Esekielu

48 “Konei a igoa o matakāiga, e kamata mai i koga ‵mao ki mātū: A te vaega o Tanu+ e tele atu i loto i Hetiloni ke oko ki Lepo-hamata+ ki Hasala-enanu, i tafa o te tuakoi o Tamaseko i te feitu ki mātū, i tafa o Hamata;+ kae e vau mai i te feitu ki saegala ke oko ki te tuakoi i te feitu ki togala. 2 A te vaega o Asela+ e tu i te tuakoi o Tanu, mai te tuakoi i te feitu ki saegala ke oko ki te tuakoi i te feitu ki togala. 3 A te vaega o Nafatali+ e tu i te tuakoi o Asela, mai i te tuakoi i te feitu ki saegala ke oko ki te tuakoi i te feitu ki togala. 4 A te vaega o Manase+ e tu i te tuakoi o Nafatali, mai te tuakoi i te feitu ki saegala ke oko ki te tuakoi i te feitu ki togala. 5 A te vaega o Efalaima e tu i te tuakoi o Manase,+ mai te tuakoi i te feitu ki saegala ke oko ki te tuakoi i te feitu ki togala. 6 A te vaega o Leupena e tu i te tuakoi o Efalaima,+ mai te tuakoi i te feitu ki saegala ke oko ki te tuakoi i te feitu ki togala. 7 A te vaega o Iuta e tu i te tuakoi o Leupena,+ mai i te tuakoi i te feitu ki saegala ke oko ki te tuakoi i te feitu ki togala. 8 I te tuakoi o Iuta, mai te tuakoi i te feitu ki saegala ke oko ki te tuakoi i te feitu ki togala, a te tusaga telā e ‵tau o tuku fakaa‵tea ne koutou e ‵tau o 25,000 kupita* te lauefa+ kae e ‵pau mo te ‵loa o tusaga o nisi matakāiga mai te tuakoi i te feitu ki saegala ke oko ki te tuakoi i te feitu ki togala. A te koga tapuaki ka tu i te kogaloto o te koga tenā.

9 “A te tusaga telā e ‵tau o tuku fakaa‵tea ne koutou ki a Ieova e 25,000 kupita te loa kae 10,000 kupita te lauefa. 10 Tenei te vaega tapu mō faitaulaga.+ E 25,000 kupita i te feitu ki matū, e 10,000 i te feitu ki togala, e 10,000 i te feitu ki saegala, kae 25,000 i te feitu ki saute. A te koga tapuaki o Ieova ka tu i te kogaloto o te koga tenā. 11 Ka fai a te mea tenā ma faitaulaga mai i tama tāgata a Satoka,+ ko latou kolā e tausi faka‵lei ki olotou tiute e fai mai ki a au kae e seki takasē‵se kea‵tea i te taimi ne takasē‵se ei a tino Isalaelu mo tino Levi.+ 12 Ka maua ne latou se vaega o te tusaga o te laukele telā e ‵vae kea‵tea e pelā me se mea tafasili i te tapu, i te tuakoi o tino Levi.

13 “I tafa o te tuakoi o faitaulaga, ka maua ne tino Levi se vaega e 25,000 kupita te loa kae 10,000 kupita te lauefa. (A te loa kātoa e 25,000 kae 10,000 te lauefa.) 14 E se ‵tau mo latou o fakatau atu, fesuiaki, io me tuku atu so se vaega tafasili i te ‵lei o te laukele tenei, me i te mea tenā se mea tapu ki a Ieova.

15 “A te ‵toega o te laukele telā e 5,000 kupita te lauefa i tafa o te tuakoi telā e 25,000 kupita ka fakaaoga ne te fakai+ mo faite a fale mo laukele moukuā. A te fakai ka tu i te kogaloto o te koga tenā.+ 16 Konei a fua o te fakai: A te tuakoi i te feitu ki mātū e 4,500 kupita, a te tuakoi i te feitu ki saute e 4,500, a te tuakoi i te feitu ki saegala e 4,500, kae ko te tuakoi i te feitu ki togala e 4,500. 17 A te laukele moukuā o te fakai e 250 kupita ki mātū, 250 ki saute, 250 ki saegala, kae 250 ki togala.

