Esekielu

22 Kae ne toe oko mai te fekau a Ieova ki a au, ana muna: 2 “E pelā mo koe, e te tama a te tagata, e a, ko toka koe o folafola atu te fakamasinoga ki te fakai fakamaligi toto+ kae fakailoa atu ki a ia ana faifaiga fakatakalia‵lia katoa?+ 3 E ‵tau o fai atu koe, ‘Konei a pati a te Aliki Sili ko Ieova ne fai mai: “E te fakai telā e fakamaligi ne ia a toto+ i loto i a ia eiloa, telā ka oko mai tena taimi,+ kae e fai ne ia a tupua fakatakalia‵lia ke fakalailai ei a ia,+ 4 a te fakamaligiga ne koe o toto ko fai ei koe ke agasala,+ kae ko au tupua fakatakalia‵lia ko fai i ei koe ke lailai.+ Ko oti ne fai ne koe ke vave oko mai ou aso, kae ko te gataga o ou tausaga ko oko mai. Tenā te pogai ko fai ei ne au a koe e pelā me se mea fakatakalialia ki atufenua kae se mea fakatauemu ki fenua katoa.+ 5 A fenua ‵pili mai mo fenua ‵mao mai i a koe ka fakatauemu atu ki a koe,+ ko koe telā e se ‵ma tou igoa kae ko ‵fonu eiloa i te ‵numi. 6 Kiloke! A takitaki taki tokotasi o Isalaelu i loto i a koe e fakaaoga ne latou olotou tulaga pule ke fakama‵ligi ne latou a toto.+ 7 I loto i a koe, e fai fakamasei ne latou olotou tamana mo mātua.+ E ‵fao ne latou a mea a te tino fakaa‵tea, kae fai fakamasei ne latou a te tamaliki telā e seai sena tamana mo te fafine telā ko mate tena avaga.”’”+

8 “‘Ne fakaseaoga ne koe aku koga tapu, kae seki faka‵malu ne koe aku sapati.+ 9 I loto i a koe, ko tino gutu fatu‵fatu kolā e taumafai o fakama‵ligi ne latou a toto.+ I loto i a koe, e ‵kai latou ki taulaga i luga i mauga kae tumau i te faiga o amioga matagā i loto i a koe.+ 10 I loto i a koe, e se āva latou ki te moega o olotou tamana,+ kae e fai fakamasei ne latou se fafine telā e se ‵ma ona ko te masaki fakafafine.+ 11 I loto i a koe, e fai ne se tagata a faifaiga fakatakalialia mo te avaga a tena tuakoi,+ a te suā tino e fakalailai ne ia te avaga a tena tama tagata ki amioga matagā,+ kae ko te suā tino e fai fakamasei ne ia tena tuagane, ko te tama fafine a tena tamana.+ 12 I loto i a koe, e puke ne latou a ‵togi fakakolekole ke fakamaligi ei a toto.+ E tuku atu ne koe au tupe mō se pasene+ io me ke maua tupe fakaopoopo, kae e ‵fao mālō ne koe a tupe mai i ou tuakoi.+ Ao, ko oti ne fakapuli katoatoa ne koe au,’ ko te folafolaga a te Aliki Sili ko Ieova.

13 “‘Kiloke! Au e pati oku lima mo te takalialia ki au mea ne maua i auala faitogafiti mo faifaiga fakamaligi toto e fai i loto i a koe. 14 E a, ka tumau eiloa tou loto malosi, kae tumau te ma‵losi o ou lima māfai ko gasue au o taua atu ki a koe?+ Ko au, Ieova, ko oti ne faipati atu, kae ka gasuesue eiloa au. 15 Ka fakasalalau atu ne au koe ki atufenua kae fakamavaevae atu koe i loto i te fenua,+ kae ka fakagata aka ne au tou tulaga sē ‵ma.+ 16 Kae ko koe ka fakamasiasigina i mua o atufenua, kae ka iloa ei ne koe i a au ko Ieova.’”+

