Esekielu

37 Ne oko mai ki luga i a au a te lima o Ieova, kae e auala i tena agaga ne puke au ne Ieova kae tuku ki lalo i te kogaloto o te vanu laugatasi+ telā e ‵fonu eiloa i ivi. 2 Ne fai ne ia au ke fano o fakatamilo a mea konā, kae ne lavea ne au me e uke ‵ki a ivi e tafola i te vanu laugatasi, kae ko ma‵lō ‵ki.+ 3 Ne fesili mai a ia ki a au: “Te tama a te tagata, e mata, e mafai o toe ola mai a ivi konei?” Tenā ne fai atu ei au: “Te Aliki Sili ko Ieova, ko koe eiloa te tino e iloa ne koe.”+ 4 Tenā ne fai mai ei a ia ki a au: “‵Valo i luga i ivi konei, kae fai atu ki a latou, ‘Koutou e ivi ma‵lō, faka‵logo mai ki te fekau a Ieova:

5 “‘Konei a pati a te Aliki Sili ko Ieova ne fai atu ki ivi konei: “Ka fai ne au ke isi se mānava e ulu ki loto i a koutou, kae ka ola mai koutou.+ 6 Ka tuku atu ne au a uaua mo ‵kano ki luga i a koutou, kae ka ufi ne au koutou ki pa‵kili kae tuku atu se mānava ki loto i a koutou, kae ka ola mai koutou; kae ka iloa ei ne koutou i a au ko Ieova.”’”

7 Tenā ne ‵valo atu ei au e ‵tusa eiloa mo te fakatonuga ne fai mai ki a au. I te taimi eiloa ne ‵valo ei au, ne lagona atu se mea e logoa, se ‵tagi o mea e gasue‵sue, kae ne kamata o ‵soko tasi a ivi, ko te ivi ki te suā ivi. 8 Tenā ne lavea ei ne au a uaua mo ‵kano ko ‵sae aka i luga i a latou, kae ne ufi latou ne te pa‵kili. Kae ne seki ai eiloa se mānava i a latou.

9 Tenā ne fai mai ei a ia ki a au: “‵Valo atu ki te matagi. ‵Valo, e te tama a te tagata, kae fai atu ki te matagi, ‘Konei a pati a te Aliki Sili ko Ieova ne fai mai: “Mai i matagi e fa vau ki loto, e te matagi,* kae agi atu ki luga i tino konei ne tamate, ko te mea ke ola mai latou.”’”

10 Tenā ne ‵valo atu ei au e ‵tusa mo te fakatonuga ne fai mai ki a au, kae ne ulu atu te mānava* ki loto i a latou, kae ne kamata latou o ola kae ‵tu aka,+ se kautau lasi ‵ki.

11 Tenā ne fai mai ei a ia ki a au: “Te tama a te tagata, a ivi konei ko te kāiga kātoa o Isalaelu.+ E fai aka latou, ‘A ‵tou ivi e ma‵lō, kae ko ‵tou fakamoemoega ko fakaseai atu.+ A tatou ko oti ne ‵kati katoatoa kea‵tea.’ 12 Tela la, ‵valo kae fai atu ki a latou, ‘Konei a pati a te Aliki Sili ko Ieova ne fai mai: “Ka ‵tala ne au otou tanuga+ kae faka‵tu aka koutou mai i otou tanuga, e toku fenua, kae aumai koutou ki te fenua o Isalaelu.+ 13 Kae ka iloa ei ne koutou i a au ko Ieova māfai ko ‵tala ne au otou tanuga kae māfai ko faka‵tu aka ne au koutou ki tua mo otou tanuga, e toku fenua.”’+ 14 ‘Ka tuku atu ne au toku agaga ki loto i a koutou kae ka toe ola mai koutou,+ kae ka faka‵nofo ne au koutou i te otou fenua; kae ka iloa ei ne koutou i a au, Ieova, ko oti ne faipati kae ko oti ne fai ne au te mea tenā,’ ko te folafolaga a Ieova.”

