Esekielu

5 “E pelā mo koe, e te tama a te tagata, puke se pelu mata ‵kai ma koe ke fakaaoga e pelā me se ‵vele a te tino ‵kamu ulu. ‵Vele tou ulu mo tou talafa, ko puke ei ne fua mea ‵mafa ke fua ki ei, ko vaevae ei a laulu ki vaega kese‵kese. 2 Ka ‵sunu ne koe se tasi-vae-tolu ki te afi i loto i te fakai māfai ko palele a aso ne nikoi ei te fakai.+ Tenā ko puke ei ne koe te suā tasi-vae-tolu kae katikati fakatamilo ne koe ki te pelu i te fakai,+ kae ko te tasi-vae-tolu fakaoti ka fakasalalau atu ne koe i te matagi, kae ka tapale ne au se pelu o afuli a mea konā.+

3 “E ‵tau foki o puke ne koe ne nai laulu mai i ei kae pelu i loto i tou gatu. 4 Kae puke a nisi mea mai i ei kae ‵pei atu ki loto i te afi kae ‵sunu. Mai konei ka salalau atu ei se afi ki kāiga katoa o Isalaelu.+

5 “Konei a pati a te Aliki Sili ko Ieova ne fai mai: “Tenei a Ielusalema. Ko oti ne tuku ne au a ia i te kogaloto o atufenua, kae fakatamilo a ia ne atufenua. 6 Kae ne ‵teke eiloa a ia ki aku fakamasinoga mo aku tulafono fakavae, kae fai a mea e sili atu i te ma‵sei i lō nisi atufenua mo fenua e fakatamilo i a ia.+ Me ne ‵teke ne latou aku fakamasinoga, kae ne seki sa‵sale latou i aku tulafono fakavae.’

7 “Tela la, konei a pati a te Aliki Sili ko Ieova ne fai mai: ‘Ona ko te uke o fakalavelave ne faka‵tupu ne koe i lō atufenua i ou tafa kae ne seki sasale koe i aku tulafono fakavae io me fakataunu aku fakamasinoga, kae ne tautali koe i fakamasinoga a atufenua e fakatamilo i a koe,+ 8 konei a pati a te Aliki Sili ko Ieova ne fai mai: “Ko ‵teke nei ne au koe, e te fakai,+ kae ka fai ne au te fakamasinoga o koe i mua o nisi atufenua.+ 9 Ka fai ne au i loto i a koe a te mea telā ne seki fai eiloa ne au muamua, mo nisi mea kolā ka se toe fai eiloa ne au, ona ko au faifaiga fakatakalia‵lia katoa.+

10 “‘“Tela la, a tamana i loto i a koe ka kai ne latou olotou tama tāgata,+ kae ka kai ne tama tāgata olotou tamana, kae ka fakaoko atu ne au te fakamasinoga ki a koe kae fakasalalau atu te ‵toega o koutou ki feitu katoa.”’+

11 “‘Tela la, e pelā eiloa mo au e ola,’ ko te folafolaga a te Aliki Sili ko Ieova, ‘ona ko te mea ne fakalailai ne koe toku koga tapuaki ki au tupua fakatakalia‵lia katoa mo au faifaiga matagā katoa,+ ka ‵teke foki ne au a koe; oku mata ka se kilo alofa atu ki a koe, kae ka se fakaasi atu ne au te alofa atafai.+ 12 A te tasi-vae-tolu o koutou ka ‵mate i te famai io me ‵galo atu i loto i a koutou ona ko te oge. A te suā tasi-vae-tolu ka ‵mate atu katoa i ou tafa i te pelu.+ Kae ka fakasalalau atu ne au te tasi-vae-tolu fakaoti ki feitu katoa, kae ka tapale ne au se pelu o afuli a latou.+ 13 Tenā ka palele atu ei toku kaitaua, mo toku ita ki a latou ka galo atu, kae ka lotomalie au.+ Kae ka iloa ei ne latou i a au, Ieova, ne faipati ona ko toku manakoga ke tapuaki mai fua koutou ki a au tokotasi,+ māfai ko oti ne fakaoko atu toku kaitaua ki a latou.

14 “‘Ka fai ne au koe e pelā me se koga ne fakamaseigina kae se mea fakatakalialia ki atufenua ‵pili mai e pelā foki mo te kilokiloga a latou kolā e ui atu i konā.+ 15 Ka fai koe pelā me se mea fakatakalialia mo se mea fakatauemu,+ se fakaakoakoga ke fakaeteete i ei kae se mea fakamataku ki atufenua i ou tafa, māfai ko fakaoko atu ne au te fakamasinoga ki a koe mo te kaitaua mo te ita fakatasi mo fakasalaga ‵mafa. Au, ko Ieova, ko oti ne faipati atu.

16 “‘Ka sana atu ne au ki a latou a matasana tamate tino o te oge ke fakamasei ei latou. A matasana e sana atu ne au ka aumai i ei te fakamaseiga ki a koe.+ Ka fai ne au te oge ke masei atu mō koe mai te ‵kati ifo ki lalo o au meakai.+ 17 Ka uga atu ne au ki a koe a te oge mo manu fe‵kai o te vao,+ kae ka fai ne latou ke fanoa‵noa koutou i te ‵mate o otou tama‵liki. A famai mo te fakamaligi toto ka fai ei koe ke manavase, kae ka aumai ne au te pelu ki luga i a koe.+ Au, ko Ieova, ko oti ne faipati atu.’”