17 Kae ne toe oko mai te fekau a Ieova ki a au, ana muna: 18 “Te tama a te tagata, a te kāiga o Isalaelu ko fai pelā me ne mea sē aoga ki a au. A latou katoa ne kopa mo kāpa mo fiti mo pōlo fiti i loto i se ogaumu. Ko fai latou e pelā me ne mea sē aoga o siliva.+

19 “Tela la, konei a pati a te Aliki Sili ko Ieova ne fai mai: ‘Ona ko koutou katoa ko fai pelā me ne mea sē aoga,+ ko fakamaopoopo fakatasi mai ne au a koutou ki loto i Ielusalema. 20 E pelā eiloa mo siliva mo kopa mo fiti mo pōlo fiti mo kāpa e ‵luku fakatasi ki loto i se ogaumu ko te mea ke ula te afi ki luga i mea konā kae liuvai, tenā ka fakamaopoopo fakatasi foki ne au a koutou i toku kaitaua mo toku ita, kae ka ‵pusi atu au ki a koutou kae fai koutou ke liuvai.+ 21 Ka fakamaopoopo fakatasi ne au koutou kae ‵pusi atu ki luga i a koutou a te afi o toku kaitaua,+ kae ko koutou ka liuvai i loto i a ia.+ 22 E pelā eiloa mo siliva e liuvai i loto i se ogaumu, ka liuvai koutou penā i loto i a ia; kae ka iloa ei ne koutou i a au, Ieova, ko oti ne ‵ligi atu toku kaitaua ki luga i a koutou.’”

23 Kae ne toe oko mai te fekau a Ieova ki a au, ana muna: 24 “Te tama a te tagata, fai atu ki ei, ‘A koe se laukele telā e se mafai o ‵teu ke ‵ma io me ‵to ifo se vaiua ki luga i ei i te aso o te kaitaua. 25 Ana pelofeta ne fai olotou togafiti i loto i a ia,+ e pelā me se leona fekai ko saesae tena manu ne afuli.+ E kai ne latou a tino. E puke ne latou a koloa mo mea tāua. Ko oti ne fai ne latou ke tokouke a fāfine kolā ko ‵mate olotou avaga i loto i a ia. 26 Ana faitaulaga e soli ne latou taku tulafono,+ kae fakamasei faeloa ne latou aku koga tapu.+ E se faka‵kese ne latou a te mea tapu mo te mea masani,+ kae e fakata‵mala latou o fakailoa atu a te mea ‵ma mo te mea sē ‵ma,+ kae ita latou ma tausi ki aku sapati, kae ko taku fakamasei ei au i loto i a latou. 27 Ana pelenise i loto i a ia e fai pelā me ne kuli vao e saesae olotou manu ne afuli; e fakama‵ligi ne latou a toto kae tamate a tino ke maua ei olotou mea i auala faitogafiti.+ 28 Kae ko ana pelofeta ko oti ne palasitā ne latou a te lase ‵kena i luga i olotou faifaiga. E lavea ne latou a fakaasiga sē ‵tonu kae fai a mea fakataulaitu ‵loi,+ kae fai aka latou: “Konei a pati a te Aliki Sili ko Ieova ne fai mai,” kae tela la, e seai eiloa ne pati penā a Ieova ne fai. 29 A tino o te fenua ko oti ne ‵fao kae kaisoa ne latou a mea,+ ko oti ne fai fakamasei ne latou a tino fakaa‵lofa mo tino ma‵tiva, kae ‵fao ne latou a mea a te tino fakaa‵tea kae seai se fakamasinoga tonu e fai ki a ia.’

30 “‘Au ne salasala ki se tagata mai i a latou telā ka faite ne ia te ‵pui fatu io me tu i oku mua o sui te fenua i te koga telā ne ofa, ko te mea ke se fakamasei atu,+ kae e seai se tino ne maua ne au. 31 Tela la, ka ‵ligi atu a toku kaitaua ki tua i a latou kae fakaseai latou ki te afi o toku ita. Ka aumai ne au ki luga i olotou ulu a ikuga o olotou amioga,’ ko te folafolaga a te Aliki Sili ko Ieova.”