18 “A te loa o te vaega telā e ‵toe e ‵pau mo te tusaga tapu,+ e 10,000 kupita ki saegala kae 10,000 ki togala. E ‵pau eiloa mo te tusaga tapu, kae ko mea e ‵fua mai i ei ka fai mo meakai a latou kolā e tavini i te fakai. 19 A latou kolā e tavini i te fakai mai i matakāiga katoa o Isalaelu ka fakagalue aka ne latou te laukele.+

20 “A te tusaga kātoa e 25,000 sikuea kupita. E ‵tau o tuku fakatafa ne koutou e pelā me se vaega tapu fakatasi mo te laukele o te fakai.

21 “A te ‵toega o mea i feitu e lua o te tusaga tapu mo te laukele o te fakai ka tuku ma te takitaki.+ Ka maua atu i tafa o te tuakoi telā e 25,000 kupita i te feitu ki saegala mo te feitu ki togala o te tusaga. Ka ‵pau eiloa mo vaega kolā e soko atu ki ei, kae ka fai ma te takitaki. A te tusaga tapu mo te koga tapuaki o te faletapu ka ‵tu i te kogaloto o te koga tenā.

22 “A te laukele o tino Levi mo te laukele o te fakai ka tu i te va o mea a te takitaki. A te kogā koga o te takitaki ka tu i te va o te tuakoi o Iuta+ mo te tuakoi o Peniamina.

23 “E pelā mo te ‵toega o matakāiga, a te vaega o Peniamina e vau mai i te tuakoi ki saegala ke oko ki te tuakoi ki togala.+ 24 A te vaega o Simeona e tafa atu ki te tuakoi o Peniamina,+ mai te tuakoi i te feitu ki saegala ke oko ki te tuakoi i te feitu ki togala. 25 A te vaega o Isakala+ e tafa atu ki te tuakoi o Simeona, mai te tuakoi i te feitu ki saegala ke oko ki te tuakoi i te feitu ki togala. 26 A te vaega o Sepulona e tafa atu ki te tuakoi o Isakala,+ mai te tuakoi i te feitu ki saegala ke oko ki te tuakoi i te feitu ki togala.+ 27 A te vaega o Kato e tafa atu ki te tuakoi o Sepulona,+ mai te tuakoi i te feitu ki saegala ke oko ki te tuakoi i te feitu ki togala. 28 A te tuakoi i te feitu ki saute i tafa o te tuakoi o Kato ka tele atu mai i Tamala+ ki vai o Melipa-katesa,+ ke oko eiloa ki te Vanu*+ mo te Tai Lasi.*

29 “Tenei te laukele telā e ‵tau o vaevae aka ne koutou e pelā me se tofi ki matakāiga o Isalaelu,+ kae konei olotou vaega,”+ ko te folafolaga a te Aliki Sili ko Ieova.

30 “Konei a auala ki tua o te fakai: A te feitu ki mātū e 4,500 kupita.+

31 “A mataloa o te fakai ka fakaigoa e ‵tusa mo matakāiga o Isalaelu. Mai i mataloa e tolu i te feitu ki mātū, e tasi te mataloa mō Leupena, e tasi te mataloa mō Iuta, kae tasi te mataloa mō Levi.

32 “A te feitu ki saegala e 4,500 kupita te loa, kae e tolu a mataloa i ei: e tasi te mataloa mō Iosefa, e tasi te mataloa mō Peniamina, kae tasi te mataloa mō Tanu.

33 “A te feitu ki saute e 4,500 kupita, fakatasi mo mataloa e tolu: e tasi te mataloa mō Simeona, e tasi te mataloa mō Isakala, kae e tasi te mataloa mō Sepulona.

34 “A te feitu ki togala e 4,500 kupita te loa, fakatasi mo mataloa e tolu: e tasi te mataloa mō Kato, e tasi te mataloa mō Asela, kae e tasi te mataloa mō Nafatali.

35 “A feitu katoa e 18,000 kupita. Kae ko te igoa o te fakai mai i te aso tenā o fano ki mua ka taku penei, Ieova e Nofo i Konā.”+