Te Muamua Tupu

14 I te taimi tenā a Avia te tama tagata a Ielopoamo ne masaki. 2 Ne fai atu a Ielopoamo ki tena avaga: “Tu ki luga fakamolemole, kae fai ke se iloa ne tino i a koe ko te avaga a Ielopoamo, kae fano ki Sailo. Kiloke! A Aita te pelofeta tenā e nofo i konā. Ko ia ne faipati mai ki a au me ka fai au mo tupu o tino konei.+ 3 Puke ne koe e sefulu falaoa, keke, mo se tiā hani kae fano ki ei. Ka fai atu ne ia ki a koe a te mea ka tupu ki te tamaliki.”

4 Ne fai ne te avaga a Ielopoamo a mea ne fai atu ne ia. Ne tu aka tou fafine kae fano ki Sailo,+ oko atu ei ki te fale o Aita. A mata o Aita e kilo ‵tonu eiloa ki mua kae ko se ‵kite ona ko te matua.

5 Kae ne fai atu a Ieova ki a Aita: “A te avaga a Ielopoamo tenā e vau o fesili atu ki a koe e uiga ki tena tama tagata, me e masaki. Ka fai atu ne au ki a koe a pati e ‵tau o fai ki ei. Kafai e oko mai tou fafine ka ‵funa ne ia me ko oi a ia.”

6 I te taimi eiloa ne lagona ei ne Aita a vae o tou fafine ko ulu mai i te mataloa, ne fai atu a ia: “Vau ki loto e te avaga a Ielopoamo. Kaia e ‵funa ei ne koe a koe eiloa? Ko oti au ne ‵tofi ke fakailoa atu ki a koe se fekau ‵mafa. 7 Fano o fai ki a Ielopoamo, ‘Konei a pati a Ieova te Atua o Isalaelu ne fai mai: “Ne fakatu ne au koe mai i ou tino ke fai koe mo takitaki o oku tino Isalaelu.+ 8 Tenā ne ‵sae ei ne au kea‵tea te malo mai te kāiga o Tavita kae tuku atu ki a koe.+ Kae ko koe ne seki fai pelā mo taku tavini ko Tavita, telā ne fakalogo ki aku fakatonuga kae sasale mai i oku tua mo tena loto kātoa, kae fai fua ne ia a mea kolā e ‵tonu i taku kilokiloga.+ 9 Kae e sili atu te ma‵sei o au mea ne fai i lō tino katoa mai mua atu i a koe, kae ne faite ne koe se isi atua mō koe mo tupua fiti ke fai ei au ke kaitaua,+ kae ne fulitua mai koe ki a au.+ 10 Ona ko te pogai tenā ka fakaoko atu ei ne au a puapuaga ki te kāiga o Ielopoamo, kae ka fakaseai ne au a tāgata katoa mai te kāiga o Ielopoamo, e aofia i ei a tino sē ma‵losi kae vāivāi i Isalaelu, kae ka ‵teu faka‵ma ne au a te kāiga o Ielopoamo,+ e pelā eiloa me se tino telā e ‵fulu faka‵ma ne ia a fekau o manu! 11 So se tino i te kāiga o Ielopoamo e mate i te fakai ka kai ne kuli; kae ko so se tino e mate i te vao ka kai ne manu eva o te lagi, me ko oti ne faipati a Ieova e uiga ki ei.”’

12 “Nei la, tu ki luga kae fano ki tou fale. I te taimi e ‵tu ei ou vae ki loto i te fakai ko te tamaliki eiloa ko mate. 13 A Isalaelu kātoa ka fanoa‵noa ona ko ia kae tanu ne latou a ia, me ko ia tokotasi fua mai te kāiga o Ielopoamo ka tanu i se tanuga, me ko ia fua te tino mai te kāiga o Ielopoamo ne lavea ne Ieova te Atua o Isalaelu se mea ‵lei i a ia. 14 Ka fakatu aka ne Ieova se tupu ke pule i Isalaelu telā ka fakaseai ne ia te kāiga o Ielopoamo+ mai te aso tenā o fano ki mua, ao, i te taimi foki eiloa tenei. 15 Ka fakasala ne Ieova a Isalaelu e pelā me se mouku loa e gasuesue i te vai, kae ka unu ne ia kea‵tea a Isalaelu mai te laukele ‵lei tenei ne tuku atu ne ia ki olotou tupuga,+ kae ka fakasalalau ne ia latou ki te suā feitu o te Vaitafe,*+ me ne faite ne latou olotou pou lakau tapu,*+ kae fai ei ke kaitaua a Ieova. 16 Kae ka tiakina ne ia a Isalaelu ona ko agasala kolā ne fai ne Ielopoamo kae fai foki ne ia a Isalaelu ke agasala.”+

