Esekielu

44 Ne fakafoki ne ia au e auala i te mataloa tafa ki tua o te koga tapuaki telā e ‵fuli ki te feitu ki saegala,+ kae e ‵pono.+ 2 Tenā ne fai mai ei a Ieova ki a au: “A te mataloa tenei ka ‵pono faeloa. E se ‵tau o ‵tala, kae ka seai se tino e ulu atu i ei; me i a Ieova, te Atua o Isalaelu ne ulu atu i ei,+ tela la, e ‵tau eiloa o ‵pono faeloa. 3 Kae ka sagasaga a te takitaki i ei o kai ana meakai i mua o Ieova,+ me i a ia se takitaki. Ka vau a ia ki loto e auala i te fakaosoga o te mataloa, kae fano a ia ki tua e auala i ei.”+

4 Tenā ne aumai ei ne ia au i loto i te mataloa ki mātū ki te feitu ki mua o te faletapu. I taku kiloatuga, ne lavea ne au a te faletapu ko ‵fonu eiloa i te ‵malu o Ieova.+ Tenā ne fakasiga ifo ei au mo oku mata e ‵fuli ki te laukele.+ 5 Tenā ne fai mai ei a Ieova ki a au: “Te tama a te tagata, saga tonu mai, kilo mai, kae fakalogologo faka‵lei ki mea katoa e fai atu ne au e uiga ki tulafono fakavae mo tulafono o te faletapu o Ieova. Saga tonu atu ki te mataloa ki loto o te faletapu mo mataloa ki tua katoa o te koga tapuaki.+ 6 E ‵tau mo koe o fai atu ki te kāiga ‵teke o Isalaelu, ‘Konei a pati a te Aliki Sili ko Ieova ne fai mai: “Ko lava otou faifaiga fakatakalia‵lia, e te kāiga o Isalaelu. 7 Kafai e aumai ne koutou a tino fakaa‵tea kolā e seki pilitome i olotou loto mo olotou foitino ki loto i toku koga tapuaki, ko fakalailai ne latou toku faletapu. E ofo mai ne koutou aku meakai, ko gako mo toto, kae tela la a taku feagaiga ko oti ne ofa ona ko otou faifaiga fakatakalia‵lia. 8 Ne seki tausi faka‵lei ne koutou aku mea tapu.+ I lō te fai penā, ne ‵tofi aka ne koutou a nisi tino ke fai ne latou a tiute i loto i toku koga tapuaki.”’

9 “‘Konei a pati a te Aliki Sili ko Ieova ne fai mai: “E seai se tino fakaa‵tea e nofo i Isalaelu telā e seki pilitome i tena loto mo tena foitino e ‵tau o ulu atu ki loto i toku koga tapuaki.”’

10 “‘Kae ko tino Levi kolā ne takasē‵se ke ‵mao mai i a au+ i te taimi ne takasē‵se kea‵tea ei a Isalaelu mai i a au o tau‵tali i olotou tupua fakatakalia‵lia ka oko atu ki a latou a ikuga o olotou mea ‵se. 11 Kae ka fai latou e pelā me ne tavini i toku koga tapuaki ke tausi a mataloa o te faletapu+ kae tavini atu i te faletapu. Ka tamate ne latou a taulaga ‵sunu kātoa mo taulaga mō te fenua, kae ka ‵tu latou i mua o te fenua o tavini atu ki a latou. 12 Ona ko latou ne tavini atu ki mea konā i mua o olotou tupua fakatakalia‵lia kae ne fai pelā me se fatu faka‵siga tino telā ne fai ei a te kāiga o Isalaelu ke agasala,+ tenā te pogai ne sisi ei toku lima o ‵teke atu ki a latou i se tautoga,’ ko te folafolaga a te Aliki Sili ko Ieova, ‘kae ka oko atu eiloa ki a latou a ikuga o olotou mea ‵se. 13 Ka se fakapili‵pili mai latou ki a au o tavini e pelā me ko aku faitaulaga io me fakapili‵pili atu ki so se mea i aku mea tapu io me ko mea tafasili i te tapu, kae ka tauave eiloa ne latou te lotou masiasi ona ko mea fakatakalia‵lia ne fai ne latou. 14 Kae ka fai ne au latou e pelā me ne tino e onoono ki tiute e fai i te faletapu, ke tausi ki galuega mo mea katoa kolā e ‵tau o fai i loto i ei.’+

