E FESILI MAI A TALAVOU
E Fesoasoani Mai Pefea te Tusi Tapu ki a Au?—Vaega 1: Ke Iloilo Tau Tusi Tapu
“Ne taumafai au o faitau ki te Tusi Tapu, kae ne fakafi‵ta mai ona ko te lasi!”—Briana, 15.
E a, e penā foki ou lagonaga? E mafai o fesoasoani atu te mataupu tenei ki a koe!
Kaia e ‵tau o faitau ki te Tusi Tapu?
E a, e se gali a te manatu ke faitau ki te Tusi Tapu? Kafai e penā loa, se lagonaga masani. E mafai o mafaufau koe me i te Tusi Tapu se tusi telā e lau i afe a itulau i ei mo mataimanu fo‵liki e aunoa mo ne ata—telā e ‵kese ‵ki mai te TV mo vitio!
Kae mafaufau ki ei i te auala tenei: Kafai e maua ne koe se pusa ‵teu koloa mua kae lasi, e a, ka se fia iloa ne koe a mea i loto i ei?
A te Tusi Tapu se vaegā pusa ‵teu koloa penā. E maua i ei a taemani e uke o te poto kolā ka fesoasoani atu ke
Fai a fakaikuga ‵lei
Fealofani mo ou mātua
Maua a toe taugasoa ‵lei
Fakafesagai atu ki te loto mafatia
E aoga malosi pefea se tusi mua penā ki ‵tou aso nei? Me i “Tusitusiga Tapu katoa ne māfua mai i te Atua.” (2 Timoteo 3:16) Ko tena uiga, a pati fakatonutonu i te Tusi Tapu ne aumai mai i te ‵toe Koga ‵lei.
A te Tusi Tapu se pusa ‵teu koloa telā e maua i ei a taemani tāua o te poto
E ‵tau o faitau pefea au ki te Tusi Tapu?
A te auala e tasi ko te faitau ki te Tusi Tapu mai te kamataga ki te fakaotiga. Ka mafai ei o maua ne koe se ata kātoa o te fekau i te Tusi Tapu. E uke a auala ke faitau ei ki te Tusi Tapu. Mafaufau ki fakaakoakoga e lua konei:
E mafai o faitau koe ki tusi e 66 i te Tusi Tapu i te auala e fakasolo mai i ei, mai i te Kenese ki te Fakaasiga.
E mafai o faitau koe ki te Tusi Tapu e ‵tusa mo te fakasologa faka‵lei o tala mo te taimi ne ‵tupu i ei.
Manatu: Te Mataupu Fakaopoopo A7 i te ‵Fuliga o te Lalolagi Fou, e tuku mai i ei se fakasologa tonu o mea tāua ne ‵tupu i te olaga o Iesu i te lalolagi.
A te lua o auala ke faitau ki te Tusi Tapu ko te filifili o se tala telā e fetaui ‵lei mo se tulaga faigata e fepaki mo koe. E pelā mo mea konei:
E mata, e fia fai taugasoa koe ki a latou kolā e fakatalitonugina? Faitau ki te tala o Ionatana mo Tavita. (1 Samuelu, mataupu 18-20) Ka oti, ko onoono ei ki uiga o Tavita kolā ne fai ei ke fiafia a Ionatana ki a ia.
E mata, e manako koe ke fakamalosi aka tou manakoga ke ‵teke atu ki fakaosoosoga? Faitau ki te tala o Iosefa ki te auala ne ‵teke atu ei a ia ki fakaosoosoga. (Kenese, mataupu 39) Ka oti, ko onoono ei me ne maua mai i fea a te malosi o Iosefa ke ‵teke atu a fakaosoosoga.
E a, e fia iloa ne koe e mafai o fesoasoani atu a ‵talo? Faitau ki te tala o Neemia. (Neemia, mataupu 2) Ka oti, ko onoono ei ki te vitio Neemia: “Te Fiafia o Ieova ko te Otou ‵Pui Malosi”—Vaega 1 mo te 2. Ko onoono ei ki fakamaoniga o te ‵mana o ‵talo a Neemia.
Manatu: Kafai e faitau koe ki te Tusi Tapu, ke fakamautinoa aka me e seai se mea fakalogoa ko te mea ke mafai o saga tonu atu koe.
A te tolu o auala ke faitau ki te Tusi Tapu ko te filifili aka o se tala io me se salamo, faitau ki ei, kae ka oti, ko mafaufau me e aoga pefea ki a koe. Kafai ko oti koe ne faitau, fesili ifo penei:
Kaia ne aofia ei ne Ieova te mea tenei i te Tusi Tapu?
Se a te mea e fakaasi mai i ei ki uiga o Ieova io me ko ana faifaiga?
E mafai pefea o fakagalue aka ne au te fakamatalaga tenei i toku olaga?
Manatu: Fakaaoga te lōmiga fai sukesukega o te New World Translation ke mafai o onoono koe ki vitio, mape, mo nisi vaega kolā ka fesoasoani atu ke maua ne koe a mea aoga e uke mai tau faitauga ki te Tusi Tapu.