Teutelonome

4 “Kae nei la e Isalaelu, faka‵logo mai ki tulafono mo ikuga o fakamasinoga konei e akoako atu ne au ke fai ne koutou, ko te mea ke mafai koutou o tumau i te ola+ kae olo atu o puke a te fenua telā ka tuku atu ne Ieova te Atua o otou tupuga ki a koutou. 2 E se ‵tau mo koutou o fakaopoopo se pati ki pati konei e fakatonu atu ne au, io me toese kea‵tea ne koutou ne pati mai i ei,+ ko te mea ke faka‵logo koutou ki fakatonuga a Ieova te otou Atua konei e fakatonu atu ne au ki a koutou.

3 “Ko oti ne lavea ne koutou ki otou mata a mea ne fai ne Ieova ki a Paala o Peolo. Ne ‵ta fakapalele ne Ieova te otou Atua mai i a koutou so se tagata telā ne tautali atu i a Paala o Peolo.+ 4 Kae ko koutou kolā ne puke ‵mau ki a Ieova te otou Atua konei katoa eiloa koi ola i te aso nei. 5 Kiloke, ko oti ne akoako ne au koutou ki tulafono fo‵liki mo ikuga o fakamasinoga,+ e pelā eiloa mo te mea ne fakatonu mai ne Ieova toku Atua ki a au, ko te mea ke faka‵logo koutou ki mea konā i te fenua telā ka puke ne koutou. 6 E ‵tau mo koutou o faka‵logo faka‵lei ki mea konā,+ me ka fakaasi mai i ei a te poto+ mo te malamalama+ i a koutou i mua o tino katoa kolā ka ‵logo i tulafono fo‵liki konei, kae ka fai mai latou, ‘E mautinoa eiloa me i tino o te fenua malosi tenei ne tino e ‵poto kae malama‵lama.’+ 7 Ko oi foki la te fenua malosi e ‵pili ana atua ki a latou e pelā mo te pili mai o Ieova te ‵tou Atua ki a tatou i so se taimi e ka‵laga atu ei tatou ki a ia?+ 8 Kae ko oi foki la te fenua malosi e isi ne ana tulafono fo‵liki kae amio‵tonu mo ikuga o fakamasinoga e pelā mo te Tulafono kātoa tenei ka tuku atu ne au ki a koutou i te aso nei?+

9 “Ke fakaeteete kae ke matapula‵pula malosi koutou ko te mea ke se mafai o puli i a koutou a mea ne lavea ne koutou ki otou mata kae ke se ‵teka kea‵tea mai otou loto i aso katoa o otou olaga. E ‵tau foki mo koutou o fakailoa atu a mea konā ki otou tama tāgata mo otou mokopuna tāgata.+ 10 I te aso ne tu atu ei koe i mua o Ieova tou Atua i Holepa, ne fai mai a Ieova ki a au, ‘Fakamaopoopo mai a tino ki a au ke fai ne au ke lagona ne latou aku pati,+ ko te mea ke mafai o malamalama latou e uiga ki te mataku ki a au+ i aso katoa e ola ei latou i te laukele kae ke mafai foki o akoako ne latou olotou tama tāgata.’+

11 “Ne fakapili‵pili mai koutou kae ‵tu i tafa o te tafito o te mauga, kae ko te mauga e ‵ka i te afi ke oko eiloa ki te lagi; kae ne pouli, ne kaumanā kae ne pouli tagataga te mauga.+ 12 Kae ko Ieova ne kamata o faipati atu ki a koutou mai loto i te afi.+ Ne lagona fua ne koutou a pati kae seai se tino ne lavea ne koutou+​—kae se leo fua.+ 13 Kae ne fai ne ia tena feagaiga ki a koutou,+ telā ne fakatonu atu a ia ke faka‵logo koutou​—ki Tulafono e Sefulu.*+ Oti aka, tusi ei ne ia a pati konā ki luga i papa fatu e lua.+ 14 I te taimi tenā, ne fakatonu mai a Ieova ki a au ke akoako atu ki a koutou a tulafono fo‵liki mo ikuga o fakamasinoga kolā e ‵tau o faka‵logo koutou ki ei i te fenua telā ka olo koutou o puke mō koutou.

