Esekielu

47 Tenā ne toe fakafoki mai ei ne ia au ki te auala ki loto i te faletapu,+ kae ne lavea ne au i konā a vai e ‵tafe ki te feitu ki saegala mai lalo o te mataloa o te faletapu,+ me i te feitu ki mua o te faletapu e ‵fuli atu ki te feitu ki saegala. A te vai e ‵tafe ki lalo mai lalo i te feitu fakaatamai o te faletapu, ko te feitu ki saute o te fatafaitaulaga.

2 Tenā ne ‵taki ei ne ia au ki tua e auala i te mataloa i te feitu ki mātū+ kae ave au ki tua ki te suā feitu o te mataloa tafa ki tua telā e ‵fuli ki te feitu ki saegala,+ kae ne lavea ne au a vai e ‵tafe malielie mai i te feitu fakaatamai.

3 I te fanatuga a te tagata ki tua i te feitu ki saegala mo te uka e fua ei a mea i tena lima,+ ne fua ne ia e 1,000 kupita* kae fai ne ia au ke fanatu i loto i te vai; a te ‵poko o te vai ne oko ki oku fatugugu.

4 Tenā ne toe fua ei ne ia te suā 1,000 kae fai ne ia ke fanatu au i loto i te vai, kae ne oko aka ki oku tuli.

Ne toe fua ne ia te suā 1,000 kae fai ne ia ke fanatu au i loto i te vai, kae ne oko aka a te vai ki oku kautega.

5 I te taimi ne toe fua ei ne ia te suā 1,000, se vaitafe eiloa telā ko se mafai ne au o sasale atu i ei ki te suā feitu, me ko tō ‵poko te vai telā ko ‵tau ei o ‵kau se tino i ei, se vaitafe telā ko se mafai ne se tino o sasale atu i ei ki te suā feitu.

6 Ne fesili mai a ia ki a au: “Ne lavea ne koe te mea tenei, e te tama a te tagata?”

Tenā ne fai ei ne ia au ke sasale kae toe foki ki te kaugutu o te vaitafe. 7 I taku fokimaiga, ne lavea ne au me i te kaugutu o te vaitafe e uke a lakau i feitu e lua.+ 8 Tenā ne fai mai ei a ia: “A te vai tenei e ‵tafe ki kogā koga i te feitu ki saegala kae fanatu foki loa ki loto i te Alapaa*+ kae oko atu ki te tai. Kafai e oko atu ki te tai,+ ko te vai eiloa i konā ko ‵lei. 9 E uke a mea ola e mafai o ola i so se koga e ‵tafe ki ei a vai.* Ka uke a ika, me e ‵tafe atu a te vai tenei ki ei. A te tai ka ‵lei, kae ko mea ola katoa ka ola i so se koga e ‵tafe ki ei te vai.

10 “A tino faiika ka ‵tu i ana tafa mai i Eneketi+ ke oko ki Enekilaima, telā ka isi se koga i ei mo tauaki a tili. Ka uke a vaegā ika valevale, e pelā mo ika o te Tai Lasi.*+

11 “Ka isi ne koga sua‵sua mo koga pelapelā, kae ko koga konei ka se faka‵lei aka. Ka tuku tiaki fua ki te masima.+

12 “A vaegā lakau kaina katoa ka ola i kaugutu o te vaitafe. A olotou lau ka se mage‵mage; io me se ‵fua olotou fuataga. I masina takitasi ka ‵fua mai i ei a fuataga ‵fou, me i te lotou vai e ‵tafe mai eiloa i te koga tapuaki.+ A olotou fuataga ka fai pelā me ne meakai kae ko olotou lau mo faka‵lei aka a masaki.”+

13 Konei a pati a te Aliki Sili ko Ieova ne fai mai: “Tenei te kogā koga telā ka vaevae ne koe mo fai te tofi o matakāiga e 12 o Isalaelu, kae ko Iosefa e lua ana vaega.+ 14 Ka tuku atu ki a koe kae maua a vaega kolā e ‵pau. Au ne tauto ke tuku atu te laukele tenei ki otou tupuga,+ kae nei ko oti ne tuku atu ki a koe e pelā me se tofi.

15 “Tenei te tuakoi o te laukele i te feitu ki mātū: E fanatu mai i te Tai Lasi i te auala ki Hetiloni+ ke oko atu ki Setata,+ 16 Hamata,+ Pelotai+ mo Sipilaima, telā e tu i te va o te kogā fenua o Tamaseko mo te kogā fenua o Hamata, ke oko ki Hasala-hatikono, telā e tu i tafa o te tuakoi o Haulana.+ 17 Tela la, a te tuakoi e tele mai i te tai ki Hasala-enoni,+ i tafa o te tuakoi o Tamaseko i te feitu ki mātū, mo te tuakoi o Hamata.+ Tenei te tuakoi i te feitu ki mātū.

18 “A te feitu ki saegala e tele i te va o Haulana mo Tamaseko kae i tafa o te Iolitana i te va o Kileata+ mo te laukele o Isalaelu. E ‵tau o fua ne koe mai i te tuakoi ke oko atu ki tai* i te feitu ki saegala. Tenei te tuakoi i te feitu ki saegala.

19 “A te tuakoi i te feitu ki saute e vau mai Tamala ke oko ki vai o Melipa-katesa,+ ko fanatu ei ki te Vanu* ke oko ki te Tai Lasi.+ Tenei te tuakoi i te feitu ki saute.

20 I te feitu ki togala ko te Tai Lasi, mai i te tuakoi ke oko ki te mata telā e ‵luta tonu atu ki Lepo-hamata.*+ Tenei te tuakoi i te feitu ki togala.”

21 “E ‵tau o vaevae ne koutou te fenua tenei i a koutou eiloa, i matakāiga e 12 o Isalaelu. 22 E ‵tau o vaevae ne koutou ke fai mo otou tofi mo tino fakaa‵tea e ‵nofo fakatasi mo koutou kolā ne isi ne olotou tama‵liki i te lotou ‵nofoga mo koutou; kae ka fai latou ki a koutou e pelā me ne tino tonu ne fa‵nau i Isalaelu. Ka maua ne latou se tofi i matakāiga o Isalaelu fakatasi mo koutou. 23 E ‵tau o tuku atu ne koutou ki tino fakaa‵tea e ‵nofo i konā se tofi i te kogā koga o te matakāiga e nofo a ia i ei,” ko te folafolaga a te Aliki Sili ko Ieova.