Te Muamua Nofoaiga Tupu

27 Tenei te aofaki o tino Isalaelu, ko ulu o kāiga i olotou tamana, ko takitaki o taki tokoafe mo taki tokoselau,+ mo olotou ofisa kolā ne tavini atu ki te tupu+ i te faiga o so se mea mai i potukau kolā e o‵mai ki loto kae olo ki tua i masina takitasi i masina katoa o te tausaga; e ‵tusa mo te toko 24,000 i potukau takitasi.

2 A te pule o te potukau muamua o te masina muamua ko Iasopeamo+ te tama tagata a Sapatielu, kae e toko 24,000 i tena potukau. 3 Mai i tama a Falesa,+ ko ia te ulu o takitaki katoa o potukau kolā ne ‵tofi ke tavini atu i te masina muamua. 4 A te pule o te potukau i te lua ko Toto+ te tino Ahoi+ mo tena potukau, kae ko Mikilota ko te takitaki, kae e toko 24,000 i tena potukau. 5 A te takitaki o te potukau i te tolu telā ne ‵tofi aka ke tavini atu i te tolu o masina ko Penaia+ te tama tagata a Ieoiata+ te faitaulaga pule, kae e toko 24,000 i tena potukau. 6 A Penaia tenei se toa mafi o te toko tolusefulu kae ko te takitaki o te toko tolusefulu, kae ko te pule o tena potukau ko Amisapata tena tama tagata. 7 A te fa o takitaki mō te fa o masina ko Asaelu+ te taina o Ioapo,+ mo tena tama tagata ko Sepatia mai i ana tua, kae e toko 24,000 i tena potukau. 8 A te lima o takitaki mō te lima o masina ko Samuta te tino Iselaia, kae e toko 24,000 i tena potukau. 9 A te ono o takitaki mō te ono o masina ko Ila+ te tama tagata a Ikesi te tino Tekoa,+ kae e toko 24,000 i tena potukau. 10 A te fitu o takitaki mō te fitu o masina ko Helesa+ te tino Pelona mai tino Efalaima, kae e toko 24,000 i tena potukau. 11 A te valu o takitaki mō te valu o masina ko Sipekai+ te tino Husa mai tino Tila,+ kae e toko 24,000 i tena potukau. 12 A te iva o takitaki mō te iva o masina ko Apiese+ te tino Anatota+ mai tino Peniamina, kae toko 24,000 i tena potukau. 13 A te sefulu o takitaki mō te sefulu o masina ko Malai+ te tino Netopa mai tino Tila,+ kae e toko 24,000 i tena potukau. 14 A te 11 o takitaki mō te 11 o masina ko Penaia+ te tino Pilatonu mai tama tāgata a Efalaima, kae e toko 24,000 i tena potukau. 15 A te 12 o takitaki mō te 12 o masina ko Heletai te tino Netopa mai i tama tāgata a Otinielu, kae e toko 24,000 i tena potukau.

16 Konei a takitaki o matakāiga o Isalaelu: Mai tino Leupena, a Eliesa te tama tagata a Sikeli ko te takitaki; mai tino Simeona ko Sefatia te tama tagata a Maaka; 17 mai te matakāiga o Levi ko Hasapaia te tama tagata a Kemuelu; mai i tino kolā ne ‵tupu mai i a Alona ko Satoka; 18 mai te matakāiga o Iuta ko Eliu,+ se tino e tokotasi o taina o Tavita; mai te matakāiga o Isakala ko Omeli te tama tagata a Mikaele; 19 mai te matakāiga o Sepulona ko Isimaia te tama tagata a Opetaia; mai te matakāiga o Nafatali ko Ielimota te tama tagata a Asilieelu; 20 mai i tino Efalaima ko Hosia te tama tagata a Asasia; mai te āfa o te matakāiga o Manase ko Ioelu te tama tagata a Petaia; 21 mai te āfa o te matakāiga o Manase i Kileata ko Ito te tama tagata a Sakalia; mai te matakāiga o Peniamina ko Iasieli te tama tagata a Apinelu;+ 22 mai te matakāiga o Tanu ko Asalelu te tama tagata a Ielohama. Konei a pelenise o matakāiga o Isalaelu.

23 Ne seki lau aka ne Tavita a latou kolā ko taki 20 tausaga o fano ki lalo, me ko oti ne tauto a Ieova ke fakatokouke ne ia a Isalaelu e pelā mo fetū o te lagi.+ 24 A Ioapo te tama tagata a Seluia ne fatoa kamata o lau aka ne ia a tino, kae ne seki oti tena galuega; ne kaitaua a te Atua ki Isalaelu ona ko te lauga o tino,+ kae ne seki tusi a te aofaki tenā ki loto i tala fakasolopito i taimi o te Tupu ko Tavita.

25 A te pule o potu ‵teu koloa a te tupu+ ko Asimaveta te tama tagata a Atielu. A Ionatana te tama tagata a Usia ko te pule o fale ‵teu koloa i fatoaga, i fakai ‵lasi, fakai fo‵liki mo taoa.  26 A te pule o tino e ga‵lue i fatoaga kolā ne fakatoka ne latou te laukele ko Esieli te tama tagata a Kelupa. 27 A Simei te tino Lama ko te pule o togavine; kae ko Sapeti te tino Sifimota e pule atu ki fuataga o togavine mo fai a uaina. 28 A te pule o togaolive mo lakau ko sukamolo+ i te Sefila+ ko Paala-hananu te tino Ketela; a te pule o tino kolā e fakasoa mai ne latou a sinu ko Ieoasa.  29 A te pule o lafu manu kolā e kai‵kai i Salona+ ko Silitai te tino Salona, kae ko Safata te tama tagata a Atalai ko te pule o lafu manu i vanu. 30 A te pule o kamela ko Opili te tino Isamaeli; kae ko te pule o asini* ko Ieteia te tino Melonota. 31 A te pule o lafu mamoe ko Iasisi te tino Hakili. A latou katoa konei ko takitaki o mea a te Tupu ko Tavita.

32 A Ionatana,+ te fakatama a Tavita, se tino fakatonutonu, se tagata loto malamalama kae se failautusi, kae ko Ieielu te tama tagata a Hakamoni ne tausi ne ia a tama tāgata a te tupu.+  33 Aitofele+ se tino fakatonutonu a te tupu, kae ko Husai+ te tino Alaki ko te taugasoa o te tupu. 34 Mai tua o Aitofele ko Ieoiata te tama tagata a Penaia+ mo Aviata+ kae ko Ioapo+ ko te takitaki o te kautau a te tupu.