15 “Tela la, ke na matapula‵pula malosi koutou, ona ko te mea e seki lavea ne koutou te foitino o Ieova i te aso ne faipati atu ei a ia ki a koutou mai loto i te afi i Holepa​— 16 ko te mea ke se fai ne koutou se faifaiga masei mai te faitega o se tupua mō koutou, se fakatusa o se tagata io me se fafine,+ 17 se fakatusa o se manu i te lalolagi io me se fakatusa o so se manu eva telā e eva i te lagi,+ 18 se fakatusa o so se mea telā e ‵tolo i te laukele, io me se fakatusa o so se ika i vai mai lalo ifo o te laukele.+ 19 Kae kafai e ‵kilo aka otou mata ki te lagi kae lavea ne koutou te la, te masina mo fetū​—ko kautau katoa o te lagi​—ke mo a ma faka‵segina koutou kae ifo atu ki mea konā io me tavini atu ki ei.+ Ko oti ne tuku ne Ieova te otou Atua a mea konā ki tino katoa mai lalo o te lagi. 20 Kae ko koutou ko tino ne puke kae tapale ki tua ne Ieova mai loto i te ogaumu telā e ‵sunu i ei a fiti, ki tua mo Aikupito, ke fai koutou mo ana tino,+ e pelā eiloa mo te mea ko tupu ki a koutou i te aso nei.

21 “Ne kaitaua a Ieova ki a au ona ko koutou,+ kae ne tauto a ia me e se ‵tau mo au o fanatu ki te suā feitu o te Iolitana io me ulu ki loto i te fenua gali telā ka tuku atu ne Ieova te Atua ki a koutou e pelā me se tofi.+ 22 Me ka mate au i te fenua tenei. Ka se fanatu eiloa au ki te suā feitu o te Iolitana.+ Kae ko koutou ka olo atu ki te suā feitu o puke te fenua gali tenei. 23 Fakaeteete ke mo a ma puli i a koutou a te feagaiga a Ieova te otou Atua ne fai mo koutou,+ kae ke mo a ma faite ne koutou ne tupua, se fakatusa o so se mea telā ne fakatapu ne Ieova te Atua ke mo a ma fai ne koutou.+ 24 Me i a Ieova te otou Atua e fai pelā me se afi ‵ka ulaula.+ A ia se Atua telā e manako ke tapuaki atu fua a tino ki a ia tokotasi.+

25 “Kafai ko isi ne otou tama mo mokopuna kae ko leva ne ‵nofo koutou i te fenua kae ne fai ne koutou a faifaiga ma‵sei kae faite se tupua+ o so se mea kae fai ne koutou a mea ma‵sei i te kilokiloga a Ieova te otou Atua ke kaitaua ei a ia,+ 26 e fai ne au te lagi mo te lalolagi e pelā me ne molimau mō koutou i te aso nei me i a koutou ka fakaseai fakavave atu eiloa mai te fenua telā ka olo koutou ki ei i te suā feitu o te Iolitana ke fai mō koutou. Ka se leva te ‵nofo o koutou i ei, kae ko koutou ka ‵ta fakapalele katoatoa atu.+ 27 Ka fakasalalau ne Ieova koutou ki nisi atufenua,+ kae ne nai tino fua i a koutou ka ‵sao+ mai te fenua telā ka avatu ne Ieova koutou ki ei. 28 Ka tavini atu koutou i konā ki atua ne faite ne tino ki lakau mo fatu,+ ko atua kolā e se mafai o lavea io me ‵logo io me ‵kai io me ‵sogi ne latou ne mea.

29 “Kafai e ‵sala koe ki a Ieova tou Atua i konā, ka maua eiloa ne koe a ia,+ māfai e ‵sala atu koe ki a ia mo tou loto kātoa mo tou ola kātoa.+ 30 Kafai ko puapuaga malosi koe kae ko ‵tupu ki a koe a mea katoa konei fakamuli ifo, tenā ko foki mai ei koe ki a Ieova tou Atua kae fakalogo ki tena leo.+ 31 Me i a Ieova tou Atua se Atua alofa fakamagalo.+ Ka se tuku tiaki ne ia koe io me fakamasei ne ia koe io me fakapuli ne ia te feagaiga ne fai ne ia mo ou tupuga.+

