Te Muamua Nofoaiga Tupu

18 Fakamuli ifo, ne ‵ta ne Tavita a tino Filisitia kae fakatakavale latou kae puke ne ia a Kato+ mo ana fakai fo‵liki mai lima o tino Filisitia.+ 2 Oti aka, ne fakatakavale ne ia te kau Moapi,+ kae ne fai a tino Moapi mo fai a tavini a Tavita kae ne aumai ne latou a meaalofa.+

3 Ne fakatakavale ne Tavita a te Tupu ko Hatatesa+ mai Sopa+ i tafa o Hamata+ i tena auala o fakamalosi aka tena pulega i te Vaitafe ko te Eufilate.+ 4 Ne puke ne Tavita mai i a ia a kaliota e 1,000, tāgata faka‵tele solofanua e toko 7,000, kae toko 20,000 a sotia sa‵sale.+ Tenā ne fai ei ne Tavita ke ‵pili a vae o olotou solofanua+ faka‵tele kaliota katoa kae faka‵toe fua e 100. 5 I te taimi ne o‵mai ei a tino Sulia mai Tamaseko o fesoasoani ki te tupu o Sopa ko Hatatesa, ne ‵ta ne Tavita a tino Sulia e toko 22,000.+ 6 Tenā ne faka‵tu aka ei ne Tavita ne sotia leoleo i Sulia mai Tamaseko, kae ne fai a tino Sulia mo fai a tavini a Tavita kae avatu ne latou a meaalofa ki a ia. Ne tuku atu ne Ieova te manumalo* ki a Tavita i so se koga ne fano a ia ki ei.+ 7 E se gata i ei, ne puke ne Tavita a talita aulo puku‵puku a tavini a Hatatesa kae aumai a mea konā ki Ielusalema. 8 Ne puke ne Tavita a kopa e uke mai Tipata mo Kunu, ko fakai o Hatatesa. Ne faite ne Solomona ki mea konā a te Tai kopa,+ pou mo meāfale kopa.+

9 I te taimi ne logo ei te tupu o Hamata ko Tou* me ne fakatakavale ne Tavita te kautau kātoa a te tupu o Sopa+ ko Hatatesa,+ 10 ne uga fakavave atu ne ia tena tama tagata ko Hatolama ki te Tupu ko Tavita o fesili atu me e a mai a ia kae fakamālō atu ki a ia mō te taua atu mo te fakatakavalega o Hatatesa (me i a Hatatesa e masani o taua atu ki a Tou), kae ne aumai katoa ne ia a mea valevale e faite ki aulo, siliva mo kopa. 11 Ne fakatapu ne te Tupu ko Tavita a mea konei ki a Ieova,+ fakatasi mo siliva mo aulo kolā ne aumai ne ia mai fenua fakaa‵tea: mai Etoma mo Moapi, mai tino Amoni,+ tino Filisitia+ mo tino Amaleka.+

12 Apisai+ te tama tagata a Seluia+ ne ‵ta ne ia a tino Etoma e toko 18,000 i te Vanu o Masima.+ 13 Ne faka‵tu ne ia a sotia leoleo i Etoma, kae ne fai a tino Etoma katoa mo fai a tavini+ a Tavita. Ne tuku atu ne Ieova te manumalo* ki a Tavita i so se koga ne fano a ia ki ei.+ 14 Ne pule faeloa a Tavita ki Isalaelu+ kātoa, kae ne fai ne ia a fakamasinoga ‵tonu mo te amiotonu ki ana tino katoa.+ 15 A Ioapo te tama tagata a Seluia ko te pule o te kautau,+ a Iosefatu+ te tama tagata a Ailuta ko te tino fakamau fakamatalaga, 16 a Satoka te tama tagata a Aitupa mo Aimeleka te tama tagata a Aviata ko faitaulaga, kae ko Soasa ko te failautusi. 17 A Penaia te tama tagata a Ieoiata ko te pule o tino Keleti+ mo tino Peletite.+ Kae ko tama tāgata a Tavita ko tino muamua e tafa atu ki te tupu.