Esoto

32 Ko iloa ne tino Isalaelu me ko leva te galoga a Mose kae seki fanaifo eiloa mai te mauga.+ Tenā ne maopoopo atu ei latou ki tafa o Alona kae fai atu ki ei: “Tu ki luga, faite se atua mō tatou ke fano i ‵tou mua,+ me e se iloa ne tatou me se a te mea ko tupu ki a Mose, te tagata ne ‵taki ne ia tatou kea‵tea mai te fenua o Aikupito.” 2 Ne fai atu a Alona ki a latou: “Tapale a ligi aulo+ mai taliga o otou avaga, otou tama tāgata mo otou tama fāfine, kae aumai ki a au.” 3 Ne tapale ne tino katoa a ligi aulo i olotou taliga kae avatu ki a Alona. 4 Tenā ne puke ei ne ia a aulo mai i a latou kae fakaaoga ne ia te tofi ke faite ki ei te tupua pulumakau.+ Ne kamata latou o fai atu: “Tenei te otou Atua, e tino Isalaelu, telā ne ‵taki ne ia koutou kea‵tea mai te fenua o Aikupito.”+

5 I te laveaga ne Alona te mea tenei, faite ei ne ia se fatafaitaulaga i mua o te mea tenā. Tenā ne kalaga atu ei a Alona: “Ka fai se ‵kaiga fiafia ki a Ieova ma taeao.” 6 Ne alausu latou i te suā aso kae kamata o ofo atu a taulaga ‵sunu kae ofo atu a taulaga ‵kai fakatasi. Oti aka, ne saga‵saga a tino ki lalo o ‵kai kae inu. Kae ne ‵tu aka latou ki luga o fai olotou fakafiafiaga.+

7 Ne fai atu a Ieova ki a Mose: “Fanaifo, me i tino kolā ne ‵taki mai ne koe kea‵tea mai Aikupito ko fai ne latou a amioga ma‵sei.+ 8 Ko oti ne tiaki fakavave ne latou te auala telā ne fakatonu atu ne au ke olo latou i ei.+ Ko oti ne faite ne latou se tupua pulumakau kae ifo faeloa latou ki ei kae ofo atu a taulaga ki ei kae fai aka olotou pati, ‘Tenei te otou Atua, e tino Isalaelu, telā ne ‵taki ne ia koutou kea‵tea mai te fenua o Aikupito.’” 9 Ne toe fai atu a Ieova ki a Mose: “Ko iloa ne au me i tino konei ne tino loto ma‵keke.”*+ 10 Tela la, ke na ‵ta fakapalele ne au a latou i toku kaitaua telā e ‵ka pelā me se afi, kae ka fai ne au a koe mō fai se fenua takutakua.”+

11 Tenā ne fakamolemole atu ei a Mose ki a Ieova tena Atua,+ ana muna: “Ieova, kaia ko fakaasi atu ei ne koe tou kaitaua telā e ‵ka pelā me se afi ki ou tino mai tua o te aumaiga ne koe latou kea‵tea mai te fenua o Aikupito ki tou ‵mana mo tou lima malosi?+ 12 Kaia ka fai aka ei a tino Aikupito, ‘E isi se mea masei ne manako a ia o fai i te aumaiga ne ia o latou kea‵tea. Ne manako a ia o tamate latou i luga i mauga kae fakaseai atu latou mai te lalolagi nei’?+ Taofi aka tou kaitaua telā e ‵ka pelā me se afi kae toe mafaufau* ki tau fakaikuga ke aumai ne koe te mala tenei ki ou tino. 13 Ke masaua au tavini ko Apelaamo, Isaako mo Isalaelu kolā ne tauto koe ki ei kae fai atu, ‘Ka fakatokouke eiloa ne au au tama* e pelā mo fetū o te lagi,+ kae ka tuku atu ne au a te fenua+ kātoa tenei ki au tama,* ko te mea ke fai faeloa mō latou.’”

14 Tenā ne kamata ei a Ieova o toe mafaufau ki te mala ne fai mai a ia me ka aumai ne ia ki ana tino.+

15 Tenā ne mafuli ei a Mose kae fanaifo ki lalo mai te mauga mo papa fatu e lua o te Feagaiga+ e puke i ana lima.+ E isi ne tusitusiga i te avā feitu o papa fatu konā; ne tusi i te feitu ki mua mo te feitu ki tua. 16 A papa fatu konā ne faite eiloa ne te Atua, kae ko tusitusiga i ei ko tusitusiga a te Atua kolā ne tusi ki luga i papa fatu+ konā. 17 I te taimi ne lagona ei ne Iosua a te paka‵laga o tino, ne fai atu a ia ki a Mose: “E lagona ne au a leo o tino e pelā me taua.” 18 Kae ne fai atu a Mose:

“E se ne leo o tino e usu pese ona ko te lotou manumalo,

Kae e se ne leo o tino e ‵tagi fanoa‵noa ona ko te lotou takavale;

E ‵kese a te vaegā usu pese tenei e lagona ne au.”

