Ne a Pati i te Tusi Tapu ki te ‵Nofo Fakapouliuli?

Te tali mai te Tusi Tapu

E fai mai te Tusi Tapu me e manako te Atua ko tino ke “‵kalo kea‵tea mai i amioga fakatauavaga sē ‵tau.” (1 Tesalonia 4:3) E pelā mo tena fakaaogaga i te Tusi Tapu, a te tugapati ko te “amioga fakatauavaga sē ‵tau” e aofia i ei a te mulilua, amioga fakasotoma, mo amioga fakatauavaga i te va o te tagata mo te fafine kolā e seki a‵vaga.

• Kaia e tāua ei ki te Atua a te avaga mo te sē avaga faka‵lei o se tokolua?

• Kae e a māfai e ‵nofo fakapouliuli ke ‵tofo aka me e ‵lei io me ikai?

• E ati aka pefea ne se tauavaga se olaga avaga fealofani?

Kaia e tāua ei ki te Atua a te avaga mo te sē avaga faka‵lei o se tokolua?

• A te fakatokaga ki te avaga ne māfua mai i te Atua. Ne kamata ne ia te mea tenā i te taimi ne tuku fakatasi ei ne ia te tauavaga muamua. (Kenese 2:22-24) Ne seki manako a ia ko te tagata mo te fafine ke ‵nofo fakatasi e aunoa mo te feagaiga o te fakaipoipoga.

• E iloa ne te Atua a te ‵toe mea ‵lei mō tino. Ne fai ne ia te fakaipoipoga e pelā me se fakatokaga tumau i te va o se tagata mo se fafine telā ka aoga kae puipui ei a tino katoa o te kāiga. Ke mafaufau ki se tala fakatusa faigofie. E pelā loa mo fakatonuga kolā ne aumai i se kamupane ki te auala ke fakapikipiki aka ei se taipola, a fakatonuga mai te Atua e fakaasi mai i ei a te auala ke ati aka se kāiga manuia. E maua faeloa a mea aoga ne tino kolā e tau‵tali ki tulaga o te Atua.—Isaia 48:17, 18.

  

• A amioga fakatauavaga kolā e fai ne tino e seki avaga e maua mai i ei a ikuga fakalogo‵mae. E pelā mo te faitama fakafuasei, masaki ‵pisi mai i amioga fakatauavaga, mo lagonaga manavase.a

• Ne fai ne te Atua a tāgata mo fāfine ke mafai o fanafanau e auala i amioga fakatauavaga. E ‵malu te ola i te kilokiloga a te Atua, kae ko te fanafanau se meaalofa tāua. E manako te Atua ke fakaasi atu ne tatou te āva ki te meaalofa tenā kae ke fakaaloalo ki tena fakatokaga mō te fakaipoipoga.—Epelu 13:4.

Kae e a māfai e ‵nofo fakapouliuli ke ‵tofo aka me e ‵lei io me ikai?

A te kī ki te mauaga o se fakaipoipoga fiafia e se ko te ‵nofo fakatasi muamua ke “tofotofo aka,” telā e mafai fua ne so se tino o fulitua atu ki ei. I lō te fai penā, e mafai o malosi se va fakatauavaga māfai e ga‵lue fakatasi lāua ke manumalo i fakalavelave.b A te avaga e fakamalosi aka ne ia a te feagaiga o te fakaipoipoga.—Mataio 19:6.

E ati aka pefea ne se tauavaga se olaga avaga fealofani?

E seai se olaga avaga e ‵lei katoatoa. Kae e mafai ne tauavaga o maua se kāiga manuia māfai e fakagalue a pati fakatonutonu i te Tusi Tapu. Konei a nai fakaakoakoga:

• Ke fakamuamua a manakoga o tau avaga i lō ou manakoga.—1 Kolinito 7:3-5; Filipi 2:3, 4.

• Ke fakatau ati aka te alofa mo te āva ki te suā tino.—Efeso 5:25, 33.

• Fakamasani ki te fai faka‵lei au pati.—Faataoto 12:18.

• Ke kufaki kae ke vave o fakamagalo.—Kolose 3:13, 14.