Te Lua Nofoaiga Tupu

28 Ko 20 tausaga o Aasa+ i te taimi ne fai ei a ia mo tupu, kae ne pule a ia i Ielusalema i tausaga e 16. Ne seki fai ne ia a te mea tonu i te kilokiloga a Ieova e pelā mo mea ne fai ne tena tupuga ko Tavita.+ 2 I lō te fai penā, ne sasale a ia i auala o tupu o Isalaelu,+ kae ne faite foki ne ia a tupua fiti+ o Paala. 3 E se gata i ei, ne fai ne ia ke fanaka te au mai i taulaga i te Vanu o te Tama Tāgata a Hinomo* kae ‵sunu ana tama tāgata ki te afi,+ mai te tautali atu i faifaiga fakatakalia‵lia a nisi fenua+ kolā ne afuli kea‵tea ne Ieova i mua o tino Isalaelu. 4 Ne ofo atu faeloa ne ia a taulaga kae fai ke fanaka te au mai te taulaga i luga i koga ma‵luga,+ i tamā mauga, kae mai lalo i so se lakau ola ‵lei.+

5 Tenā ne tuku atu ei ne Ieova tena Atua a ia ki lima o te tupu o Sulia,+ ko te mea ke fakatakavale ne latou a ia kae puke ne latou a pagota e tokouke o avatu ki Tamaseko.+ Ne tuku atu foki a ia ki lima o te tupu o Isalaelu, telā ne lasi ‵ki te tamatega ne fai ne ia. 6 A Peka+ te tama tagata a Lemalia ne tamate ne ia te toko 120,000 i Iuta i te aso e tasi, ne tāgata ‵mafi katoa, me ne tiakina ne latou a Ieova te Atua o olotou tupuga.+ 7 Kae ko Sikeli, se toa mafi mai Efalaima, ne tamate ne ia a te tama tagata a te tupu ko Maseia mo Asilikama te pule o te palesi, mo Elekana te tokolua ki te tupu. 8 E se gata i ei, ne puke fakapagota ne tino Isalaelu olotou taina e toko 200,000—fāfine, tama tāgata mo tama fāfine; ne uke foki olotou mea ne puke mai i te taua, kae ne ave ne latou a mea ne puke mai i te taua ki Samalia.+

9 Ne nofo atu se pelofeta a Ieova e igoa ki a Oteta i konā. Ne fanatu a ia ki mua o te kautau kolā e o‵mai ki Samalia kae fai atu ki a latou: “Kiloke! Ona ko te kaitaua o Ieova te Atua o otou tupuga ki Iuta tenā ne tuku atu ei ne ia latou ki otou lima,+ kae ne tamate ne koutou a latou mo te kaitaua lasi ‵ki, tenā ko iloa ei ne te Atua. 10 Kae nei ko ma‵nako koutou o fai a tino Iuta mo Ielusalema mo fai otou tavini tāgata mo tavini fāfine.+ Kae e a, e se agasala foki koutou i mua o Ieova te otou Atua? 11 Nei la, faka‵logo mai ki a au kae toe faka‵foki a pagota kolā ne puke mai ne koutou mai otou taina, me i a Ieova ko oko eiloa i te kaitaua ki a koutou.”

