Esekielu

41 Tenā ne aumai ei ne ia au ki te koga tapuaki* i tua, kae ne fua ne ia a pou i feitu; e ono kupita* te lauefa i te feitu e tasi kae ono kupita te lauefa i te suā feitu. 2 A te auala ki loto e sefulu kupita te lauefa, kae ko ‵pui i feitu o te auala ki loto e lima kupita i te feitu e tasi kae lima kupita i te suā feitu. Ne fua ne ia tena loa, e 40 kupita, kae ko tena lauefa e 20 kupita.

3 Tenā ne fano ei a ia ki loto* kae fua ne ia te pou i te feitu o te auala ki loto, e lua kupita te matolu, kae ko te auala ki loto e ono kupita te lauefa. A ‵pui i feitu o te auala ki loto e fitu kupita. 4 Oti aka, ne fua ne ia a te potu telā e ‵fuli ki te koga tapuaki tafa ki tua, e 20 kupita te loa kae 20 kupita te lauefa.+ Kae ne fai mai a ia ki a au: “Tenei te Potu Tafasili i te Tapu.”+

5 Tenā ne fua ei ne ia te ‵pui o te faletapu, e ono kupita te matolu. A potu i feitu kolā e fakatamilo i te faletapu e fa kupita te lauefa.+ 6 A potu i feitu e fogafale tolu te ma‵luga, e tasi te potu mai luga o te suā potu, kae taki 30 a potu i fogafale takitasi. E isi ne lela e fakatamilo i te ‵pui o te faletapu kolā e ‵lago ki ei a feitu o potu, ko te mea ke se ulu atu a ‵lago konei ki loto i ‵pui o te faletapu.+ 7 I te avā feitu o te faletapu e isi se kakega e tele fakatamilo telā e fano eiloa o lauefa māfai e fanaka ki potu tafa ki luga.+ E fanaka eiloa o lauefa mai te fogafale e tasi ki te suā fogafale māfai e kake aka se tino mai te fogafale tafa ki lalo ke oko ki te fogafale tafa ki luga kae ui atu i loto i te fogafale i te kogaloto.

8 E lavea ne au me e isi se tulaga maluga e fakatamilo i te faletapu, kae ko fakavae o potu i feitu, e tasi te lula lakau kātoa telā e ono kupita ke oko ki te ‵kōna. 9 A te lauefa o te ‵pui i tua o potu i feitu, e lima kupita. E isi se koga avanoa i tafa o potu i feitu telā se vaega o te faletapu.

10 I te va o te faletapu mo potu ‵kai+ se koga telā e 20 kupita te lauefa i feitu katoa. 11 E isi se auala ki loto i va o ‵pui i feitu mo te koga avanoa i te feitu ki mātū mo te suā auala ki loto i te feitu ki saute. A te lauefa o te koga avanoa tenā e lima kupita i feitu katoa.

12 A te fale telā e tu i te feitu ki togala kae ‵fuli ki te koga avanoa e 70 kupita te lauefa kae 90 kupita te loa; a te ‵pui o te fale e lima kupita te matolu i feitu katoa.

13 Ne fua ne ia te faletapu, e 100 kupita te loa. A te koga avanoa, te fale,* mo ana ‵pui e 100 kupita foki te ‵loa. 14 A te lauefa o te feitu ki mua o te faletapu telā e ‵fuli ki te feitu ki saegala mo te koga avanoa e 100 kupita.

15 Ne fua ne ia te loa o te fale telā e ‵fuli ki te koga avanoa i te feitu ki tua, fakatasi mo ana koga sa‵sale i feitu e lua, e 100 kupita.

Ne fua foki ne ia te koga tapuaki tafa ki tua, te koga tapuaki tafa ki loto,+ mo fakaosoga o te koga ateatea, 16 e pelā foki mo auala i mataloa, ko famalama kolā e ‵lasi i loto kae fo‵liki i tua,+ mo koga sa‵sale i koga e tolu konā. I tafa o auala o mataloa ko ‵pui laupapa+ mai te fola ke oko eiloa ki famalama; kae ko famalama e isi ne olotou ufi. 17 Ne fua foki a koga i luga o te auala ki loto mo te faletapu tafa ki loto mo te koga i tua mo te ‵pui kātoa telā e fakatamilo i ei. 18 E isi ne ata o kelupi+ mo lakau ko pama ne ta i ei,+ a lakau pama takitasi e ‵tu i va o kelupi e lua, kae ko kelupi takitasi e taki lua olotou mata. 19 A mata o te tino e ‵fuli atu ki te lakau ko te pama i te feitu e tasi, kae ko mata o te leona e ‵fuli atu ki te lakau ko te pama i te suā feitu.+ Tenei te auala ne ta ei a mea konā i loto i te faletapu kātoa. 20 Mai te fola ki te koga mai luga o te auala ki loto ko ata o kelupi mo lakau ko pama kolā ne ta i luga i te ‵pui o te koga tapuaki.

21 A pou o mataloa* o te koga tapuaki e sikuea.+ I mua o te koga tapu se mea pelā me se 22 fatafaitaulaga laupapa+ telā e tolu kupita te maluga kae lua kupita te loa. E isi ne ana pou i ‵kōna, kae ko tena tafito mo ana feitu ne faite ki laupapa. Tenā ne fai mai ei a ia ki a au: “Tenei te taipola telā e tu i mua o Ieova.”+

23 A te koga tapuaki tafa ki tua mo te koga tapu e taki lua mataloa i ei.+ 24 A mataloa konā e lua e mafai o ‵tala ki loto kae ‵tala foki ki tua, e lua feitu mataloa i mataloa takitasi. 25 E isi ne ata o kelupi mo lakau ko pama ne ta i luga i mataloa o te koga tapuaki, e pelā mo ata i luga i ‵pui.+ E isi foki se tuafale laupapa i te feitu ki mua o te fakaosoga i te koga i tua. 26 E isi foki ne famalama kolā e ‵lasi i loto kae fo‵liki i tua+ mo ata o lakau ko pama i feitu katoa o te fakaosoga, e pelā foki mo potu i feitu o te faletapu mo fakaosoga i tuafale.