32 “Fesili atu nei e uiga ki aso ko ‵teka, ki aso kae koi tuai o ola koe, mai te aso ne faite ei ne te Atua a te tagata i te lalolagi; ‵sala ki ei mai te feitu e tasi o te lagi ke oko ki te suā feitu o te lagi. E mata, e isi se mea fakaofoofogia penei kai tupu aka loa io me kai logo aka eiloa koe i se mea penei ne tupu i aso mua?+ 33 E mata, e isi ne nisi tino ne lagona ne latou a te leo o te Atua e faipati mai i loto i te afi e pelā mo te mea ne lagona ne koe kae tumau eiloa i te ola?+ 34 Io me kai taumafai aka eiloa te Atua o puke mō ia se fenua mai i loto i te suā fenua i te faiga o fakamasinoga,* fakailoga, vavega,+ taua,+ tena lima malosi,+ tena lima mafi, mo faifaiga fakama‵taku,+ e pelā mo te mea ne fai ne Ieova te otou Atua mō koutou i Aikupito kae lavea ne koutou ki otou mata? 35 Ne fakaasi atu ki a koe a mea konei ko te mea ke iloa ne koe i a Ieova ko te Atua tonu;+ e seai aka foki se isi atua i ana tafa.+ 36 Ne fai ne ia ke lagona ne koe tena leo mai te lagi o fakatonu koutou, kae ne fai ne ia ke lavea ne koe tena afi lasi i te lalolagi, kae ne lagona ne koe ana pati mai loto i te afi.+

37 “Ona ko tena alofa ki ou tupuga kae ne filifili eiloa ne ia olotou tama mai tua o latou,+ ne aumai koe ki tua mo Aikupito i ana mua e auala i tena malosi sili. 38 Ne afuli kea‵tea ne ia mai i ou mua a atufenua kolā e ‵lasi kae ma‵losi atu i a koe, ko te mea ke aumai ei koe ki loto kae tuku atu ki a koe olotou fenua e pelā me se tofi, e pelā mo te mea ko tupu i te aso nei.+ 39 Tela la, ke iloa ne koe i te aso nei, kae ke puke ‵mau i tou loto, me i a Ieova ko te Atua tonu i te lagi i luga mo te lalolagi i lalo nei.+ E seai aka foki se isi atua.+ 40 E ‵tau mo koe o fakalogo ki ana tulafono fakavae mo ana fakatonuga konei e tuku atu ne au i te aso nei, ko te mea ke fanofano ‵lei a mea katoa mō koe mo au tama tāgata mai tua ifo i a koe, kae ke tumau koe i te fenua ne tuku atu ne Ieova tou Atua ki a koe.”+

41 I te taimi tenā, faka‵tu ei ne Mose a fakai e tolu i te feitu ki saegala o te Iolitana.+ 42 Kafai ne tamate ne se tino se isi tino i se auala fakafuasei kae e se takalialia a ia ki ei,+ e ‵tau mo ia o tele ki se fakai e tasi i fakai konei o nofo i ei.+ 43 A fakai konā ko Pesela+ i te koga lavaki i koga ma‵luga kae laugatasi mō tino Leupena, Lamota+ i Kileata mō tino Kato, mo Kolana+ i Pasana mō tino Manase.+

44 Tenei te Tulafono+ ne fai atu ne Mose ki tino Isalaelu. 45 Konei a fakamasauaga, tulafono fakavae, mo ikuga o fakamasinoga ne tuku atu ne Mose ki tino Isalaelu i te otiga ne o‵mai kea‵tea latou mai Aikupito,+ 46 i te kogā koga o te Iolitana i te vanu i te suā feitu o Petepeolo,+ i te fenua o te tupu o tino Amoli ko Sekono, telā ne nofo i Hesepono,+ kae ne fakatakavale ne Mose mo tino Isalaelu i te o‵maiga kea‵tea mai Aikupito.+ 47 Kae ne puke ne latou tena fenua mo te fenua o te tupu o Pasana ko Oko,+ mo tupu e tokolua o tino Amoli kolā ne ‵nofo i kogā koga ki togala o te Iolitana, 48 mai Aloela,+ telā e tu i kaugutu o te Vanu o Alinona, ke oko atu eiloa ki te Mauga o Saiona telā ko Helemoni,+ 49 mo te Alapaa kātoa i te kogā koga o te Iolitana, ke oko atu eiloa ki te Tai o te Alapaa* i feitu mauga o Peseka.+