17 Tenā ne tu aka ei te avaga a Ielopoamo kae fano i tena auala, oko atu ei ki Tilesa. I tena okoatuga ki te mataloa o te fale, kae mate te tamaliki. 18 Ne tanu ne latou a ia, kae ne ‵tagi fanoa‵noa a Isalaelu kātoa ona ko ia, e ‵tusa eiloa mo pati a Ieova ne fai e auala i tena tavini ko Aita te pelofeta.

19 Kae ko te tala fakasolopito kātoa o Ielopoamo, te auala ne taua atu ei a ia+ mo te auala ne pule ei a ia, e tusi katoa i te tusi o tala fakasolopito i taimi o tupu o Isalaelu. 20 Kae ko te leva o te pulega a Ielopoamo e ‵tusa mo te 22 tausaga, oti aka loa takato ifo ei o malō‵lo fakatasi mo ana tupuga;+ kae ko tena tama tagata ko Natapu ne fai mo tupu e sui ei a ia.+

21 I te taimi tenā, a Leopoamo te tama tagata a Solomona ne fai mo tupu i Iuta. Ko 41 tausaga o Leopoamo i te taimi ne fai ei a ia mo tupu, kae ne pule a ia i tausaga e 17 i Ielusalema, ko te fakai ne filifili ne Ieova+ mai matakāiga katoa o Isalaelu mo fai te koga e tuku i ei tena igoa.+ A te igoa o te mātua o Leopoamo ko Naama te fafine Amoni.+ 22 Kae ne fai ne Iuta a mea ma‵sei i te kilokiloga a Ieova,+ kae ko agasala ne fai ne latou ne fai ei ke kaitaua malosi a ia i lō mea ne fai ne olotou tupuga.+ 23 Ne faite foki ne latou a koga ma‵luga, pou fatu tapu mo pou lakau tapu*+ mō latou i luga i so se tamā mauga+ kae mai lalo i so se lakau ola ‵lei.+ 24 E isi foki ne tāgata talitāgata o te faletapu i te fenua.+ Ne fai ne latou a mea fakatakalia‵lia kolā ne fai ne tino o nisi fenua kolā ne afuli kea‵tea ne Ieova i mua o tino Isalaelu.

25 I te lima o tausaga o te pulega a te Tupu ko Leopoamo, ne vau ei te tupu o Aikupito ko Sesaka+ o taua atu ki Ielusalema.+ 26 Ne puke ne ia a koloa o te fale o Ieova mo koloa o te fale* o te tupu.+ Ne puke ne ia a mea katoa, e aofia i ei a talita aulo katoa kolā ne faite ne Solomona.+ 27 Tenā ne faite ei ne te Tupu ko Leopoamo a talita kopa ke sui ei a mea konā, kae tuku atu ne ia ki pule o leoleo, kolā e leoleo i te mataloa o te fale o te tupu. 28 So se taimi e vau ei te tupu ki te fale o Ieova, e sau ne leoleo a mea konā, ka oti ko faka‵foki ei ne latou a mea konā ki te potu o leoleo.

29 Kae ko te tala fakasolopito kātoa o Leopoamo, ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta?+ 30 E isi faeloa ne taua ne fai i te va o Leopoamo mo Ielopoamo.+ 31 Tenā ne takato ifo ei a Leopoamo o malō‵lo fakatasi mo ana tupuga kae ne tanu fakatasi mo ana tupuga i te Fakai o Tavita.+ A te igoa o tena mātua ko Naama te fafine Amoni.+ Kae ko tena tama tagata ko Aviama*+ ne fai mo tupu e sui ei a ia.