Esekielu

7 Ne toe oko mai te fekau a Ieova ki a au, ana muna: 2 “E pelā mo koe e te tama a te tagata, konei a pati a te Aliki Sili ko Ieova ne fai ki te fenua o Isalaelu: ‘Se gataga! A te gataga ko oko mai ki feitu e fa o te fenua. 3 A te gataga ko oko atu nei ki luga i a koe, kae ka fakaoko atu ne au toku kaitaua ki luga i a koe, kae ka fakamasino ne au koe e ‵tusa eiloa mo ou auala kae taui atu ki a koe e ‵tusa eiloa mo au faifaiga fakatakalia‵lia katoa ne fai. 4 Oku mata ka se kilo alofa atu ki a koe; io me alofa atafai au,+ me ka aumai ne au ki luga i a koe a ikuga o ou auala, kae ka pokotia koe i ikuga o au faifaiga fakatakalia‵lia.+ Kae ka iloa ei ne koe i a au ko Ieova.’+

5 “Konei a pati a te Aliki Sili ko Ieova ne fai mai: ‘Kiloke! Se puapuaga, ka oko mai se puapuaga tu ‵kese.+ 6 Ka oko mai te gataga; ka oko mai eiloa te gataga; ka tu aka a ia o taua atu ki a koe. Kiloke! Tenā ko oko mai. 7 Ko oko mai tou taimi, a koe telā e nofo i te fenua. Ka oko mai te taimi, a te aso ko pili mai.+ Ka isi se ‵numi valevale kae e se ko te kalaga fiafia i luga i mauga.

8 “‘Ko pili fua o ‵ligi atu ne au toku ita ki luga i a koe,+ kae ka fakaoko katoatoa atu ne au toku kaitaua ki luga i a koe,+ kae ka fakamasino ne au koe e ‵tusa eiloa mo ou auala kae taui atu ki a koe e ‵tusa eiloa mo au faifaiga fakatakalia‵lia katoa ne fai. 9 Oku mata ka se kilo alofa atu ki a koe; io me alofa atafai au.+ Ka aumai ne au ki luga i a koe a ikuga o ou auala, kae ka pokotia koe i ikuga o au faifaiga fakatakalia‵lia. Kae ka iloa ei ne koe i a au ko Ieova, e ta ne au koe.+

10 “‘Kiloke, a te aso! Kiloke, tenā ko vau!+ Ko oko mai tou taimi; a te tokotoko o te fakasalaga ko toka ke fakaaoga ne au kae ko te fakamatamata o te fili ko gasolo aka ki luga. 11 A fakasauaga ko gasolo aka o fai pelā me se tokotoko o amioga ma‵sei.+ Ka se ‵sao atu latou, io me ko olotou koloa io me ko te vaitino io me ko te lotou takutakua. 12 Ka oko mai te taimi, ka oko mai te aso. Ke mo a eiloa ma fiafia a te tino e ‵togi ana mea, kae ke mo a eiloa ma fanoanoa a te tino e fakatau ana mea, me e isi se kaitaua lasi ka oko mai ki luga i te vaitino o latou katoa.+ 13 Me i te tino e fakatau ana mea ka se toe foki ki ana mea ne fakatau atu, faitalia me ne sao atu tena ola, me i te fakaasiga ne fai mō te fenua kātoa. Ka seai se tino e toe foki atu, kae ona ko tena mea ‵se, ka seai eiloa se tino e fakasao tena ola.

14 “‘Ne ili ne latou te pu,+ kae ko tino katoa ko toka, kae e seai se tino e fano ki te taua, me i a au e kaitaua ki tino katoa.+ 15 A te pelu e tuku i tua,+ kae ko te famai mo te oge e ‵nofo i loto. So se tino e nofo i te vao ka mate i te pelu, kae ka ‵ta ne te famai mo te oge a tino i loto i te fakai.+ 16 A olotou tino kolā ne ‵sao ka ‵tele ki mauga, kae e pelā me ne lupe o te vanu, ka ‵tagi fi‵ta a tino taki tokotasi ona ko olotou mea ‵se.+ 17 A olotou lima katoa ka gau‵gau, kae ko olotou tulivae katoa ka moti‵moti mai i ei a vai.+ 18 Ne ‵pei latou ki gatu lautaga,+ kae ko oko ki a latou a te mataku. A tino katoa ka fakamasiasigina, kae ko ulu katoa ka ‵tula.+

19 “‘Ka ‵pei kea‵tea ne latou olotou siliva ki auala, kae ko olotou aulo ka fai pelā me ne mea fakatakalia‵lia ki a latou. E se mafai ne olotou siliva io me ko olotou aulo o faka‵sao latou i te aso o te kaitaua o Ieova.+ Ka se lotoma‵lie latou io me mafai ne latou o faka‵fonu olotou tinae, me ko fai a mea konā* e pelā me ne fatu faka‵siga tino kolā ko te māfuaga o te lotou mea ‵se. 20 Ne fakamata‵mata latou i te ‵gali o olotou mea fakagali‵gali, kae ne faite ne latou ki ei olotou mea fakatusa fakatakalia‵lia, ko olotou tupua fakatakalia‵lia.+ Tenā te pogai ka fai ei ne au a mea konā e pelā me ne mea fakatakalia‵lia ki a latou. 21 Ka tuku atu ne au a mea konā* ki lima o tino fakaa‵tea ke ‵fao ne latou kae ki tino amio ma‵sei o te lalolagi e pelā me ne mea ne maua mai i te taua, kae ka fai fakamasei ne latou.

22 “‘Au ka ‵fuli kea‵tea oku mata mai i a latou,+ kae ka fai fakamasei ne latou toku koga ‵funa,* kae ko tino kai‵soa ka ulu ki loto i ei kae fai fakamasei ne latou.+

23 “‘Faite te filifili,+ me i te fenua ko ‵fonu i fakamasinoga kolā e iku atu ki te fakamaligi toto+ kae ko ‵fonu te fakai i fakasauaga.+ 24 Ka aumai ne au ki loto a mea tafasili i te ma‵sei o atufenua;+ kae ka puke mō latou olotou fale,+ kae ka fakagata ne au te fakamata‵mata o tino ma‵losi, kae ko olotou koga tapuaki ka fai fakamasei.+ 25 Kafai ko oko mai te lotou puapuaga, ka ‵sala latou ki te filemu, kae ka se maua ne latou.+ 26 Ka ‵tao atu a te fakalavelave ki te suā fakalavelave, mo te lipoti ki te suā lipoti, kae ko tino ka salasala ki se fakailoga mai i se pelofeta,+ kae ko te tulafono ka galo atu mai i te faitaulaga mo pati fakatonutonu mai i toeaina.+ 27 A te tupu ka tagi fanoanoa,+ kae ko te takitaki ka seai sena fakamoemoega, kae ko lima o tino o te fenua ka pole‵pole i te ma‵taku. Ka fai ne au ki a latou a mea e ‵tusa mo olotou auala, kae ka fakamasino ne au latou e ‵tusa eiloa mo olotou fakamasinoga. Kae ka iloa ei ne latou i a au ko Ieova.’”+