Esekielu

30 Kae ne toe oko mai te fekau a Ieova ki a au, ana muna: 2 “Te tama a te tagata, ‵valo atu kae fai atu, ‘Konei a pati a te Aliki Sili ko Ieova ne fai mai:

“‵Tagi fanoanoa, ‘Oi aue, ko pili mai a te aso!’

 3 Me ko pili mai te aso, ao, ko pili mai eiloa a te aso o Ieova.+

Ka fai pelā me se aso kaumanā,+ se taimi ne filifiligina mō atufenua.+

 6 Konei a pati a Ieova ne fai mai:

“‘Ka pa‵kū latou i te pelu i te fenua mai i Mikitolo+ ke oko eiloa ki Saini,’+ ko te folafolaga a te Aliki Sili ko Ieova. 7 ‘Ka fai latou e pelā me ko te ‵toe fenua tafasili i te sē aoga i fenua katoa, kae ko ana fakai ka fai pelā me ko toe fakai ne lasi te fakamaseiga ne fai ki ei.+ 8 Kae ka iloa ei ne latou i a au ko Ieova māfai ko faka‵ka ne au se afi i Aikupito kae ka tuki palapala a fenua katoa kolā ne fai taugasoa a ia ki ei. 9 I te aso tenā ka uga atu ne au a avefekau i vakamutu ke fai ei ke polepole a Aitiope telā e lasi tena loto talitonu ki a ia eiloa; ka oko atu te mataku ki a latou i te aso telā ka oko mai ki Aikupito, me ka oko mai eiloa.’

10 “Konei a pati a te Aliki Sili ko Ieova ne fai mai: ‘Ka aumai ne au te gataga ki te vaitino o tino Aikupito e auala i te lima o te tupu o Papelonia ko Nepukanesa.+ 11 A ia fakatasi mo tena kautau, ko toe tino fakasaua i atufenua,+ ka aumai ki loto ke fakamasei ne latou te fenua. Ka tapale ne latou olotou pelu o taua atu ki Aikupito kae faka‵fonu te fenua ki tino ne tamate.+ 12 Ka ‵fuli ne au a alavai o te Naila+ ke pelā me se laukele malō kae fakatau atu te fenua ki lima o tāgata amio ma‵sei. Ka fai ne au a te laukele mo mea katoa i ei ke ma‵sei valevale e auala i lima o tino fakaa‵tea.+ Ko au, Ieova, ko oti ne faipati atu.’

13 “Konei a pati a te Aliki Sili ko Ieova ne fai mai: ‘Ka fakaseai foki ne au a tupua fakatakalia‵lia kae fakapalele atu a atua sē aoga o Nafi.*+ Ka se toe ai se pelenise* mai te fenua o Aikupito, kae ka tuku atu ne au te mataku ki te fenua o Aikupito.+ 14 Ka fakamasei ne au a Patalosa+ kae faka‵ka se afi i Soani kae fakaoko atu te fakamasinoga ki No.*+ 15 Ka ‵ligi atu ne au toku kaitaua ki Sini, te fakai malosi o Aikupito, kae fakamasei atu a tino o No. 16 Ka faka‵ka ne au se afi i Aikupito; kae ka oko atu ki Sini a te mataku kae ko No ka maofa ki lalo kae ko Nafi* ka taua atu ki ei a tino i te ao malamalama! 17 A tamataene o Onu* mo Pepeseta ka ‵mate i te pelu, kae ka puke fakapagota olotou fakai. 18 I Tapenesa a te ao ka pouli māfai ko ofa ne au a amo o Aikupito i konā.+ A te malosi o tena fia sili ka oko eiloa ki tena gataga,+ ka ufi a ia ne kaumana, kae ka puke fakapagota ana fakai fo‵liki.+ 19 Ka fakaoko atu ne au te fakamasinoga ki Aikupito, kae ka iloa ei ne latou i a au ko Ieova.’”

20 Kae i te 11 o tausaga, i te masina muamua, i te fitu o aso o te masina, ne oko mai ei te fekau a Ieova ki a au, ana muna: 21 “Te tama a te tagata, ko oti ne ‵fati ne au te lima o te Falao te tupu o Aikupito; ka se fusi faka‵lei ko te mea ke toe ‵lei io me fusi ki se litaga ko te mea ke malosi o puke aka te pelu.”

22 “Tela la, konei a pati a te Aliki Sili ko Ieova ne fai mai: ‘Au tenei e taua atu ki te Falao te tupu o Aikupito,+ kae ka ‵fati ne au ana lima, ko te lima malosi mo te lima ne fati,+ kae ka fai ne au ke tō te pelu mai i tena lima.+ 23 Tenā ka fakasalalau atu ei ne au a tino Aikupito ki atufenua kae fakamavae‵vae atu latou i luga i te fenua.+ 24 Ka fakamalosi ne au a lima* o te tupu o Papelonia+ kae tuku atu taku pelu ki tena lima,+ kae ka ‵fati ne au a lima o te Falao, kae ka tagi mafatia a ia i se leo maluga e pelā me se tagata ka mate i ana mua.* 25 Ka fakamalosi ne au a lima o te tupu o Papelonia, kae ko lima o te Falao ka gau‵gau ifo ki lalo; kae ka iloa ei ne latou i a au ko Ieova māfai ko tuku ne au taku pelu ki te lima o te tupu o Papelonia kae fakaaoga ne ia o taua atu ki te fenua o Aikupito.+ 26 Kae ka fakasalalau atu ne au a tino Aikupito ki nisi atufenua kae fakamavae‵vae atu latou i te fenua,+ kae ka iloa ei ne latou i a au ko Ieova.’”