E Mata, e ‵Tau o ‵Kau Atu ki se Lotu Telā ne Fakatoka Faka‵lei?
Te tali mai te Tusi Tapu
Ao, me e manako te Atua ke maopoopo a tino mō te tapuakiga. E fai mai te Tusi Tapu: “Ke na mafau‵fau tatou te suā tino ki te suā tino o fakama‵losi atu ke fakatau a‵lofa kae fai a mea ‵lei, ke mo a ma ‵galo sāle tatou i ‵tou fakatasiga.”—Epelu 10:24, 25, fakamatalaga mai lalo.
Ne fakaasi mai ne Iesu me ka fakatu ne ana soko se potukau telā e fakatoka faka‵lei, i ana pati ki a latou: “Ona ko te mea tenei ka iloa ei ne tino katoa i a koutou ko oku soko, māfai e fakatau a‵lofa koutou.” (Ioane 13:35) A te ‵toe auala tāua ke fakaasi atu te alofa tenei, ko te ‵kau fakatasi o soko o Keliso mo taina tali‵tonu. Ka fakatoka latou ki fakapotopotoga kolā e maopoopo faeloa mō tapuakiga. (1 Kolinito 16:19) Kae ka fai a latou katoa e pelā me se kautaina i te lalolagi kātoa.—1 Petelu 2:17.
E uke atu a mea e ‵tau o fai i lō te kau atu fua ki se lotu
E tiga eiloa e fakaasi mai i te Tusi Tapu me e ‵tau o maopoopo a tino ke tapuaki ki te Atua, e se akoako mai i ei me e mafai o fakafiafia atu se tino ki te Atua mai te kau atu fua ki se lotu. Ke talia a ia ne te Atua, e ‵tau o aoga a mea e tauloto ne ia mai tena lotu ki tena olaga kātoa. E pelā mo pati i te Tusi Tapu, e fai mai: “A te lotu telā e ‵ma kae e se lailai i te kilokiloga a te Atua te ‵tou Tamana e fai penei: ke tausi atu ki tama‵liki ko ‵mate olotou mātua mo fāfine ko ‵mate olotou avaga i olotou puapuaga, kae ke tumau i te ‵ma e aunoa mo se lailaiga mai te lalolagi.”—Iakopo 1:27, fakamatalaga mai lalo.