Neemia

6 I te taimi eiloa ne ‵logo ei a Sanipalata, Tovia,+ Gesemu te tino Alapi+ mo te ‵toega o omotou fili me ko oti ne toe faite ne au te ‵pui+ kae ko seai ne pūga e ‵toe i ei (e tiga eiloa e seki oti ne faka‵tu ne au a mataloa o te ‵pui i te taimi tenā),+ 2 ne aumai fakavave ne Sanipalata mo Gesemu te fekau tenei ki a au: “Vau aka, ke fakatoka ne tatou se taimi ke fetaui tatou i fakai fo‵liki o te Vanu Laugatasi o Ono.”+ Kae ko te mea a lāua ne fai se togafiti ke fakapakia au. 3 Ne uga atu ne au a avefekau ki a lāua kae fai atu: “E isi se galuega tāua tenei e fai ne au, kae ko se mafai ne au o fanatu. Kaia e taofi ei te galuega ko te mea ke fanatu fua au ki a koulua?” 4 E fakafa taimi ne aumai ei ne lāua te fekau eiloa tenā ki a au, kae e tasi eiloa taku tali ne fai atu ki a lāua i taimi katoa konā.

5 Tenā ne uga mai ei ne Sanipalata tena tavini fesoasoani mo te fekau eiloa tenā i te lima o taimi, fakatasi mo se tusi ko oti ne ‵tala i tena lima. 6 E tusi i loto i ei: “Ko oti ne ‵logo a atufenua katoa kae e fai mai foki a Gesemu+ me i a koe fakatasi foki mo tino Iutaia e taumafai o ‵teke mai.+ Tenā te pogai e faite ei ne koutou te ‵pui; kae e ‵tusa mo lipoti konei ka fai eiloa koe mo fai te lotou tupu. 7 Ko oti foki ne faka‵sopo aka ne koe ne pelofeta ke folafola atu ne latou a mea e uiga ki a koe i loto i Ielusalema kātoa, ‘Ko isi se tupu o Iuta!’ Ka logo eiloa te tupu i mea konei. Tela la, vau ke fai‵pati fakatasi tatou ki te mea tenei.”

8 Kae ne avatu ne au te tali tenei ki a ia: “E seai eiloa se mea i mea konā ne fai mai ne koe ne ‵tupu; a mea konā ne mea fua ne ‵fatu ne koe i tou mafaufau.”* 9 Ne taumafai a latou katoa o fakamatakutaku mai ki a matou, olotou muna: “Ka vāi‵vai eiloa olotou lima i te faiga o te galuega, ko te mea eiloa ko se oti.”+ Nei la, au e ‵talo ke fakama‵losi aka oku lima.+

10 Tenā ne fanatu ei au ki te fale o Semaia te tama tagata a Telaia te tama tagata a Metapelu telā e tausi i konā. Ana muna: “Ke fakatoka ne tāua se taimi ke fetaui i te fale o te Atua tonu, i loto i te faletapu, kae ‵pono ne tāua a mataloa o te faletapu, me ka o‵mai latou o tamate koe. Ka o‵mai latou o tamate koe i te po.” 11 Kae ne fai atu au: “E a, e ‵tau o tele kea‵tea se tagata penei mo au? E mafai o ulu atu se tagata penei mo au ki loto i te faletapu kae ola?+ Ka se ulu atu eiloa au ki loto i ei!” 12 Tenā ne iloa ei ne au me ne seki uga mai a ia ne te Atua, kae ne ‵togi tupe a ia ne Tovia mo Sanipalata+ ke fai ne ia te valoaga tenei o ‵teke mai ki a au. 13 Ne ‵togi tupe a ia ke fakamatakutaku au kae fai au ke agasala, ko te mea ke isi se fakamasakoga a latou o fakamasei toku igoa ko te mea ke fakamasiasi ei au.

14 Toku Atua, ke masaua ne koe a Tovia+ mo Sanipalata mo mea katoa konei, e pelā foki mo Noatia te pelofeta fafine mo te ‵toega o pelofeta kolā e taumafai faeloa o fakamatakutaku au.

15 Ne palele te ‵pui i te po 25 o Elula,* i aso e 52.

16 I te taimi eiloa ne ‵logo ei omotou fili katoa i te mea tenei kae lavea foki ne atufenua katoa i omotou tafa, ne masiasi eiloa latou,+ kae ne iloa aka ne latou me ne fesoasoani mai a te motou Atua ke fakaoti te faiga o te galuega tenei. 17 I aso konā, e uke a tusi a tino tāua+ o Iuta ne ave ki a Tovia, kae tali mai ne Tovia olotou tusi. 18 E tokouke a tino i Iuta ne fai olotou tautoga ki a ia, me i a ia ko te avaga a te tama fafine a Sekania te tama tagata a Alaka,+ kae ko tena tama tagata ko Ieoananu ne avaga mo te tama fafine a Mesulama+ te tama tagata a Pelekia. 19 E masani foki o fakailoa mai ne latou ki a au a mea ‵lei e uiga ki tou tagata kae fakailoa atu ne latou aku pati ki a ia. Tenā ko aumai ei ne Tovia a tusi o fakamatakutaku au.+