlie ki mea kolā e fakaasi mai i konei, e fakamalosi atu ke kufaki kae taliˋtonu ki te Aliki i te taimi e tumau ei latou i te tavini atu mo te fakamaoni ki a ia.”

Ne fai mai ne Tom Eyre, telā se paenia mai Peletania a lagonaga o te tokoukega o Tino Aˋkoga ki te Tusi Tapu e uiga ki te mataupu tenā. “Ne fiaˋfia a taina ki te fakamatalaga tenei o te Fakaasiga 12. I te taimi ne iloa ei ne matou me ko oti ne fakatu aka a te Malo i te lagi, ne loto finafinau malosi matou ke folafola atu te tala ˋlei tenei ki nisi tino. Ne fakamalosi mai ki a matou ke momea aka te uke o omotou mea e fai i te galuega talai, kae ke lavea foki ne matou a mea ˋgali ka fai ne Ieova mō ana tino i aso mai mua.”

KE MOLIMAU ATU E UIGA KI A IEOVA

I aso nei, e masani ˋlei a Molimau a Ieova mo pati i te Isaia 43:10: “‘A koutou ko aku molimau,’ ko te folafolaga a Ieova, ‘Ao, ko taku tavini telā ne filifili ne au.’” Mai mua o te 1925, e faigata o isi ne fakamatalaga i ˋtou tusi e uiga ki te tusi faitau tenei. Kae ne ˋfuli te mea tenei. I te 1925, ne fakamatala mai i The Watch Tower a te mataupu e uiga ki te Isaia 43:10 mo te 12 i lōmiga e 11 o te mekesini tenā!

I te fakaotiga o Aokuso 1925, ne maopoopo a Tino Aˋkoga ki te Tusi Tapu ki se fono i Indianapolis, Indiana. E isi se fekau ne ˋlomi i te polokalame o te fono telā ne fai mai ei a Joseph F. Rutherford penei: “Ne oˋmai tatou ki te fono tenei ke maua . . . te malosi mai i te Aliki ke mafai o toe ˋfoki tatou o fai te galuega talai mo te loto finafinau malosi ke fai pelā me ne ana molimau.” Ne fakamalosi atu ki tino ne ˋkau ki te fono i aso e valu konā, ke molimau atu e uiga ki a Ieova i so se avanoaga e maua ne latou.

I te Aso Ono, Aokuso 29, ne fai te lāuga a te taina ko Rutherford telā e fakaulutala penei “A Call to Action.” Ne fakaˋmafa mai ne ia i tena lāuga a te tāua o te faiga o te galuega talai: “Ne fai atu a Ieova ki ana tino . . . : ‘Koutou ko aku molimau . . . me i a au ko te Atua.’ Kae ne fakatonu atu a ia i pati fakamalosi konei: ‘Fakatu aka se fakailoga mō te fenua.’ E seai ne nisi tino i te lalolagi e ˋtau o fakatu aka ne latou se fakailoga kae na ko [ana tino], ko latou kolā e maua ne latou te agaga o te Aliki, kolā e fai pelā me ko ana molimau.”—Isa. 43:12; 62:10.

I te otiga te lāuga a te taina ko Rutherford, ne faitau mai ne ia se fekau e fakaigoa ki te “Message of Hope,” kae ne lotomaˋlie a tino fakalogoˋlogo katoa ki te fekau tenei, me e fakaasi mai ei me i te Malo o te Atua ko te fakamoemoega tonu fua e tasi telā ka maua i ei ne tino a “fakamanuiaga o te filemu, te manuia, te ola ˋlei, te ola, te saolotoga mo te fiafia se-gata-mai.” Ne ˋfuli fakamuli ifo te fekau tenei ki ˋgana e uke kae ˋlomi ki tamā pepa. E nofo ki se 40 miliona ˋkopi ne tufatufa atu.

Ne seki ˋfuli ne Tino Aˋkoga ki te Tusi Tapu te lotou igoa ki Molimau a Ieova mō se fia tausaga loa ki tua ifo. Kae ne kamata o iloa ne latou a te tāua o te lotou tiute ke fai pelā me ko ana molimau.

TOE ĀSI ATU KI TINO FIAˋFIA

I te taimi ne gasolo aka ei te aofaki o Tino Aˋkoga ki te Tusi Tapu i te lalolagi kātoa, ne fakamalosi atu foki ki a latou ke toe ˋfoki o āsi ki tino kolā ne fakaasi mai te fiaˋfia ki te tala ˋlei. Mai tua o te galuega fakapito ki te tufaatuga o te tamā pepa ko te Message of Hope, ne fakatonu mai te Bulletina penei: “Fakatoka ke toe āsi atu ki fale kolā ne seki ai ne tusi ne tuku atu ne tino gaˋlue i ei, kae na ko ˋkopi o te tamā pepa ko te Message of Hope.”

Ne aofia i te lōmiga o te Bulletin i a Ianuali 1925, a te lipoti tenei mai se Tino Akoga ki te Tusi Tapu i Plano, Texas: “E ˋpoi matou me kafai e toe āsi atu ki koga kolā ne talai muamua i ei, e uke atu a ikuga ˋlei e maua ne matou i ei i lō koga ˋfou kolā ne talai matou i ei. E isi se fakai foliki i te motou koga talai, ne talai matou i ei fakalima taimi i te sefulu tausaga ko ˋteka. . . . Fakamuli nei, ne toe āsi atu te tuagane ko Hendrix mo toku mātua ki te koga tenā, kae ko uke atu lā tusi ne tufa i ei i lō aso mua.”

Kae ne tusi mai se paenia mai te fenua ko Panama, penei: “E tokouke a tino kolā ne seki talia ne latou te fekau i te taimi muamua, ne ˋfuli te lotou kilokiloga i taku fokiatuga o āsi ki a latou i te lua io me ko te tolu o taimi. A te ukega o aku mea ne fai i te tausaga nei, ko te ˋtoe foki atu o āsi ki a latou kolā ne talai ki ei i aso mua, kae uke ˋki eiloa a tala ˋgali kae fakafiaˋfia mo latou.”

KE OLIOLI KI ASO MAI MUA

I tena tusi i te fakaotiga o te 1925 ki paenia katoa, ne fai atu ne te taina ko Rutherford a te galuega talai telā ne fai ne latou i te tausaga tenā mo mea ka fai ne latou i te tausaga mai tua ifo. Ana muna: “I te tausaga ko teka, se tauliaga eiloa ke fakamafanafana atu ne koutou a tino e tokouke kolā e fanoaˋnoa. Ne fai ne te galuega tenei ke fiaˋfia koutou . . . I te tausaga mai mua nei, ka maua ne koutou a avanoaga e uke ke fai pelā me ne molimau ki te Atua mo tena malo, kae ke fakaasi atu me ko oi eiloa ana tino tapuaki. . . . Ke na ˋkau fakatasi eiloa tatou o usu atu a pese o vikiga ki te ˋtou Atua mo te ˋtou Tupu.”

I te fakaotiotiga o te tausaga 1925, ne mafauˋfau a taina ke fakalasi aka te Peteli i Brooklyn. I te 1926, ne kamata ei o fai te ˋtoe galuega fakatūˋtu lasi eiloa a te fakapotopotoga i konā.