19 I te taimi eiloa ne pili atu ei a Mose ki te koga e ‵nofo ei a tino kae lavea ne ia te pulumakau+ mo tino e saka‵saka mai i ei, ne kamata o fanaka tena kaitaua, ‵pei ei ne ia a papa fatu i ana lima ke malipi‵lipi valevale i lalo i te tafito o te mauga.+ 20 Ne puke ne ia te pulumakau telā ne faite ne latou kae ‵sunu ki te afi kae tuki palapala ke liu pauta;+ tenā ne ‵pei ei ne ia a lefu ki luga i te vai kae fai ne ia a tino Isalaelu ke inu ki ei.+ 21 Kae ne fai atu a Mose ki a Alona: “Ne a mea ne fai ne tino konei ki a koe, ko aumai ei ne koe te agasala matagā tenei ki luga i a latou?” 22 Ne tali atu a Alona: “Toku aliki, sa kaitaua. E iloa ‵lei ne koe me i tino konei e ma‵nako faeloa o fai a mea ma‵sei.+ 23 Tenā ne fai mai ei latou ki a au, ‘Faite se atua mō tatou ke fano i ‵tou mua, me e se iloa ne tatou me se a te mea ko tupu ki a Mose, te tagata ne ‵taki ne ia tatou kea‵tea mai te fenua o Aikupito.’+ 24 Fai atu ei au ki a latou, ‘So se tino e isi ne ana aulo e ‵tau o tapale ne ia kae aumai ki a au.’ Tenā ne ‵pei ei ne au ki loto i te afi kae ne maua mai i ei a te pulumakau tenei.”

25 Ne matea ne Mose a tino ko fai valevale me ne talia ne Alona a latou ke fai penā kae ne fai ne latou a mea fakalumaluma i mua o olotou fili. 26 Tenā ne tu ei a Mose i tena tulaga i te mataloa o te fakai kae fai atu: “Ko oi e ‵kau i a Ieova? O‵mai ki a au!”+ Kae ne maopoopo atu a tino Levi katoa ki ana tafa. 27 Ne fai atu a ia ki a latou: “Konei a pati a Ieova te Atua o Isalaelu ne fai mai, ‘E ‵tau mo koutou taki tokotasi o faka‵mau otou pelu kae olo atu i loto i te fakai kātoa mai te mataloa e tasi ki te suā mataloa o tamate tena taina, tena tuakoi mo tena taugasoa ‵pili.’”+ 28 Ne fai eiloa ne tino Levi a te mea ne fai atu ne Mose. Tela la, e nofo ki te 3,000 tāgata ne tamate i te aso tenā. 29 Tenā ne fai atu ei a Mose: “‵Vae koutou kea‵tea mō Ieova i te aso nei, me ko oti ne tamate ne koutou taki tokotasi otou tama mo otou taina;+ i te aso nei ka fakamanuia ne ia koutou.”+

30 I te suā aso ne faipati atu a Mose ki tino: “Ko oti ne fai ne koutou se matugā agasala matagā, kae nei la ka fanaka au ki a Ieova ke onoono aka me kāti e isi se mea e mafai o fai ne au ke fakamagalo ei otou agasala.”+ 31 Ne toe foki atu a Mose ki a Ieova kae fai atu: “Ko oko eiloa te matagā o te agasala ne fai ne tino konei! Ne faite ne latou se atua aulo+ mō latou eiloa! 32 Nei la, kafai e loto koe ki ei, ke fakamagalo aka te lotou agasala;+ kafai e se mafai, fakamolemole ko ‵solo aka la kea‵tea toku igoa telā ko oti ne tusi ne koe i tau tusi.”+ 33 Kae ne fai atu a Ieova ki a Mose: “So se tino ne agasala mai ki a au ka ‵solo kea‵tea ne au a tena igoa mai taku tusi. 34 Fano nei, kae ‵taki atu a tino ki te koga telā ne fai atu ne au ki a koe. Kiloke! A taku agelu ka fano i ou mua,+ kae i te aso eiloa telā ka fakataunu ei ne au taku fakaikuga, ka fakasala ne au a latou mō te lotou agasala ne fai.” 35 Tenā ne kamata ei o avatu ne Ieova te mala ki tino ona ko te pulumakau telā ne faite ne latou, ko te mea telā ne faite ne Alona.