Esekielu

42 Tenā ne ave ei ne ia au ki te koga ateatea tafa ki tua i te feitu ki mātū.+ Kae ne aumai ne ia au ki te potu ‵kai telā e tu i tafa o te koga avanoa,+ i te feitu ki mātū o te fale i ana tafa.+ 2 A tena loa i te auala ki loto mai i mātū e 100 kupita,* kae 50 kupita te lauefa. 3 E tu i te va o te koga ateatea tafa ki loto, telā e 20 kupita te lauefa,+ mo te tamā auala o te koga ateatea tafa ki tua. Ana poletito e ‵tu fakafesagai kae fogafale tolu te ma‵luga. 4 Mai mua o potu ‵kai e isi se tamā auala sasale i loto,+ e 10 kupita te lauefa kae 100 kupita te loa, kae ko olotou mataloa e ‵tu i te feitu ki mātū. 5 E lauliki atu a potu ‵kai tafa ki luga o te fale i lō potu ‵kai tafa ki lalo mo potu ‵kai i te kogaloto, me e lasi te avanoaga ne fakaaoga ki poletito. 6 Me i mea konā e fogafale tolu te ma‵luga, kae e seai ne olotou pou e pelā mo pou o koga ateatea. Tenā te pogai e foliki ei te fola i konā i lō te fogafale tafa ki lalo mo te fogafale i te kogaloto.

7 A te ‵pui fatu tafa ki tua telā e pili ki potu ‵kai kolā e tafa ki te koga ateatea tafa ki tua telā e ‵fuli atu ki nisi potu ‵kai, e 50 kupita te ‵loa. 8 A te ‵loa o potu ‵kai kolā e tafa ki te koga ateatea tafa ki tua e 50 kupita, kae ko mea kolā e ‵fuli ki te koga tapuaki, e 100 kupita. 9 E isi se auala ki loto i potu ‵kai i te feitu ki saegala telā e vau mai te koga ateatea tafa ki tua.

10 E isi foki ne potu ‵kai i loto i te ‵pui fatu o te koga ateatea telā e tafa ki saegala, e pili ki te koga avanoa mo te fale.+ 11 E isi se tamā auala sasale i mua o mea konā e pelā mo potu ‵kai i te feitu ki matū.+ E ‵pau te lotou ‵loa mo te lotou lauefa, kae e tasi te lotou auala ki tua mo te auala ne fakatoka ei. A olotou mataloa ki loto 12 e ‵pau mo mataloa ki loto o potu ‵kai kolā e tafa ki te feitu ki saute. E isi se mataloa i te kamataga o te tamā auala sasale, mai mua o te ‵pui fatu i ana tafa i te feitu ki saegala, telā e mafai o ulu mai i ei se tino.+

13 Tenā ne fai mai ei a ia ki a au: “A potu ‵kai i te feitu ki mātū mo potu ‵kai i te feitu ki saute kolā e ‵tu pili atu ki te koga avanoa+ ko potu ‵kai tapu kolā e kai i ei a taulaga tapu ne faitaulaga kolā e fakapili‵pili atu ki a Ieova.+ E tuku ne latou i konā a toe taulaga tafasili i te tapu, taulaga meakai, taulaga mō agasala, mo taulaga mō mea ‵se, me i te koga tenā e tapu.+ 14 Kafai ko ulu atu a faitaulaga ki loto, e se ‵tau o olo latou ki tua mo te koga tapu ki te koga ateatea tafa ki tua e aunoa mo te tapalega o olotou gatu kolā ne fakaaoga i te lotou taviniga,+ me i mea konei e tapu. Ka ‵pei latou ki nisi gatu ko te mea ke mafai o olo atu latou ki nisi koga kolā e saoloto a tino i ei.”

15 I te otiga ne fua ne ia te koga tafa ki loto o te faletapu, ne ave ne ia au ki tua e auala i te mataloa telā e ‵fuli ki te feitu ki saegala,+ kae ne fua ne ia te koga kātoa tenā.

16 Ne fua ne ia te feitu ki saegala ki te lula lakau. E ‵tusa mo te lula lakau, e 500 lula lakau te loa mai te feitu e tasi ki te suā feitu.

17 Ne fua ne ia te feitu ki mātū, kae e ‵tusa mo te lula lakau, e 500 lula lakau te loa.

18 Ne fua ne ia te feitu ki saute, kae e ‵tusa mo te lula lakau, e 500 lula lakau te loa.

19 Ne fanatu a ia ki te feitu ki togala. Ne fua ne ia e 500 lula lakau te loa ki te lula lakau.

20 Ne fua ne ia a feitu e fa. E isi se ‵pui e fakatamilo i ei+ telā e 500 lula lakau te loa kae 500 lula lakau te lauefa,+ ke ‵vae aka i ei a mea tapu mo mea kolā e mafai o fakaaoga.+