Neemia

4 I te taimi eiloa ne logo ei a Sanipalata+ me ko toe faite ne matou a te ‵pui, ne kaitaua a ia kae fanoanoa malosi, kae ne fakaitaita atu faeloa a ia ki tino Iutaia. 2 Kae ne fai atu a ia i mua o ana taina mo te kautau a Samalia: “Ne a mea e fai ne tino Iutaia kolā e vāi‵vai fua? E a, ka fai eiloa ne latou te mea tenei i a latou eiloa? E a, ka ofo atu ne latou a taulaga? E a, ka palele te lotou mea e fai i se aso e tasi? E a, ka fakaaoga ne latou a fatu kolā ne ‵paku mai te faka‵tuga kaiga?”+

3 A Tovia+ te tino Amoni+ telā e tu i ana tafa ne fai aka: “Kafai foki e kake aka se alope ki luga i te lotou mea tenā e faite, ka ofa eiloa ne ia ki lalo a te ‵pui fatu a latou.”

4 Fakalogo mai e te motou Atua, me i a matou ko faimaseigina,+ kae toe faka‵foki atu ki luga i olotou ulu olotou pati fakamasiasi,+ kae tuku atu latou e pelā me ne tino kolā ne kaisoa olotou mea i se fenua telā ne ave fakapagota latou ki ei. 5 Kae ke mo a ma sē saga atu koe ki olotou mea ‵se io me ‵solo kea‵tea ne koe olotou agasala mai i ou mua,+ me ne fakaitaita ne latou a tino ga‵lue.

6 Ne tumau eiloa matou i te faitega o te ‵pui, kae ne soko a te ‵pui kātoa kae toe faite aka ki luga ke oko ki te āfa, kae ko tino ne tuku eiloa olotou loto ki te faiga o te galuega.

7 I te taimi eiloa ne ‵logo ei a Sanipalata, Tovia,+ tino Alapi,+ tino Amoni mo tino Asetota+ i te gasolo ki mua o te toe faka‵leiga o te ‵pui o Ielusalema mo pūga i te ‵pui ko oti ne pono, ne kaitaua malosi latou. 8 Ne fai‵pati fakatasi latou ke o‵mai o taua ki Ielusalema kae ke fakatupu se fakalavelave i ei. 9 Kae ne ‵talo atu matou ki te motou Atua kae fakatu se leoleo ke puipui matou mai i a latou i te ao mo te po.

10 Kae ne fai aka a tino Iuta: “Ko gasolo ifo eiloa te malosi o tino ga‵lue, kae ko oko eiloa i te uke o kaiga; e se mafai eiloa ne tatou o faite a te ‵pui.”

11 Kae ne fai mai faeloa omotou fili: “Koi tuai o iloa io me lavea ne latou a tatou, ka olo atu eiloa tatou ki loto i a latou o tamate latou kae taofi aka te galuega.”

12 So se taimi e ulu mai ei ki loto a tino Iutaia kolā e ‵nofo ‵pili mai, e fai mai faeloa* a latou ki a matou: “Ka o‵mai latou o taua mai ki a tatou mai koga katoa.”

13 Ne faka‵tu ne au a tāgata i toe koga ma‵lalo o te ‵pui mai tua o koga ateatea, kae ne faka‵tu ne au latou i olotou kāiga fakatasi mo olotou pelu, olotou tao mo olotou kausana. 14 I te taimi ne lavea ei ne au te lotou ma‵taku, ne tu fakavave au ki luga kae fai atu ki tino tāua+ mo sui pule mo te ‵toega o tino: “Sa ma‵taku i a latou.+ Ke masaua a Ieova telā e sili kae fakaofoofogia;+ kae taua atu mō otou taina, otou tama tāgata mo otou tama fāfine, otou avaga mo otou fale.”

15 I te ‵logoga o omotou fili me ko iloa ne matou te lotou mea e fai kae ko fakalavelave ne te Atua tonu olotou palani, ne ‵foki katoa matou o faite te ‵pui. 16 Mai te aso tenā o fano ki mua, e fai ne te āfa o aku tāgata a te galuega+ kae ko te suā āfa e puke i tao, talita, kausana mo gatu tau fiti. Kae e ‵tu atu a pelenise+ mai tua o tino Iutaia o ‵lago atu ki a latou 17 kolā e faite te ‵pui. A latou kolā e tali a mea e fai ne latou te galuega ki te lima e tasi kae ko te suā lima e puke i te meatau. 18 Kae ko tino ga‵lue taki tokotasi e isi se pelu e ‵sai ki tena tega i te taimi e galue ei, kae ko te tino e ili ne ia te pu+ e tu i oku tafa.

19 Tenā ne fai atu ei au ki tino tāua mo sui pule mo te ‵toega o tino: “Ko oko eiloa i te lasi mo te uke o galuega e ‵tau o fai, kae ko tō va ‵mao a koga e ga‵lue ei tatou i luga i te ‵pui. 20 Kafai e lagona ne koutou te tagi o te pu, ke maopoopo fakatasi ki te koga e ‵nofo ei matou. A te ‵tou Atua ka taua mō tatou.”+

21 Ne ga‵lue faeloa matou kae ko te suā āfa e puke i tao, mai te vaveao ‵malu ke oko ki te taimi e ‵sae aka ei a fetū. 22 I te taimi tenā ne fai atu au ki tino: “Fai ke ‵nofo a tāgata katoa fakatasi mo olotou tavini fesoasoani i Ielusalema i te po nei, kae ka leoleo ne latou tatou i te po kae ga‵lue i te ao.” 23 Kae pelā mo au mo oku taina, aku tavini fesoasoani+ mo leoleo kolā ne tau‵tali mai i a au, e seai eiloa se tino i a matou ne tapale ana gatu, kae ne puke eiloa ne matou taki tokotasi a omotou meatau i omotou lima fakaatamai.