15 “‘E pelā mo faitaulaga Levi, a tama tāgata a Satoka,+ kolā ne onoono ki te faiga o tiute i toku koga tapuaki i te taimi ne takasē‵se kea‵tea ei a tino Isalaelu mai i a au,+ ka o‵mai latou ki a au ke tavini mai ki a au, kae ka ‵tu latou i oku mua o ofo mai ki a au a gako+ mo toto,’+ ko te folafolaga a te Aliki Sili ko Ieova. 16 ‘Konā eiloa a tino ka ulu mai ki loto i toku koga tapuaki, kae ka o‵mai latou ki taku taipola ke tavini mai ki a au,+ kae ka tausi faka‵lei ne latou olotou tiute e fai ki a au.+

17 “‘Kafai ko o‵mai latou ki loto i mataloa o te koga ateatea tafa ki loto, e ‵tau mo latou o ‵pei ki gatu lino.+ E se ‵tau mo latou o ‵pei ki so se mea e fai ki vulu i te taimi e tavini atu ei latou i mataloa o te koga ateatea tafa ki loto io me i loto i ei. 18 E ‵tau mo latou o ‵pei ki pulou laugatu lino i olotou ulu, kae ‵tau o ‵pono olotou tega ne olotou tivae lino.+ E se ‵tau mo latou o ‵pei ki so se mea e fai ei latou ke tau‵ta. 19 Kae koi tuai latou o olo ki tua i te koga ateatea tafa ki tua​—ko te koga ateatea tafa ki tua telā e ‵nofo i ei a tino​—e ‵tau o tapale ne latou a gatu ne ‵pei ei latou i te taimi o te lotou taviniga+ kae tuku atu ki loto i potu ‵kai tapu.+ Tenā ko ‵pei ei latou ki nisi gatu, ko te mea ke se fakasalalau atu ne latou a te ‵malu ki tino mai i olotou gatu. 20 E se ‵tau mo latou o ‵vele olotou ulu+ io me faka‵loa olotou laulu. E ‵tau o ‵kati faka‵lei ne latou a laulu i olotou ulu. 21 E se ‵tau mo faitaulaga o inu ki uaina i te taimi e ulu atu ei latou ki te koga ateatea tafa ki loto.+ 22 E se ‵tau o a‵vaga latou ki se fafine telā ko mate tena avaga io me se fafine telā ko oti ne ‵tala tena avaga;+ kae e saoloto latou o a‵vaga ki se tamafine ‵ma mai i tama a Isalaelu io me ko te avaga a te faitaulaga telā ko mate.’+

23 “‘E ‵tau mo latou o akoako oku tino e uiga ki te ‵kese o te mea telā e tapu mo te mea telā e se tapu; kae ka akoako ne latou te ‵kese o te mea telā e se ‵ma mo te mea ‵ma.+ 24 E ‵tau mo latou o pule e pelā me ne famasino i se fakamasinoga;+ e ‵tau o fakamasino ne latou te mea tenā e ‵tusa mo ikuga o aku fakamasinoga.+ E ‵tau o tausi ne latou aku tulafono mo aku tulafono fakavae e uiga ki aku ‵kaiga fia‵fia+ kae faka‵malu aku sapati. 25 E se ‵tau mo latou o fakapili‵pili atu ki se tino mate i a latou ma sē ‵ma. Kae e mafai ne latou o fai a latou ke se ‵ma ona ko olotou tamana, mātua, tama tāgata, tama fāfine, taina io me se tuagane telā e seki avaga.+ 26 Kae mai tua o te faka‵māga o se faitaulaga, e ‵tau o lau ne latou a aso e fitu mō ia. 27 I te aso ne ulu atu ei a ia ki te koga tapu, ki te koga ateatea tafa ki loto, e ‵tau o ofo atu ne ia tena taulaga mō agasala,’+ ko te folafolaga a te Aliki Sili ko Ieova.

28 “‘Kae tenei te lotou tofi: Au ko te lotou tofi.+ E se ‵tau mo koutou o tuku atu se vaega mō latou i Isalaelu, me i a au ko te lotou vaega. 29 Konā eiloa a tino ka ‵kai ki te taulaga meakai,+ te taulaga mō agasala, mo te taulaga mō mea ‵se,+ mo so se mea ne tuku atu ki Isalaelu ka fai ma latou.+ 30 A toe mea ‵lei o fuagalakau ‵pala muamua mo so se vaegā meaalofa mai i a koutou ka tuku atu ma faitaulaga.+ Kae e ‵tau o tuku atu ne koutou a fuataga muamua o otou saito ki te faitaulaga.+ Ka fai ne te mea tenei ke oko atu a fakamanuiaga ki otou kaufale.+ 31 A faitaulaga e se ‵tau o ‵kai ki so se manu eva io me se manu telā ne maua atu ko mate io me ne saesae likiliki.’+