15 Ne toe oko mai te fekau a Ieova ki a au, ana muna: 16 “Kae ko koe e te tama a te tagata, puke se lakau kae tusi i luga i ei, ‘Mō Iuta kae mō tino o Isalaelu kolā e ‵nofo fakatasi mo ia.’*+ Tenā ko puke ei te suā lakau kae tusi i luga i ei, ‘Mō Iosefa, ko te lakau a Efalaima, mo te kāiga kātoa o Isalaelu kolā e ‵nofo mo ia.’*+ 17 Tenā ko aumai fakatasi ei ne koe ko te mea ke fai e pelā me se lakau e tasi i tou lima.+ 18 Kafai e fai atu ou tino ki a koe, ‘E a, ka se fai mai ne koe te uiga o mea konei?’ 19 fai atu ki a latou, ‘Konei a pati a te Aliki Sili ko Ieova ne fai mai: “Ka puke ne au te lakau a Iosefa, telā e puke i te lima o Efalaima, mo matakāiga o Isalaelu kolā e ‵nofo fakatasi mo ia, kae ka tuku fakatasi ne au mo te lakau a Iuta; kae ka fai ne au a latou e pelā me se lakau e tasi,+ kae ka fai latou e pelā me se lakau e tasi i toku lima.”’ 20 A lakau ne tusitusi koe i ei e ‵tau o puke i tou lima ke lavea ne latou.

21 “Tenā ko fai atu ei koe ki a latou, ‘Konei a pati a te Aliki Sili ko Ieova ne fai mai: “Ka puke ne au a tino Isalaelu mai i atufenua ne olo latou ki ei, kae ka fakamaopoopo fakatasi mai ne au latou mai i feitu katoa kae aumai latou ki te lotou fenua.+ 22 Ka fai ne au latou mo atufenua e tasi i te fenua,+ i luga i mauga o Isalaelu, kae e tokotasi te tupu ka pule i luga i a latou katoa,+ kae ka se toe fai latou e pelā me ne atufenua e lua; io me toe mavae‵vae latou ki malo e lua.+ 23 Ka se toe fakalai‵lai ne latou a latou eiloa ki olotou tupua fakatakalia‵lia* mo olotou faifaiga fakatakalia‵lia mo olotou amioga solitulafono katoa.+ Ka faka‵sao ne au latou mai te lotou sē fakamaoni telā ne agasala ei latou, kae ka faka‵ma ne au latou. Ka fai latou mo oku tino, kae ka fai au mo olotou Atua.+

24 “‘“A taku tavini ko Tavita ka fai mo olotou tupu,+ kae ka tokotasi te lotou tausi mamoe.+ Ka sa‵sale latou i ikuga o aku fakamasinoga kae tausi faka‵lei ki aku tulafono fakavae.+ 25 Ka ‵nofo latou i luga i te fenua telā ne tuku ne au ki taku tavini, ki a Iakopo, ko te koga ne ‵nofo i ei otou tupuga,+ kae ka ‵nofo latou i ei ki te se-gata-mai,+ ko latou mo olotou tama‵liki*+ mo tama‵liki a olotou tama‵liki; kae ko Tavita taku tavini ka fai mo olotou takitaki* ki te se-gata-mai.+

26 “‘“Kae ka fai ne au se feagaiga o te filemu mo latou;+ se feagaiga se-gata-mai mo latou. Ka faka‵mautakitaki ne au latou kae fai latou ke tokouke+ kae fakatu toku koga tapuaki i loto i a latou ki te se-gata-mai. 27 A toku faleie* ka ‵nofo mo* latou, kae ka fai au mo olotou Atua, kae ka fai latou mo oku tino.+ 28 Kae ka iloa ei ne atufenua i a au, Ieova, e fakatapu ne au a Isalaelu māfai ko tu toku koga tapuaki i loto i a latou ki te se-gata-mai.”’”+