Te Lua Nofoaiga Tupu

12 I te taimi eiloa ne ‵mautakitaki+ ei te pulega fakatupu a Leopoamo kae ko malosi a ia, ne tiaki ne ia te Tulafono a Ieova,+ kae ne ‵kau atu foki a tino Isalaelu katoa ki a ia. 2 I te lima tausaga o te pulega a te Tupu ko Leopoamo, ne vau a te tupu o Aikupito ko Sesaka+ o taua atu ki Ielusalema, me ne seki fakamaoni latou ki a Ieova. 3 E 1,200 ana kaliota, e toko 60,000 a tāgata faka‵tele solofanua, kae e se iloa te aofaki o tena kautau kolā ne o‵mai mo ia mai Aikupito​—ne tino Lipia, tino Sukimi mo tino Aitiope.+ 4 Ne fakatakavale ne ia a fakai o Iuta kolā ne puipui faka‵lei kae fakamuli loa, oko atu ei ki Ielusalema.

5 Ne fanatu a te pelofeta ko Semaia+ ki a Leopoamo mo pelenise o Iuta kolā ne maopoopo ki Ielusalema ona ko Sesaka, kae ne fai atu a ia ki a latou: “Konei a pati a Ieova ne fai mai, ‘Ko oti ne tiaki ne koutou au, tela la, ko tiaki foki ne au koutou+ ki lima o Sesaka.’” 6 Tenā ne loto mau‵lalo ei a pelenise o Isalaelu penā foki mo te tupu+ kae fai aka: “A Ieova e amiotonu.” 7 I te taimi ne lavea ei ne Ieova i a latou ko loto mau‵lalo, ne oko atu te fekau a Ieova ki a Semaia, ana muna: “Ko loto mau‵lalo latou. Ka se fakaseai ne au latou,+ kae i se taimi pili mai ka faka‵sao ne au latou. Ka se fakaoko atu toku kaitaua ki luga i Ielusalema e auala i a Sesaka. 8 Kae ka fai latou mo fai ana tavini, ko te mea ke iloa ne latou te ‵kese o te tavini mai ki a au mo te tavini atu ki tupu* o nisi fenua.”

9 Tenā ne vau ei te tupu o Aikupito ko Sesaka o taua atu ki Ielusalema. Ne puke ne ia a koloa o te fale o Ieova+ mo koloa o te fale* o te tupu. Ne puke ne ia a mea katoa, e aofia i ei a talita aulo kolā ne faite ne Solomona.+ 10 Tenā ne faite ei ne te Tupu ko Leopoamo a talita kopa ke sui ei a mea konā, kae tuku atu ne ia ki pule o leoleo, kolā e leoleo i te mataloa o te fale o te tupu. 11 So se taimi e vau ei te tupu ki te fale o Ieova, e o‵mai a leoleo ki loto kae sau ne latou a mea konā, ka oti ko faka‵foki ei ne latou a mea konā ki te potu o leoleo. 12 Ona ko te tupu ne loto maulalo, ne galo ei te kaitaua o Ieova ki a ia,+ kae ne seki fakamasei katoatoa ne ia latou.+ E se gata i ei, e isi eiloa ne mea ‵lei ne maua atu i Iuta.+

13 Ne fakamalosi aka ne te Tupu ko Leopoamo tena tulaga i Ielusalema kae tumau loa i te pule atu; ko 41 tausaga o Leopoamo i te taimi ne fai ei a ia mo tupu, kae ne pule a ia i tausaga e 17 i Ielusalema, ko te fakai ne filifili ne Ieova mai matakāiga katoa o Isalaelu mo fai te koga e tuku i ei tena igoa. A te igoa o te mātua o te tupu, ko Naama te fafine Amoni.+ 14 Kae ne fai ne tou tagata a mea ma‵sei, me ne seki fakaiku ne ia i tena loto ke ‵sala atu ki a Ieova.+

15 A te tala fakasolopito o Leopoamo, mai te kamataga ke oko ki te fakaotiga, e a, e se tusi katoa i tusi a te pelofeta ko Semaia+ mo Ito+ te tino fakamatala fakaasiga i te tusi o te fakasologa o gafa? Kae ne isi faeloa ne taua i te va o Leopoamo mo Ielopoamo.+ 16 Tenā ne takato ifo ei a Leopoamo o malō‵lo fakatasi mo ana tupuga kae ne tanu i te Fakai o Tavita;+ kae ko tena tama ko Avia+ ne fai mo tupu e sui ei a ia.