Te Lua Nofoaiga Tupu

25 Ko 25 a tausaga o Amasia i te taimi ne fai ei a ia mo tupu, kae ne pule a ia i Ielusalema i tausaga e 29. A te igoa o tena mātua ko Ieoatina mai i Ielusalema.+ 2 Ne tumau a ia i te faiga o te mea tonu i te kilokiloga a Ieova, kae e seki fai ne ia mo te loto kātoa. 3 I te taimi eiloa ko ‵mautakitaki ei a tena pulega i te malo, ne tamate ne ia ana tavini kolā ne tamate ne latou tena tamana te tupu.+ 4 Kae ne seki tamate ne ia olotou tama tāgata, me ne fai ne ia a mea kolā e tusi i te Tulafono, i te tusi a Mose, telā ne fakatonu mai ne Ieova: “E se ‵tau o ‵mate a tamana ona ko olotou tama tāgata, kae e se ‵tau o ‵mate a tama tāgata ona ko olotou tamana; kae e ‵tau eiloa o ‵mate a tino taki tokotasi ona ko olotou agasala totino.”+

5 Ne fakamaopoopo ne Amasia a Iuta kātoa kae fai ne ia ke ‵tu e ‵tusa eiloa mo kāiga i olotou tamana, i tafa o takitaki o taki tokoafe kae i tafa o takitaki o taki tokoselau o Iuta kātoa mo Peniamina.+ Ne fakamau ne ia olotou igoa mai te 20 tausaga o fano ki luga,+ kae ne maua aka ne ia me e toko 300,000 toa ‵mafi kolā ne akoako* faka‵lei i te faiga o taua, kae e mafai o fakaaoga te tao mo te talita lasi. 6 E se gata i ei, ne ‵togi ne ia mai Isalaelu a te toko 100,000 toa ‵mafi ki te 100 taleni* siliva. 7 Kae ne vau se tagata o te Atua tonu ki a ia, ana muna: “Te tupu, sa avegina te kautau a Isalaelu ke olo mo koe, me i a Ieova e se ‵kau fakatasi ki Isalaelu,+ e se ‵kau fakatasi ki so se tino Efalaima. 8 Kae fano tokotasi koe, gasuesue, kae loto malosi i te taua. Kafai e se fai koe penā, e mafai ne te Atua o fai koe ke pakū i mua o tou fili, me e isi se malosi i te Atua o fesoasoani+ kae fai foki ke pakū se tino.” 9 Kae ne fai atu a Amasia ki te tagata o te Atua tonu: “Kae e fai pefea a te 100 taleni telā ne tuku atu ne au ki te kautau a Isalaelu?” Ne tali atu a te tagata o te Atua tonu: “E mafai fua ne Ieova o tuku atu ki a koe a mea e uke atu i mea konā.”+ 10 Tenā ne faka‵foki ei ne Amasia a kautau kolā ne o‵mai ki a ia mai Efalaima, kae fai ke ‵foki ki koga ne o‵mai ei latou. Ne kaitāua malosi latou ki Iuta, kae ne ‵foki latou ki olotou koga ‵nofo kae ko oko eiloa i te kaitāua.

11 Tenā ne fakamalosi ei ne Amasia tena loto kae takitaki ne ia ana kautau ki te Vanu o Masima,+ kae ne ‵ta ne ia a tāgata Seila e toko 10,000.+ 12 Kae ne puke ne tāgata o Iuta a te toko 10,000. Ne avaka a latou ki te taulu o te kaupapa kae ‵pei ifo latou mai te taulu o te kaupapa, kae maluku‵luku valevale a latou katoa. 13 Kae ko tino o te kautau kolā ne faka‵foki ne Amasia ke se olo mo ia i te taua+ ne olo o taua atu ki fakai o Iuta, mai Samalia+ ke oko ki Peta-holono;+ ne ‵ta ne latou e toko 3,000 kae puke ne latou a mea e uke ne maua i te taua.

