Te Muamua Tupu
15 I te 18 tausaga o te pulega a te Tupu ko Ielopoamo+ te tama tagata a Nepata, ne fai a Aviama mo tupu o Iuta.+ 2 Ne pule a ia i tausaga e tolu i Ielusalema. A te igoa o tena mātua ko Maaka+ te mokopuna fafine o Apesaloma. 3 Ne fai eiloa ne ia a agasala katoa ne fai ne tena tamana mai mua atu i a ia, kae ne seki katoatoa tena loto ki* a Ieova tena Atua e pelā mo te loto o tena tupuga ko Tavita. 4 Kae ona ko Tavita,+ ne fai ne Ieova tena Atua ke isi faeloa se tino e pule mai tena gafa* i Ielusalema+ mai te fakatuakaga ne ia o tena tama tagata mai i ana tua kae fai ei ke tumau faeloa a Ielusalema. 5 Me i a Tavita ne fai ne ia a mea kolā e ‵tonu i te kilokiloga a Ieova, kae ne seki ‵fuli kea‵tea a ia mai i so se mea ne fakatonu atu ne Ia ki ei i aso katoa o tena olaga, kae na ko te mea fua e uiga ki a Ulia te tagata Heti.+ 6 Kae e isi eiloa ne taua ne fai i te va o Leopoamo mo Ielopoamo i aso katoa o tena olaga.+
7 Kae ko te tala fakasolopito kātoa o Aviama, ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta?+ E isi foki ne taua ne fai i te va o Aviama mo Ielopoamo.+ 8 Tenā ne takato ifo ei a Aviama o malō‵lo fakatasi mo ana tupuga, kae ne tanu ne latou a ia i te Fakai o Tavita; kae ko tena tama tagata ko Asa+ ne fai mo tupu e sui ei a ia.+
9 I te 20 tausaga o te pulega a te tupu o Isalaelu ko Ielopoamo, ne kamata a Asa o pule atu ki Iuta. 10 Ne pule atu a ia ki Ielusalema i tausaga e 41. A te igoa o tena tupuna fafine ko Maaka+ te mokopuna fafine o Apesaloma. 11 Ne fai ne Asa a mea kolā e ‵tonu i te kilokiloga a Ieova,+ e pelā mo tena tupuga ko Tavita. 12 Ne ‵tuli kea‵tea ne ia a tāgata talitāgata o te faletapu mai te fenua+ kae tapale kea‵tea ne ia a tupua fakatakalia‵lia katoa ne faite ne ana tupuga.+ 13 Ne tapale foki ne ia kea‵tea a tena tupuna fafine ko Maaka+ mai tena tulaga e pelā me ko te tupu fafine, me ne faite ne tou fafine se tupua matagā ke tapuaki atu ki ei i te pou lakau tapu.* Ne ‵kati ki lalo ne Asa a tupua matagā+ a tou fafine kae ‵sunu i te Vanu o Ketalono.+ 14 Kae ko koga ma‵luga ne seki fakaseai.+ E se gata i ei, ne katoatoa eiloa a te loto o Asa ki a Ieova i tena olaga kātoa. 15 Kae ne aumai ne ia a mea kolā ne fakatapu ne lāua mo tena tamana ki loto i te fale o Ieova—ko siliva, aulo mo meāfale valevale.+
16 E isi faeloa ne taua ne fai i te va o Asa mo Paasa+ te tupu o Isalaelu. 17 Tenā ne vau ei a te tupu o Isalaelu ko Paasa o taua atu ki Iuta kae kamata o faite* ne ia a Lama+ ke taofi ei so se tino e fano ki tua io me vau ki loto i te tupu o Iuta ko Asa.