Esekielu
19 “E ‵tau mo koe o usu se pese fanoanoa e uiga ki takitaki o Isalaelu 2 kae fai atu,
‘A tou mātua se a? Se leona fafine e ‵nofo fakatasi mo leona.
Ne ta‵kato fakatasi a ia mo tamā leona ‵mafi kae puti aka ana tama.
3 Ne puti aka ne ia tena tama e tokotasi, kae ne fai pelā me se tamā leona mafi.+
Ne akoako a ia ke iloa o afuli a manu kae saesae ne ia,
Ne kai foki ne ia a tino.
4 Ne ‵logo a atufenua e uiga ki a ia kae ‵poa aka ne latou a ia i te lotou lua,
Kae ne aumai ne latou a ia ki te fenua o Aikupito mo kafilo e ‵lave i ei.+
5 Ne faka‵tali tou fafine kae fakamuli loa ne iloa ne ia me ko seai se fakamoemoega ke toe foki mai tena tama.
Tenā ne puke ei ne ia tena suā tama kae uga atu ne ia e pelā me se tamā leona mafi.
6 Ne sa‵sale fakatasi a ia mo nisi leona kae ne fai a ia e pelā me se tamā leona mafi.
Ne akoako a ia ke iloa o afuli a manu kae saesae ne ia, kae ne kai foki ne ia a tino.+
7 Ne fanatu a ia i olotou taoa ma‵losi kae fakamasei olotou fakai,
Kae ne mafai o lagona atu a tena ‵gulu i loto i te fenua telā ko masei valevale.+
8 A atufenua mai kogā fenua ‵pili ne o‵mai o taua atu ki a ia ke ‵pei te lotou tili ki luga i a ia,
Kae ne ‵poa aka a ia i loto i te lotou lua.
9 Ne tuku atu ne latou a ia ki loto i se lulu mo kafilo e ‵lave i ei kae aumai a ia ki te tupu o Papelonia.
Ne tausi ne latou a ia i konā, ko te mea ke se toe lagona atu a tena leo i mauga o Isalaelu.
10 A tou mātua ne fai pelā me se vine+ i tou toto, e ‵toki i tafa o vai.
Ne ‵fua mai ne ia a fuagalakau kae uke ana kaula ona ko te uke o vai.
11 Ne ‵tupu mai i ei a kaula* ma‵losi, kolā e fetaui ‵lei ke fai pelā me ne tokotoko o tino pule.
Ne ola aka kae maluga atu i nisi lakau,
Kae ne mafai o lavea atu ona ko tena maluga kae ona ko te uke o ana lau.
12 Kae ona ko te kaitaua ne unu aka ei a ia+ kae ‵pei ki te laukele,
Kae ne paku‵paku ana fuagalakau ona ko te matagi mai te feitu ki saegala.
Ana kaula ma‵losi ne ‵fati ki lalo kae paku‵paku,+ kae ne ‵ka i te afi.+
13 Nei la, ko ‵toki a ia i te koga lavaki,
I se laukele malō kae e seai ne vai i ei.+
14 Ne salalau atu te afi mai i ana kaula kae ne ‵ka i ei ana somo mo ana fuagalakau,
Kae seai eiloa se kaula* malosi e ‵toe mai i ei, ko seai foki se tokotoko a te pule.+
“‘A te mea tenā se pese fanoanoa, kae ka fai eiloa e pelā me se pese fanoanoa.’”