Esekielu

6 Ne toe oko mai te fekau a Ieova ki a au, ana muna: 2 “Te tama a te tagata, ‵fuli atu ou mata ki mauga o Isalaelu kae ‵valo atu o ‵teke ki a latou. 3 E ‵tau mo koe o fai atu, ‘E mauga o Isalaelu, faka‵logo mai ki pati a te Aliki Sili ko Ieova: Konei a pati a te Aliki Sili ko Ieova ne fai atu ki mauga, ki tamā mauga, ki tamā vaitafe mo vanu: “Kiloke! Ka aumai ne au se pelu ke taua atu ki a koutou, kae ka fakamasei ne au otou koga ma‵luga. 4 A otou fatafaitaulaga ka fakamasei, a otou tulaga e ofo atu i ei a mea ma‵nogi ka ofa ki lalo,+ kae ka ‵pei atu ne au otou tino ne tamate ki mua o otou tupua fakatakalia‵lia.*+ 5 Ka ‵pei atu ne au a foitino ‵mate o tino Isalaelu ki mua o olotou tupua fakatakalia‵lia, kae ka laku fakatamilo ne au otou ivi katoa i tafa o otou fatafaitaulaga.+ 6 I koga katoa e ‵nofo koutou i ei, a fakai ka fakamasei+ kae ko koga ma‵luga ka ofa kae tuku ke ta‵tela ki lalo.+ A otou fatafaitaulaga ka ofa kae tuki ki lalo, a otou tupua fakatakalia‵lia ka ‵galo atu, a otou tulaga e ofo atu i ei a mea ma‵nogi ka ‵kati ki lalo, kae ko otou galuega ka ‵solo kea‵tea. 7 Kae ko latou kolā ne tamate ka pa‵kū i loto i a koutou,+ kae ka iloa ei ne koutou i a au ko Ieova.+

8 “‘“Kae ka tuku ne au se ‵toega, me e isi ne tino i a koutou ka ‵sao i te pelu mai i atufenua māfai ko fakasalalau atu koutou i fenua katoa.+ 9 Kae ko latou kolā e ‵sao ka masaua ne latou au i atufenua kolā ne puke fakapagota latou ki ei.+ Ka iloa ne latou i a au ne loto mafatia ona ko te lotou loto sē fakamaoni o ‵fuli kea‵tea mai i a au+ mo olotou mata kolā e ma‵nako malosi ki olotou tupua fakatakalia‵lia.+ Ka ma‵vale latou kae takalia‵lia ki mea matagā katoa mo mea fakatakalia‵lia ne fai ne latou.+ 10 Ka iloa ei ne latou i a au ko Ieova kae ko aku fakamatakutakuga ke fakaoko mai te mala tenei ki luga i a latou e se ne mea fua seai.”’+

11 “Konei a pati a te Aliki Sili ko Ieova ne fai mai: ‘Pati ou lima kae tuki tou vae kae fakaasi atu te fanoanoa ki mea matagā katoa mo mea fakatakalia‵lia kolā ne fai ne te kāiga o Isalaelu, me ka pa‵kū latou i te pelu, i te oge mo te famai.+ 12 A te tino telā e nofo i se koga ‵mao ka mate i te famai, a te tino e nofo pili mai ka mate atu i te pelu, kae ko so se tino e sao mai i mea konei kae ‵toe mai ka mate i te oge; kae ka fakaoko faka‵lei atu ne au toku kaitaua ki luga i a latou.+ 13 Kae ka iloa ei ne koutou i a au ko Ieova,+ māfai ko ta‵kato olotou tino ‵mate i tafa o olotou tupua fakatakalia‵lia, e fakatamilo i olotou fatafaitaulaga,+ i luga i tamā mauga katoa, i luga i taulu o mauga katoa, mai lalo o lakau ola ‵lei katoa, kae mai lalo o kaula o lakau ‵lasi kolā ne fai i ei ne latou olotou taulaga manogi ‵gali ke fakafiafia ei olotou tupua fakatakalia‵lia katoa.+ 14 Ka ‵kapa atu toku lima o taua atu ki a latou kae fakamasei te fenua, kae ko olotou koga ‵nofo katoa ka ma‵sei atu i lō koga lavaki i tafa o Tipila. Kae ka iloa ei ne latou i a au ko Ieova.’”