Teutelonome

5 Tenā ne fakatonu atu ei a Mose ki tino Isalaelu katoa kae fai atu ki a latou: “Tino Isalaelu, faka‵logo mai ki tulafono fo‵liki mo ikuga o fakamasinoga konei ka fai atu ne au i te aso nei, kae e ‵tau mo koutou o tauloto kae faka‵logo faka‵lei ki ei. 2 A Ieova te ‵tou Atua ne fai ne ia se feagaiga mo tatou i Holepa.+ 3 Ne seki fai ne Ieova a te feagaiga tenei mo ‵tou tupuga, kae ne fai ne ia mo tatou, ko tatou katoa kolā e ola mai i te aso nei. 4 Ne faipati atu a Ieova ki a koutou mata ki mata i luga i te mauga mai loto i se afi ‵ka.+ 5 Au ne tu i te va o koutou mo Ieova i te taimi+ tenā ke fakaoko atu ki a koutou a te muna a Ieova, me ne ma‵taku koutou i te afi telā ne seki olo aka ei koutou ki te mauga.+ Ana muna,

6 “‘Au ko Ieova tou Atua, telā ne aumai ne ia koe ki tua mo te fenua o Aikupito, te koga ne nofo pologa ei koe.+ 7 E se ‵tau o isi ne nisi atua aka o koe i oku tafa.*+

8 “‘E se ‵tau mo koe o faite se tupua+ io me se mea e foliga pelā mo mea i te lagi i luga io me i te lalolagi, io me i vai mai lalo i te laukele. 9 E se ‵tau mo koe o ifo ki mea konā io me takitakigina ke tapuaki atu ki ei,+ me i a au, Ieova tou Atua, ko te Atua telā e manako ke tapuaki mai fua koe ki a au tokotasi,+ e fakasala ne au otou tama ona ko mea ‵se ne fai ne olotou tamana, ke oko ki te tolu o kautama mo te fa o kautama o tino kolā e takalia‵lia mai ki a au,+ 10 kae fakaasi atu te alofa fakamaoni ki te afe o kautama o tino kolā e a‵lofa mai ki a au kae faka‵logo ki aku fakatonuga.

11 “‘E se ‵tau mo koe o sona fakaaoga a te igoa o Ieova tou Atua i se auala sē ‵tau,+ me ka fakasala eiloa ne Ieova so se tino telā e sona fakaaoga ne ia tena igoa i se auala sē ‵tau.+

12 “‘Ke tausi a te aso o te Sapati kae faka‵malu ki ei, e pelā eiloa mo te fakatonuga a Ieova tou Atua ki a koe.+ 13 E ‵tau o fai ne koe au galuega katoa i loto i aso e ono,+ 14 kae i te fitu o aso ko te sapati tenā ki a Ieova tou Atua.+ E se ‵tau mo koe o fai so se galuega,+ ko koe io me ko tau tama tagata io me ko tau tama fafine io me ko tau pologa tagata io me ko tau pologa fafine io me ko tau pulumakau io me ko tau asini io me ko so se manu fagai a koe io me ko so se tino fakaa‵tea telā e nofo i loto i ou fakai,+ ko te mea ke malōlō a tau pologa tagata mo tau pologa fafine e pelā eiloa mo koe.+ 15 Ke masaua me i a koe ne fai pelā me se pologa i te fenua o Aikupito kae ko Ieova tou Atua ne aumai ne ia koe ki tua mai i konā ki tena lima malosi mo tena lima mafi.+ Tenā te pogai ne fakatonu atu ei a Ieova tou Atua ki a koe ke tausi te Sapati.