+ 18 I konā ne puke ei ne Asa a siliva mo aulo katoa mai koloa kolā ne ‵toe i te fale o Ieova mo koloa i te fale o te tupu kae tuku atu ki ana tavini. Tenā uga atu ei ne Asa a latou ki a Peniata te tama tagata a Tapilimoni te tama tagata a Hesioni, te tupu o Sulia,+ telā e nofo i Tamaseko, ana muna: 19 “E isi se feagaiga ne fai i te va o tāua, mo te va o toku tamana mo tou tamana. Ko avatu ne au se meaalofa siliva mo aulo ki a koe. Vau o ofa tau feagaiga mo te tupu o Isalaelu ko Paasa, ko te mea ke fano kea‵tea a ia mai i a au.” 20 Ne fakalogo a Peniata ki te Tupu ko Asa kae uga atu ne ia a takitaki o ana kautau ke taua atu ki fakai o Isalaelu, kae ne fakatakavale ne latou a Itioni,+ Tanu,+ Apelu-peta-maaka, Tinelete kātoa, mo te fenua kātoa o Nafatali. 21 I te logoga a Paasa i te mea tenei, ne fakagata fakavave ne ia te faitega* o Lama kae nofo eiloa i Tilesa.+ 22 Tenā ne ‵kami mai ei ne te Tupu ko Asa a Iuta kātoa—e seai se tino e seki ‵kami—kae tali ne latou a fatu mo laupapa i Lama kolā ne fakaaoga ne Paasa i te faiga o te galuega, kae ne faite* ki ei ne te Tupu ko Asa a Kepa+ i Peniamina, mo Mesepa.+
23 Kae ko te tala fakasolopito kātoa o Asa, tena malosi katoatoa mo ana mea katoa ne fai mo fakai ne faite* ne ia, e a, e se tusi katoa i te tusi o tala fakasolopito i taimi o tupu o Iuta? Kae i te taimi ko matua ei a ia, ne masaki a ia ki ana vae.+ 24 Tenā ne takato ifo ei a Asa o malō‵lo fakatasi mo ana tupuga kae ne tanu fakatasi mo latou i te Fakai o Tavita tena tupuga; kae ko tena tama tagata ko Iosefatu+ ne fai mo tupu e sui ei a ia.
25 A Natapu+ te tama tagata a Ielopoamo ne fai mo tupu i Isalaelu i te lua o tausaga o te pulega a te tupu o Iuta ko Asa, kae ne pule atu a ia ki Isalaelu i tausaga e lua. 26 Ne fai faeloa ne ia a mea ma‵sei i te kilokiloga a Ieova kae sasale i auala o tena tamana+ mo ana agasala kolā ne fai ei a tino Isalaelu ke agasala.+ 27 A Paasa te tama tagata a Aita mai te kāiga o Isakala ne fakatogafiti ne ia a tou tagata, kae ne ta ne Paasa a ia i Kipetoni,+ te fakai o tino Filisitia, i te taimi ne olo atu ei a Natapu mo Isalaelu kātoa o puke a Kipetoni. 28 Ne tamate ne Paasa a tou tagata i te tolu o tausaga o te pulega a te tupu o Iuta ko Asa kae fai ei a ia mo tupu e sui ei tou tagata. 29 I te taimi eiloa ne fai ei a ia mo tupu, ne ‵ta fakapalele ne ia te kāiga kātoa o Ielopoamo. Ne seki faka‵toe ne ia se tino mai te kāiga o Ielopoamo ke ola; ne fai ne ia ke fakaseai atu latou e ‵tusa mo te fakatonuga a Ieova ne fai e auala i tena tavini ko Aita te tino Sailo.+ 30 Ne tupu te mea tenei ona ko agasala ne fai ne Ielopoamo kae ne fai ei a tino Isalaelu ke agasala kae ona foki ko te faiga ne ia ke kaitaua malosi a Ieova te Atua o Isalaelu. 31 Kae ko te tala fakasolopito kātoa o Natapu, ana mea katoa ne fai, e a, e se tusi katoa i te tusi o tala fakasolopito i taimi o tupu o Isalaelu? 32 Kae e isi faeloa ne taua ne fai i te va o Asa mo te tupu o Isalaelu ko Paasa.+
33 I te tolu o tausaga o te pulega a te tupu o Iuta ko Asa, ne fai ei a Paasa te tama tagata a Aita mo tupu i Tilesa kae pule atu ki luga i Isalaelu kātoa kae ne pule i ei i tausaga e 24.+ 34 Kae ne fai faeloa ne ia a mea ma‵sei i te kilokiloga a Ieova,+ kae ne sasale a ia i auala o Ielopoamo mo ana agasala kolā ne fai ei a tino Isalaelu ke agasala.+