Iopu
32 Tenā ne fakagata ei ne tāgata e tokotolu konei olotou taumafaiga o tali atu ki a Iopu, me e talitonu eiloa a ia ki tena amiotonu.*+ 2 Kae ko Eliu te tama tagata a Palakelu te tino Pusa+ mai te kāiga o Alama ne kaitaua malosi. Ne kaitaua malosi a ia ki a Iopu ona ko ana taumafaiga ke fakamaoni aka i a ia e tonu atu i lō te Atua.+ 3 Ne kaitaua malosi foki a ia ki taugasoa e tokotolu o Iopu me seki ai se tali ne mafai o fai atu ne latou kae ne taku ne latou a te Atua se tino masei.+ 4 Ne fakatalitali eiloa a Eliu ke tali atu ki a Iopu, me i a latou e ma‵tua atu i a ia.+ 5 I te laveaga ne Eliu me ko seai se tali e mafai o fai mai ne tāgata e tokotolu konā, ne gasolo aka eiloa o lasi tena kaitaua. 6 Tenā ne kamata ei a Eliu te tama tagata a Palakelu te tino Pusa o faipati, ana muna:
Tela la, ne fakatalitali eiloa au mo te āva,+
Kae ne seki fai atu ne au ki a koutou aku mea e iloa.
7 Ne mafaufau aka au, ‘Tuku ei ke fai‵pati a tino ma‵tua,
Kae ke folafola ne latou kolā ko uke olotou tausaga a te poto.’
8 Kae ko te agaga tapu eiloa telā i loto i tino,
Ko te mānava o te Atua Malosi Katoatoa, ne tuku atu ne ia te malamalama ki a latou.+
9 E se ko tausaga o te tino* e fai ne ia ke poto se tino,
Io me ko tāgata ma‵tua fua e malama‵lama i te mea tonu.+
10 Tela la, au e fai atu, ‘Faka‵logo mai ki a au,
Kae ka fai atu foki ne au ki a koutou aku mea e iloa.’
11 Kiloke! Au ne fakatalitali eiloa ki otou pati;
Ne fakalogologo eiloa au ki otou fakasakosakoga+
I te taimi ne ‵sala ei koutou ki mea ke fai atu.+
12 Au ne saga tonu eiloa ki a koutou,
Kae seai se tino i a koutou ne mafai o fakamaoni aka ne ia i a Iopu e ‵se*
Io me tali atu ki ana kinauga.
13 Tela la, ke mo a ma fai aka, ‘Ko oti ne maua ne matou te poto;
Ko te Atua eiloa e faka‵se ne ia a tou tagata, kae e se ko te tagata.’
14 Ne seki fai ne ia ana pati ki a au,
Tela la, ka se tali atu au ki a ia mai te fakaaogaga o otou kinauga.
15 Ko fanoa‵noa latou, ko seai ne olotou nisi tali;
Ko seai foki ne olotou pati ke fai atu.
16 Ne faka‵tali au, kae ko latou ne seki toe fai‵pati;
E ‵tu fua latou i konā, e aunoa mo se tali.
17 Tela la, ka tuku atu foki ne au se tali;
Ka fai atu foki ne au ki a koe aku mea e iloa,
18 Me i a au ko ‵fonu i pati;
A te agaga tapu i loto i a au ko fakamalosi ne ia au.
19 A toku foitino i loto ko pelā me se uaina telā e seai se auala o te ea i ei,
20 Tuku mai au ke faipati ko te mea ke maua ne au se fakatapūga!
Ka ‵tala ne au oku laugutu kae tuku atu se tali.
21 Ka se fakaasi atu ne au te fakailoga tino ki se tino;+
Io me tavae fakaloiloi ne au se tino,
22 Me e se iloa ne au o tavae fakaloiloi se tino;
Kafai e fai au penā, ka tamate fakavave au ne te Tino ne faite ne ia au.