12 I konā loa, ne olo atu a nisi takitaki o tino Efalaima, ko Asalia te tama tagata a Ieoananu, Pelekia te tama tagata a Mesilemota, Ieisikia te tama tagata a Saluma mo Amasa te tama tagata a Hatalai o fai‵pati mo latou kolā ne o‵mai i te kautau, 13 kae ne fai atu a latou: “Sa aumai a pagota ki konei, me ka fai ne latou a matou ke agasala i mua o Ieova. A te mea e ma‵nako koutou o fai ka fakaopoopo fua i ei te uke o omotou agasala mo mea ‵se, me ko leva ne uke omotou mea ‵se kae ko te Atua ko oko eiloa i te kaitaua ki Isalaelu.” 14 Tenā ne tuku atu ei ne sotia a pagota mo mea ne ‵fao+ mai i te taua ki pelenise mo te fakapotopotoga kātoa. 15 Ne ‵tu aka a tāgata kolā ne filifili olotou igoa o puke a pagota, kae tuku atu ne latou a gatu ne puke mai i mea o te taua ki tino katoa kolā e seai ne gatu. Tenā ne fakapei ei ne latou olotou gatu kae tuku atu a taka ki a latou, meakai mo meainu, mo sinu mo ‵mili latou. E se gata i ei, ne faka‵sopo aka ne latou a tino vāi‵vai ki luga i asini kae avatu a latou ki olotou taina i Ieliko, te fakai o lakau pama. Oti aka, toe ‵foki atu ei latou ki Samalia.

16 I te taimi tenā ne fakamolemole atu ei a te Tupu ko Aasa ki tupu o Asulia mō se fesoasoani.+ 17 Kae ne toe ‵foki mai a tino Etoma o taua atu ki Iuta kae ave fakapagota a latou. 18 Ne taua atu foki a tino Filisitia+ ki fakai i te Sefila+ mo te Nekepi i Iuta kae puke ne latou a Peta-semese,+ Aitialona,+ Ketelota, Soko mo ana fakai fo‵liki, Timenata+ mo ana fakai fo‵liki mo Kimoso mo ana fakai fo‵liki; kae ‵nofo latou i konā. 19 Ne fakamasiasi ne Ieova a Iuta ona ko te tupu o Isalaelu ko Aasa, me ne talia ne ia a Iuta ke fai i ei a amioga ma‵sei, kae iku atu i ei ki te lasi o te sē fakamaoni ki a Ieova.

20 Fakamuli ifo, ne ‵teke atu a te tupu o Asulia ko Tikila-pilinesa+ ki a ia kae fakapuapuaga+ ne ia tou tagata i lō te fakamalosi atu ki a ia. 21 Me ko oti ne ave kea‵tea ne Aasa a mea katoa i te fale o Ieova mo te fale o te tupu+ mo fale o pelenise kae fai ne ia se meaalofa ki te tupu o Asulia; kae e seki fesoasoani atu a te mea tenā ki a ia. 22 Kae i te taimi ne puapuaga ei a ia, ne gasolo aka eiloa o se fakamaoni a te Tupu ko Aasa ki a Ieova. 23 Ne kamata o ofo atu ne ia a taulaga ki atua o Tamaseko+ kolā ne takavale a ia i ei,+ kae fai atu a ia: “Ona ko atua o tupu o Sulia ne fesoasoani atu ki a latou, ka ofo atu ne au a taulaga ki a latou ko te mea ke fesoasoani mai latou ki a au.”+ Kae ne fai ne latou a ia mo Isalaelu kātoa ke pakū. 24 E se gata i ei, ne ‵tae mai ne Aasa a meāfale o te fale o te Atua tonu; katikati ei ne ia a meāfale o te fale o te Atua tonu,+ ‵pono a mataloa o te fale o Ieova+ kae faite a fatafaitaulaga ma ia i ‵kōna katoa o Ielusalema. 25 Kae i fakai katoa o Iuta, ne faite ne ia a koga ma‵luga mo ofo atu a taulaga ki nisi atua,+ kae ne fai ne ia ke kaitaua a Ieova te Atua o ana tupuga.

26 Kae ko te tala fakasolopito kātoa o ia, ana faifaiga katoa mai te kamataga ke oko ki te fakaotiga, e tusi i te Tusi o Tupu o Iuta mo Isalaelu.+ 27 Tenā ne takato ifo ei a Aasa o malō‵lo fakatasi mo ana tupuga, kae ne tanu ne latou a ia i te fakai i Ielusalema, me ne seki avatu ne latou a ia ki te koga e tanu ei a tupu o Isalaelu.+ Kae ko tena tama tagata ko Hesekia ne fai mo tupu e sui ei a ia.