Neemia

5 Kae ne fa‵meo malosi a tino mo olotou avaga e uiga ki olotou taina Iutaia.+ 2 Ne fai mai a nisi tino: “A matou e tokouke fakatasi mo omotou tama tāgata mo tama fāfine. E ‵tau o maua ne matou a saito ke ‵kai ki ei ko matou ke ola.” 3 Kae ne fai mai a nisi tino: “Ko tuku fakafeagaiga atu ne matou omotou manafa mo togavine mo omotou fale ke mafai o maua ne saito i te taimi o te oge.” 4 Kae ne toe fai mai a nisi tino: “A matou ne kaitalafu tupe mo fai te meaalofa ki te tupu kae ke ‵togi ki omotou manafa mo omotou togavine.+ 5 A matou mo omotou taina se foitino mo te toto e tasi,* kae e ‵pau eiloa omotou tama‵liki mo olotou tama‵liki; kae nei a omotou tama tāgata mo tama fāfine ko tuku atu e pelā me ne pologa, kae ko nisi tama fāfine a matou ko fai nei e pelā me ne pologa.+ Kae e seai se omotou malosi o taofi aka te mea tenei, me ko oti ne tuku atu a omotou manafa mo togavine ma nisi tino.”

6 Ne kaitaua malosi au i taku logoga i olotou fameo mo pati konei. 7 Ne mafaufau ‵loto au ki mea konei kae ne seki fiafia au ki tino tāua mo sui pule kae fai atu au ki a latou: “E ma‵nako koutou katoa ke maua mai ne tupe silia mai otou taina.”+

E se gata i ei, ne fakatoka ne au ke fai se fono ona ko latou. 8 Kae ne fai atu au ki a latou: “Mai te mea ne mafai ne matou o fai, ne ‵togi mai ne matou a ‵tou taina Iutaia kolā ne fakatau atu ki nisi atufenua; kae nei ko toe fakatau atu ne koutou otou taina,+ kae e a, ka fakatau mai ne koutou a latou ki a matou?” Tenā ne ‵nofo ‵mu ei latou me ko se iloa ne latou o fai se pati. 9 Tenā ne fai atu ei au: “A te mea e fai ne koutou e se ‵lei. E a, e se ‵tau mo koutou o sa‵sale mo te ma‵taku ki te Atua+ ko te mea ke se fakatauemu tatou ne nisi atufenua kolā ko ‵tou fili? 10 E se gata i ei, e tuku fakakaitalafu atu ne au mo oku taina mo aku tavini fesoasoani a tupe mo saito ki a latou. Fakamolemole, na fakagata ne tatou a te tuku fakakaitalafu atu o tupe ki a latou.+ 11 Fakamolemole, ke na faka‵foki atu ki a latou i te aso nei olotou manafa,+ olotou togavine, olotou togaolive mo olotou fale, e pelā foki mo te tasi-vae-selau* o olotou tupe, saito, te uaina fou mo sinu kolā ne ma‵nako koutou ki ei mai i a latou.”

12 Kae ne fai mai latou e uiga ki te mea tenei: “Ka toe faka‵foki ne matou a mea konei ki a latou kae ka se fakamolemole atu ki se mea mai i a latou. Ka fai eiloa ne matou a te mea ne fai mai ne koe.” Tenā ne kalaga atu ei au ki faitaulaga kae fai ke tau‵to a tāgata konā ke tausi ki te tautoga tenei. 13 Ne lūlū foki ne au a te ‵fetuga o toku gatu* kae fai atu: “Ke lūlū ne te Atua mai tena fale mo ana kope i te auala eiloa tenei a tāgata katoa kolā e se tausi ki te tautoga tenei, kae i te auala foki tenei ka lūlū ei a ia kae fai ke seai ne ana mea.” Ne fai atu te fakapotopotoga kātoa: “Amene!”* Kae ‵viki atu latou ki a Ieova, kae ne fai eiloa ne tino a te mea ne tau‵to latou ki ei.

14 E se gata i ei, mai te aso ne fakasopo aka ei ne ia au ke fai mo olotou kovana+ i te fenua ko Iuta, mai te 20 tausaga+ ki te 32 tausaga+ o te pulega a te Tupu ko Aletaseta,+ e 12 tausaga, ne seki kai eiloa au io me ko oku taina ki meakai kolā e ‵tau o avatu ki te kovana.+ 15 Kae ko kovana mua kolā ne ‵tu mai mua atu i a au ne fakapuapuaga ne latou a tino kae puke faeloa ne latou mai i tino e 40 sekela* siliva mō ‵togi a falaoa mo uaina i aso takitasi. Ne pule fakasaua atu foki olotou tavini fesoasoani ki tino. Kae ne seki fai ne au te mea tenā+ ona ko te mataku ki te Atua.+

16 E se gata i ei, ne fesoasoani atu au ki te faiga o te galuega i te ‵pui, kae seai se manafa ne maua ne matou;+ ne maopoopo katoa aku tavini fesoasoani ki konā o fai te galuega. 17 E toko 150 a tino Iutaia mo sui pule ne ‵kai i taku taipola, fakatasi mo latou kolā ne o‵mai ki a matou mai nisi atufenua. 18 I aso katoa, ne fakatoka faeloa ma aku* a te pulumakau e tasi, e ono mamoe tafasili i te ‵lei mo manu eva, kae fakatasi i aso e sefulu e uke a uaina kese‵kese e tuku mai ki a matou. Kae faitalia a mea katoa konei, ne seki manako eiloa au ki meakai kolā e ‵tau o avatu ki te kovana, me ko oko eiloa i te ‵mafa o te galuega e fai ne tino. 19 Ke masaua faeloa ne koe au e toku Atua, ona ko mea katoa ne fai ne au mō tino konei.+