Eseta

2 I te otiga o mea konei, i te taimi ko se kaitaua ei te Tupu ko Asuelu,+ ne masaua ne ia a mea ne fai+ ne Vasati mo te ikuga ko oti ne fai ki tou fafine.+ 2 Tenā ne fai atu ei a tavini fesoasoani a te tupu: “E ‵tau o ‵sala mai ne tamafine tino‵gali ma te tupu. 3 Kae e ‵tau o fili aka ne te tupu ne komisina i kogā fenua katoa o tena pulega+ ke fakamaopoopo mai ne latou a tamafine tino‵gali katoa o Susana* te taoa malosi,* ki te fale o fāfine. Ka tausi latou ne Hegai+ te eunuka a te tupu mo te tausi o fāfine, kae e ‵tau o teu fakagali‵gali latou.* 4 Kae ko te tamafine telā e fiafia malosi ki ei te tupu ka fai mo tupu fafine e sui ei a Vasati.”+ Ne fiafia a te tupu ki te manatu tenā, kae tenā loa te mea ne fai ne ia.

5 E isi se tagata Iutaia i Susana*+ te taoa malosi* a tena igoa ko Moletekai+ te tama tagata a Iaila te tama tagata a Simei te tama tagata a Kiso, se tino Peniamina,+ 6 telā ne ave fakapagota mai Ielusalema mo tino kolā ne ave fakatasi mo te tupu o Iuta ko Iekonia,*+ kolā ne puke fakapagota ne Nepukanesa ki Papelonia. 7 Ko ia te tausi o Hatesa* telā ko Eseta, te tama fafine a te taina o tena tamana,+ me ko seai sena tamana mo tena mātua. A te tamafine tenei e tinogali kae taulekaleka, kae i te taimi ne ‵mate ei a tena tamana mo tena mātua, ne puke a ia ne Moletekai e pelā eiloa me se tama fafine a ia. 8 I te taimi ne faka‵pula atu ei a pati a te tupu mo tena tulafono kae i te taimi ne aumai ei a tamafine e tokouke ki Susana* te taoa malosi* mai lalo i te tausiga a Hegai,+ ne avatu foki a Eseta ki te fale* o te tupu mai lalo i te tausiga a Hegai te tausi o fāfine.

9 Ne fiafia tou tagata ki te tamafine tenā kae talia ne ia,* tenā ne fai fakavave ne ia a fakatokaga ke teuteu fakagaligali*+ a ia kae fagai faka‵lei, kae ne ‵tofi aka ne ia e tokofitu fāfine mai te fale o te tupu ke tavini ki a ia. Ne ave foki ne ia a tou fafine mo ana tavini fesoasoani ki te ‵toe koga ‵lei o te fale o fāfine. 10 E seai loa se pati a Eseta ne fai e uiga ki ana tino+ io me ko ana kāiga, me ne fakatonu atu a Moletekai+ ki a ia ke se fai eiloa ki se tino.+ 11 I aso katoa, e fanatu sāle a Moletekai o sasale i mua o te koga ateatea o te fale o fāfine ke iloa ne ia me e a mai a Eseta kae ne a foki a mea e ‵tupu ki a ia.

12 E isi eiloa ne taimi o tamafine taki tokotasi ke olo atu ki te Tupu ko Asuelu mai tua o masina e 12 e fai ei a teuteuga fakagaligali o fāfine, me tenei te faifaiga e fai ke teuteu fakagali‵gali a latou—e ono masina e milimili ei ki te sinu o te mulo+ kae ono masina e milimili ki te sinu pasama+ mo nisi sinu aka ke teuteu fakagali‵gali ei latou. 13 Tenā ko toka ei a te tamafine o fanatu ki te tupu, kae ko so se mea e manako a ia ki ei e tuku atu eiloa ki tou fafine māfai ko fanatu a ia mai te fale o fāfine ki te fale o te tupu. 14 E fanatu a ia i te afiafi ki loto, kae i te tafataeao ko foki tou fafine ki te lua o fale o fāfine, mai lalo i te tausiga a Sasakasa te eunuka+ a te tupu, te tausi o avaga fakasalasala. E se mafai o toe foki atu a ia ki te tupu seiloga ke fiafia te tupu ki a ia kae taku mai tena igoa ke fanatu.+

15 Kae i te okoga ki te taimi o Eseta te tama fafine a Apihaila te fakatamana o Moletekai, telā ne puke ne ia tou fafine e pelā eiloa me se tama fafine a ia,+ ke fanatu ki te tupu, e seai se mea ne manako a ia ki ei kae na ko te mea fua telā ne fai atu ne Hegai, te eunuka a te tupu, te tausi o fāfine. (I taimi katoa konā, ne fia‵fia eiloa a tino katoa kolā ne lavea ne latou a Eseta.) 16 Ne ave a Eseta ki te Tupu ko Asuelu i tena fale i te sefulu o masina, telā ko te masina o Tepete,* i te fitu o tausaga+ o tena pulega. 17 Kae ko te tupu ne alofa malosi ki a Eseta i lō nisi fāfine, kae ne fiafia malosi a ia ki tou fafine kae talia ne ia a tou fafine i lō nisi tamafine aka. Tenā ne tuku ei ne ia te kalauna fakatupu ki te ulu o tou fafine kae fai ne ia tou fafine mo fai te tupu fafine+ i lō Vasati.+ 18 Kae ne fai ne te tupu se ‵kaiga lasi ki ana pelenise katoa mo ana tavini, ko te ‵kaiga ki a Eseta. Tenā ne fakailoa atu ei ne ia te fakasaolotoga mō kogā fenua katoa, kae avatu faeloa ne ia a meaalofa e ‵tusa mo mea e maua ne te tupu.

19 I te taimi ne fakamaopoopo fakatasi mai ei a tamafine+ i te lua o taimi, a Moletekai e sagasaga i te mataloa o te palesi o te tupu. 20 E seai loa se pati a Eseta ne fai e uiga ki ana kāiga mo ana tino,+ e pelā eiloa mo te fakatonuga a Moletekai ki a ia; ne fai faeloa ne Eseta a mea ne fai atu ne Moletekai ki a ia, e pelā eiloa mo te taimi ne nofo ei a ia mai lalo i tena tausiga.+

21 I aso konā i te taimi e sagasaga ei a Moletekai i te mataloa o te palesi o te tupu, ne kaitaua a Pikitana mo Telesa, ko ofisa e tokolua a te tupu, ne tino tausi mataloa, kae taumafai o fai se togafiti ke tamate a te Tupu ko Asuelu. 22 Ne iloa ne Moletekai te mea tenei kae fakailoa fakavave atu ne ia ki te Tupu Fafine ko Eseta. Tenā ne faipati atu ei a Eseta ki te tupu i te igoa o Moletekai. 23 Ne fai se sukesukega ki te mea tenā kae iloa aka fakamuli me se mea tonu, tenā ne fakatau‵tau ei a tāgata e tokolua konā i luga i se pou; kae ne fakamau a tala katoa konei i te tusi o tala fakasolopito o taimi konā i mua o te tupu.+