Iopu

 2 Me i te ita ka tamate ne ia te tino valea,

Kae ko te kaisano ka tamate ne ia te tino faka‵segofie.

 3 Ko oti ne lavea ne au te tino valea e ola ‵lei,

Kae poi aka ko fakamalaia te koga e nofo ei a ia.

 4 Ana tama tāgata e ‵mao ‵ki mai te saogalemu,

Kae ko tuki palapala latou i te mataloa o te ‵pui o te fakai,+ kae seai se tino ke faka‵sao latou.

 5 A te tino fiakai e kai ki mea ne tau ne tou tagata,

Kolā ne tau mai i lakau tala‵tala,

Kae ko olotou kope ne ‵fao mai i a latou.

 6 Me i mea fakalogo‵mae e se ‵somo aka mai te ‵pefu,

Kae ko fakalavelave e se ‵tupu aka mai te laukele.

 7 Me i te tagata ne fanau mai eiloa mō fakalavelave,

E pelā mo kalokaloafi kolā e eva aka ki luga.

 8 Kae ko au ka fai taku tagi ki te Atua,

Kae avatu ki te Atua a taku tagi tenei,

 9 Ki te Atua telā e fai ne ia a mea ‵sili kae e se mafai o malamalama i ei,

Ko mea fakaofoofogia e se mafai o lau.

10 E tuku mai ne ia a vaiua ki te lalolagi

Kae avatu a vai ki fatoaga.

11 E avaka ne ia te tino malalo ki luga,

Kae avaka ne ia te tino mafatia ki te fakaolataga.

12 E fakalavelave ne ia a togafiti a tino faitogafiti,

Ko te mea ke se iku manuia a galuega e fai ne olotou lima.

13 E ‵po aka ne ia a tino ‵poto i olotou togafiti eiloa,+

Ko te mea ke fakamakosu aka i ei a palani a tino ata‵mai.

14 E fetaui latou mo te pouliga i te ao,

Kae e ‵sala malosi latou ki mea i te tutonu e pelā eiloa me se po.

15 E faka‵sao ne ia latou mai i te pelu o olotou gutu,

Kae fakasao a te tino mativa mai te lima o te tino malosi,

16 Ko te mea ke isi se fakamoemoega o te tino malalo,

Kae ke ‵pono aka a te gutu o te tino sē amiotonu.

17 Kiloke! Ke fiafia te tagata e polopoloki ne te Atua;

Tela la, sa ‵teke a akoakoga a te Atua Malosi Katoatoa!

18 Me e fai ne ia ke logo‵mae, kae fusi ne ia te pakiaga;

E ofa ne ia, kae toe faka‵lei eiloa ki ana lima.

19 Ka fakasao ne ia koe mai i fakalavelave e ono,

Ke oko foki ki te fitu, ka se pakia koe i ei.

20 I te taimi o te oge ka fakasao ne ia koe mai te mate,

Kae mai te malosi o te pelu i te taimi o te taua.

21 Ka puipui koe mai te gutu e fai ne ia a pati matagā,+

Kae ka se mataku koe ki te fakamaseiga māfai ko oko mai.

22 Ka kata koe ki te fakamaseiga mo te fiakai,

Kae ka se mataku koe ki manu fe‵kai o te lalolagi.

23 Me i fatu o te vao ka se fakalogo‵mae ne latou koe,*

Kae ko manu fe‵kai o te vao ka fealofani mo koe.

24 Ka iloa ne koe me i tou faleie e puipui faka‵lei,*

Kae ka seai se mea e galo māfai ko iloilo ne koe ou laukele moukuā.

25 Ka maua ne koe a tama‵liki e tokouke,

Kae ko tino e ‵tupu mai i a koe ka tokouke e pelā eiloa mo lakau kaina o te lalolagi.

26 A koe koi malosi eiloa māfai ko fano koe ki te tanuga,

E pelā mo fusiga saito kolā ko ‵sai tasi i te taimi e ‵kati ei.