Esekielu

25 Ne toe oko mai te fekau a Ieova ki a au, ana muna: 2 “Te tama a te tagata, ‵fuli atu ou mata ki tino Amoni,+ kae ‵valo o ‵teke atu ki a latou.+ 3 E ‵tau o fai atu koe e uiga ki tino Amoni, ‘Faka‵logo mai ki te fekau a te Aliki Sili ko Ieova. Konei a pati a te Aliki Sili ko Ieova ne fai mai: “Ona ko koe ne fai aka ‘A!’ ke ‵teke atu ki toku koga tapuaki i te taimi ne fakamasei i ei, ke ‵teke atu ki te fenua o Isalaelu i te taimi ne masei valevale ei, kae ke ‵teke atu ki te kāiga o Iuta i te taimi ne ave fakapagota i ei, 4 tela la, ko tuku atu ne au koe ki tino mai i te feitu ki Saegala ke fai mō latou. Ka faka‵tu aka ne latou olotou koga ‵nofo i loto i a koe kae faka‵tu olotou faleie i loto i a koe. Ka kai ne latou au fuataga, kae ka inu ne latou au susu. 5 Ka fai ne au a Lāpa+ e pelā me se laukele moukuā mō kamela, kae ko te laukele o tino Amoni se koga malōlō o te lafu mamoe; kae ka iloa ei ne koutou i a au ko Ieova.”’”

6 “Me konei a pati a te Aliki Sili ko Ieova ne fai mai: ‘Ona ko koe ne pati ou lima+ kae tuki ou vae kae ne fiafia koe ona ko te fenua ko Isalaelu mo te fakatauemu lasi,+ 7 tela la, ka ‵fola atu ne au toku lima o taua atu ki a koe ke tuku atu koe ki nisi atufenua ke ‵fao au mea. Ka ‵kati kea‵tea ne au koe mai i te fenua kae fakamasei atu koe mai i atufenua.+ Ka fakaseai ne au koe, kae ka iloa ei ne koe i a au ko Ieova.’

8 “Konei a pati a te Aliki Sili ko Ieova ne fai mai: ‘Ona ko Moapi+ mo Seila+ ne fai aka, ‘Kiloke! A te kāiga o Iuta ko ‵pau eiloa mo nisi atufenua,” 9 ko tuku faka‵sau atu ne au a fakai i te tuakoi o Moapi e aunoa mo se puipuiga, ko fakai e fakagaligali ei te fenua, ko Peta-iesimota, Palameono o fano ‵tonu atu ki Kiliataima.+ 10 Ka tuku fakatasi atu ne au mo tino Amoni ke fai ma tino i te feitu ki Saegala,+ ko te mea ke se toe masaua eiloa a tino Amoni i atufenua.+ 11 Kae ka fakaoko atu ne au te fakamasinoga ki Moapi,+ kae ka iloa ei ne latou i a au ko Ieova.’

12 “Konei a pati a te Aliki Sili ko Ieova ne fai mai: ‘A Etoma ne taua atu o taui ma sui ki te kāiga o Iuta kae ne fakamāfua aka ne latou se agasala lasi i te taua atu ki a latou;+ 13 tela la, konei a pati a te Aliki Sili ko Ieova ne fai mai: “Ka ‵kapa atu foki toku lima ki Etoma kae ‵kati kea‵tea mai i ei a tāgata mo lafu manu, kae ka fai ne au ke masei valevale.+ Mai i Timanu ke oko atu eiloa ki Titana, ka ‵mate latou i te pelu.+ 14 ‘Ka fakaoko atu ne au te taui ma sui ki Etoma e auala i te lima o oku tino Isalaelu.+ Ka aumai ne latou toku ita mo toku kaitaua ki Etoma, ko te mea ke oko atu ki a latou taku taui ma sui,’+ ko te folafolaga a te Aliki Sili ko Ieova.”’

15 “Konei a pati a te Aliki Sili ko Ieova ne fai mai: ‘Ona ko te lasi o te lotou fakamaseiga, ne salasala a tino Filisitia mo te kaitāua ki se togafiti ke fakaoko atu te taui ma sui mo te fakamaseiga.+ 16 Tela la, konei a pati a te Aliki Sili ko Ieova ne fai mai: “Au tenei ko ‵fola toku lima o taua atu ki tino Filisitia,+ kae ka tamate ne au a tino Keleti+ kae ka fakaseai ne au a te ‵toega o tino kolā e ‵nofo i tafa o te tai.+ 17 Ka fakaoko atu ne au ki a latou a faifaiga sili o te taui ma sui fakatasi mo fakasalaga ‵mafa, kae ka iloa ei ne latou i a au ko Ieova māfai ko aumai ne au taku taui ma sui ki luga i a latou.”’”