Te Lua Nofoaiga Tupu

30 Ne avatu te fekau a Hesekia ki Isalaelu+ mo Iuta kātoa, kae tusi foki ana tusi ki tino Efalaima mo tino Manase,+ ke o‵mai ki te fale o Ieova i Ielusalema o fakamanatu a te Paseka ki a Ieova te Atua o Isalaelu.+ 2 Ne fakaiku aka ne te tupu, ana pelenise mo te fakapotopotoga kātoa i Ielusalema ke fakamanatu a te Paseka i te lua o masina,+ 3 me ne seki mafai o fakamanatu ne latou i te taimi masani,+ ona ko te sē lava o faitaulaga kolā ko oti ne fakatapu+ kae ko tino foki e seki maopoopo mai ki Ielusalema. 4 Ne fiafia te tupu ki te fakatokaga tenei e pelā foki mo te fakapotopotoga kātoa. 5 Tenā ne fakaiku aka ei ne latou ke fai se faka‵pulaga i Isalaelu kātoa, mai Pelesepa ke oko ki Tanu,+ me e ‵tau o ‵mai a tino o fakamanatu te Paseka ki a Ieova te Atua o Isalaelu i Ielusalema, me e pelā me se potukau ne seki mafai o fakamanatu ne latou e ‵tusa mo mea kolā ne tusi ki lalo.+

6 Tenā ne olo atu ei a avefekau i Isalaelu mo Iuta kātoa mo tusi mai te tupu mo ana pelenise e ‵tusa eiloa mo te fakatonuga a te tupu, ana muna: “Tino Isalaelu, toe ‵foki mai ki a Ieova te Atua o Apelaamo, Isaako mo Isalaelu ko te mea ke mafai o foki mai a ia ki te ‵toega o latou kolā ne ‵sao mai i lima o tupu o Asulia.+ 7 Sa fai pelā mo otou tupuga mo otou taina kolā ne seki fakamaoni ki a Ieova te Atua o olotou tupuga, kae fai ne ia latou e pelā me se mea fakamataku, e pelā mo te mea e lavea ne koutou.+ 8 Sa loto ma‵keke e pelā mo otou tupuga.+ Faka‵logo ki a Ieova kae o‵mai ki tena koga tapuaki+ telā ko oti ne fakatapu ne ia ki te se-gata-mai kae tavini atu ki a Ieova te otou Atua, ko te mea ke se oko atu ki a koe a tena kaitaua telā e ‵ka pelā me se afi.+ 9 Kafai e ‵foki mai koutou ki a Ieova, ka fakaasi atu eiloa ne tino kolā ne puke fakapagota ne latou otou taina mo otou tama tāgata+ a te alofa fakamagalo kae ka talia ke ‵foki mai ki te fenua tenei,+ me i a Ieova te otou Atua e alofa atafai kae alofa fakamagalo,+ kae ka se ‵fuli kea‵tea ana mata mai i a koutou māfai e toe ‵foki mai koutou ki a ia.”+

10 Ne olo atu a avefekau mai fakai ki fakai i loto i te fenua o Efalaima mo Manase,+ ke oko eiloa ki Sepulona, kae ko tino ne ‵kata ki a latou kae fakatauemu atu ki a latou.+ 11 Kae e isi ne nai tino mai Asela, Manase mo Sepulona ne loto maulalo kae ne o‵mai ki Ielusalema.+ 12 A te fakamanuiaga a te Atua tonu ne i luga i Iuta kae ne loto tasi latou o fai a mea ne fakatonu atu ne te tupu mo pelenise e auala i te fakatonuga a Ieova.