14 Kae i te fokimaiga a Amasia mai te tamatega o tino Etoma, ne aumai ne ia a atua o tāgata Seila kae faka‵tu ne ia ke fai mo fai ana atua,+ kae ne kamata a ia o ifo ki a latou kae fai ke fanaka te au mai taulaga konā. 15 Ne kaitaua malosi a Ieova ki a Amasia kae uga atu ne ia se pelofeta ke fai atu ki a ia: “Kaia e tautali ei koe i tua o atua o tino kolā ne seki mafai o faka‵sao ne latou olotou tino mai i ou lima?”+ 16 I te taimi ne faipati atu ei a ia, ne fai atu a te tupu: “E a, ne fakasopo ne matou a koe ke fai pelā me se tino fakatonutonu a te tupu?+ Ko lava!+ Kaia fua la ka tamate ei ne latou a koe?” Tenā ne seki toe faipati ei te pelofeta, kae ne fai atu: “E iloa ne au me ko oti ne fakaiku aka ne te Atua ke fakamasei a koe, ona ko te mea tenei ne fai ne koe kae seki fakalogo koe ki aku pati fakatonutonu.”+

17 I te otiga ne fai‵pati mo ana tino fakatonutonu, ne avatu te fekau a te tupu o Iuta ko Amasia ki a Ioasa te tama tagata a Ioasasa te tama tagata a Ieu te tupu o Isalaelu, ana muna: “Vau! Ke taua aka tāua.”*+ 18 Ne avatu ne te tupu o Isalaelu ko Ioasa a te fekau tenei ki te tupu o Iuta ko Amasia: “A te mouku talatala o Lepanona ne avatu tena fekau ki te alasi o Lepanona, ‘Tuku mai tau tama fafine mo fai te avaga a taku tama tagata.’ Kae ne vau se manu fekai o Lepanona kae lakalaka ne ia ki lalo a te mouku talatala. 19 Ne fai atu koe, ‘Kiloke! Ko oti ne ta ne au* a Etoma.’+ Tela la, ko ‵fonu tou loto i te fia sili, kae manako ke fakamaluga aka koe. Kae nei la, nofo eiloa i tou fale.* Kaia e fakamāfua ei ne koe se fakalavelave telā ka takavale ei koe, kae fai ei ke pakū a Iuta fakatasi mo koe?”

20 Kae ko Amasia ne seki fakalogo,+ me ne fai eiloa ne te Atua tonu a te mea tenei ke tuku atu latou ki lima o te fili,+ ona ko te lotou tau‵tali i atua o Etoma.+ 21 Tenā ne fanaka ei a te tupu o Isalaelu ko Ioasa, kae ne fe‵paki lāua mo te tupu o Iuta ko Amasia i te taua i Peta-semese+ i Iuta. 22 Ne fakatakavale a Iuta ne Isalaelu, tenā ne ‵tele kea‵tea ei a tino taki tokotasi ki olotou fale.* 23 Ne puke fakapagota ne te tupu o Isalaelu ko Ioasa a te tupu o Iuta ko Amasia, te tama tagata a Ioasa te tama tagata a Ioasasa,* i Peta-semese. Tenā ne aumai ei ne ia tou tagata ki Ielusalema kae ne ofa ne ia te ‵pui o Ielusalema i se 400 kupita* mai te Mataloa o Efalaima+ ke oko ki te Mataloa o Matulimanu.+ 24 Ne puke ne ia a aulo mo siliva katoa mo mea katoa kolā ne maua i loto i te fale o te Atua tonu fakatasi* mo Opeta-etoma mo potu ‵teu koloa i te fale* o te tupu,+ e pelā foki mo tino kolā ne puke fakapagota. Tenā ne toe foki ei a ia ki Samalia.

25 Amasia+ te tama tagata a Ioasa te tupu o Iuta ne ola i tausaga e 15 mai tua o te mate o Ioasa te tama tagata a Ioasasa+ te tupu o Isalaelu.+ 26 Kae ko te tala fakasolopito kātoa o Amasia, mai te kamataga ke oko ki te fakaotiga, kiloke! e a, e se tusi i te Tusi o Tupu o Iuta mo Isalaelu? 27 I te taimi ne ‵fuli ei kea‵tea a Amasia mai te tautali atu i a Ieova, ne fai ne latou se togafiti+ ke ‵teke atu ki a ia i Ielusalema, kae ne tele a ia ki Lakisa, kae ne uga atu ne latou ne tāgata i ana tua ki Lakisa o tamate a ia i konā. 28 Tenā ne fakafoki ei ne latou a ia i luga i solofanua kae tanu fakatasi mo ana tupuga i te fakai o Iuta.