16 “‘Āva ki tou tamana mo tou mātua+ e pelā eiloa mo te fakatonuga a Ieova tou Atua ki a koe, ko te mea ke ola leva koe kae manuia koe i te fenua telā ka tuku atu ne Ieova tou Atua ki a koe.+

17 “‘E se ‵tau mo koe o tatino.+

18 “‘E se ‵tau foki mo koe o mulilua.+

19 “‘E se ‵tau foki mo koe o kaisoa.+

20 “‘E se ‵tau foki mo koe o fai se molimau sē tonu e uiga ki tou tuakoi.+

21 “‘E se ‵tau foki mo koe o manako ki te avaga a tou tuakoi.+ E se ‵tau foki mo koe o kaimanako ki te fale o tou tuakoi, io me ko tena manafa io me ko tena pologa tagata io me ko tena pologa fafine io me ko tena pulumakau io me ko tena asini io me ko so se mea a tou tuakoi.’+

22 “A fakatonuga* katoa konei ne faipati atu ne Ieova ki te otou fakapotopotoga kātoa i luga i te mauga mai loto i se afi, te kaumana, mo te pouli tagataga,+ i se leo maluga, kae e seai aka foki eiloa ne ana nisi pati; tenā ne tusi ei ne ia ki luga i papa fatu e lua kae tuku mai ki a au.+

23 “Kae i te taimi ne lagona ei ne koutou a te leo mai i te pouliga, i te taimi koi ‵ka ei te mauga i te afi,+ ne o‵mai a ulu o otou matakāiga katoa mo otou toeaina ki a au. 24 Tenā ne fai mai ei koutou, ‘Ko oti ne fakaasi mai ne Ieova te ‵tou Atua a tena ‵malu mo tena sili i konei, kae ne lagona ne tatou a tena leo mai loto i te afi.+ I te aso nei, ko oti ne lavea ne tatou me i te Atua e mafai o faipati ki se tagata kae tumau a te tagata tenā i te ola.+ 25 Kae nei la, kaia e ‵tau ei o ‵mate tatou? E mafai eiloa o ‵ka tatou i te afi fakamataku tenei. Kafai e fakalogo‵logo faeloa tatou ki te leo o Ieova te ‵tou Atua, ka ‵mate eiloa tatou. 26 Kae ko oi foki la te tino i tino katoa ne lagona ne ia te leo o te Atua ola e faipati mai i loto i te afi e pelā mo te mea ne lagona ne tatou kae tumau i te ola? 27 E ‵tau mo koe o fakapilipili atu o fakalogo ki mea katoa ka faipati atu ne Ieova te ‵tou Atua, kae ko koe te tino ka fakailoa mai ki a matou a mea katoa ka fai atu ne Ieova te ‵tou Atua ki a koe, kae ka faka‵logo matou kae fai foki ne matou a mea konā.’+

28 “Ne lagona ne Ieova a pati ne fai mai ne koutou ki a au, kae ne fai mai a Ieova ki a au, ‘Ko oti ne lagona ne au a pati ne fai atu ne tino konei ki a koe. A pati katoa ne fai ne latou e ‵lei.+ 29 Moi fai la ke isi faeloa se loto ma‵taku o latou ki a au+ kae faka‵logo ki aku fakatonuga katoa;+ tenā ka fanofano ‵lei ei olotou mea e fai e pelā foki mo olotou tama‵liki ki te se-gata-mai!+ 30 Fano o fai ki a latou: “‵Foki ki otou faleie.” 31 Kae ko koe e ‵tau o ‵nofo mo au i konei, kae ka fai atu ne au a fakatonuga katoa, tulafono fo‵liki mo ikuga o fakamasinoga kolā e ‵tau o akoako ne koe ki a latou kae ka faka‵logo latou ki ei i te fenua telā ka tuku atu ne au ki a latou ke fai mō latou.’ 32 E ‵tau mo koutou o fai a mea katoa ne fakatonu atu ne Ieova te otou Atua ki a koutou.+ E se ‵tau mo koutou o ‵fuli ki te fakaatamai io me ki te fakamaui.+ 33 E ‵tau mo koutou o sa‵sale i te auala ne fakatonu atu ne Ieova te otou Atua ke sa‵sale koutou i ei,+ ko te mea ke mafai o ola koutou kae manuia kae ola leva foki i te fenua telā ka puke mō koutou.+