13 Ne maopoopo mai a tino e tokouke i Ielusalema o fakamanatu te ‵Kaiga Fiafia o Falaoa sē Faka‵fete+ i te lua o masina;+ se fakapotopotoga lasi ‵ki. 14 Ne ‵tu aka latou kae tapale kea‵tea a fatafaitaulaga i Ielusalema,+ kae ne tapale foki kea‵tea ne latou a fatafaitaulaga katoa o mea ma‵nogi+ kae ‵pei atu ki te Vanu o Ketalono. 15 Tenā ne tamate ei ne latou a te taulaga o te Paseka i te 14 o aso o te lua o masina. Ne masiasi a faitaulaga mo tino Levi, tenā ne fakatapu ei latou kae aumai a taulaga ‵sunu ki te fale o Ieova. 16 Ne ‵tu latou i olotou tulaga masani, e ‵tusa eiloa mo te Tulafono a Mose te tagata o te Atua tonu; tenā ne fakamatulutulu atu ei ne faitaulaga a toto+ ne tuku mai ne tino Levi. 17 E tokouke a tino i te fakapotopotoga ne seki fakatapu, kae ko tino Levi e onoono ki te tamatega o taulaga o te Paseka mō latou katoa kolā e se ‵ma,+ ke fakatapu ei latou ki a Ieova. 18 Me e tokouke ‵ki a tino kae maise ko latou mai Efalaima, Manase,+ Isakala mo Sepulona kolā ne seki faka‵ma olotou foitino, kae ne ‵kai eiloa latou i te Paseka, se mea e se fetaui mo mea ne tusi ki lalo. Kae ko Hesekia ne ‵talo mō latou, ana muna: “Ke alofa eiloa a Ieova telā e ‵lei,+ o talia 19 so se tino telā ne fakatoka tena loto o ‵sala ki te Atua tonu,+ ko Ieova te Atua o ana tupuga, e tiga eiloa e seki faka‵ma a ia e ‵tusa mo tulaga o mea tapu.”+ 20 Kae ne fakalogo a Ieova ki a Hesekia kae fakamagalo* ne ia a tino.

21 Ne fakamanatu ne tino Isalaelu kolā ne ‵nofo i Ielusalema a te ‵Kaiga Fiafia o Falaoa sē Faka‵fete+ i aso e fitu mo te fiafia lasi,+ kae ko tino Levi mo faitaulaga ne ‵viki atu ki a Ieova i aso takitasi, kae faka‵tagi ke ma‵luga olotou mea fakatagi‵tagi ki a Ieova.+ 22 E se gata i ei, ne faipati a Hesekia o fakamalosi* a tino Levi katoa kolā ne tavini atu ki a Ieova mo te poto. Kae ne ‵kai latou i te taimi kātoa ne fai ei te fakamanatuga i aso e fitu,+ mai te ofoatuga o taulaga ‵kai fakatasi+ kae avatu te fakafetai ki a Ieova te Atua o olotou tupuga.

23 Tenā ne fakaiku aka ei ne te fakapotopotoga kātoa ke toe fitu aso e fai ei te fakamanatuga, tenā ne fakamanatu ei ne latou mo te fia‵fia+ i nisi aso e fitu. 24 Kae ko te tupu o Iuta ko Hesekia ne tuku fakameaalofa atu ne ia ki te fakapotopotoga a pulumakau tāgata e 1,000 mo mamoe e 7,000, kae ne tuku fakameaalofa atu ne pelenise ki te fakapotopotoga a pulumakau tāgata e 1,000 mo mamoe e 10,000;+ kae e uke ‵ki a mea konā ne fakatapu ne faitaulaga.+ 25 Kae ko te fakapotopotoga kātoa o Iuta, faitaulaga, tino Levi, fakapotopotoga katoa kolā ne o‵mai mai Isalaelu,+ mo tino fakaa‵tea+ kolā ne o‵mai i te fenua o Isalaelu mo latou kolā ne ‵nofo i Iuta ne tumau eiloa i te fia‵fia. 26 Kae ne lasi te fia‵fia i Ielusalema, me e seki ai eiloa se mea penei ne tupu i Ielusalema talu mai aso o Solomona te tama tagata a Tavita te tupu o Isalaelu.+ 27 Fakamuli loa, ne ‵tu aka a faitaulaga Levi kae fakamanuia ne latou a tino;+ kae ne lagona ne te Atua olotou leo, kae ne oko atu eiloa olotou ‵talo ki tena koga nofo telā e ‵malu, ko te lagi.