Esekielu

20 Nei la, i te fitu o tausaga, i te lima o masina, i te po sefulu o te masina, ne o‵mai a nisi toeaina o Isalaelu kae saga‵saga ki lalo i oku mua ke fesili atu ki a Ieova. 2 Tenā ne oko mai ei te fekau a Ieova ki a au, ana muna: 3 “Te tama a te tagata, faipati atu ki toeaina o Isalaelu, kae fai atu ki a latou, ‘Konei a pati a te Aliki Sili ko Ieova ne fai mai: “A koutou e o‵mai o fesili mai ki a au? ‘E pelā eiloa mo au e ola, ka se tali atu eiloa au ki te otou fesili,’+ ko te folafolaga a te Aliki Sili ko Ieova.”’

4 “E a, ko toka koe o fakamasino latou? E a, ko toka koe o fakamasino latou, e te tama a te tagata? Fai ke iloa ne latou a mea fakatakalia‵lia kolā ne fai ne olotou tupuga.+ 5 Fai atu ki a latou, ‘Konei a pati a te Aliki Sili ko Ieova ne fai mai: “I te aso ne filifili ei ne au a Isalaelu,+ ne tauto foki au ki tama o te kāiga o Iakopo, kae ne fakaasi atu ne au a au eiloa ki a latou i te fenua o Aikupito.+ Ao, ne tauto au ki a latou kae fai atu, ‘Au ko Ieova te otou Atua.’ 6 I te aso tenā ne tauto atu ei au me ka aumai ne au latou ki tua mo te fenua o Aikupito ki se fenua ne salasala ne au mō latou, se fenua telā e ‵tafe i ei a susu mo hani.+ Ko te ‵toe fenua gali eiloa i fenua katoa. 7 Tenā ne fai atu ei au ki a latou, ‘E ‵tau mo koutou taki tokotasi o ‵pei kea‵tea a mea fakatakalia‵lia katoa i mua o koutou; ke mo a ma fakalai‵lai ne koutou a koutou eiloa ki tupua fakatakalia‵lia* o Aikupito.+ Au ko Ieova te otou Atua.’+

8 “‘“Kae ne ‵teke mai eiloa latou ki a au kae seki fia faka‵logo mai ki a au. Ne seki ‵pei kea‵tea ne latou a mea fakatakalia‵lia i mua o latou, kae ne seki tiaki ne latou a tupua fakatakalia‵lia o Aikupito.+ Tenā ne tauto ei au ke ‵ligi atu toku kaitaua ki luga i a latou kae ke fakaoko katoatoa atu toku kaitaua ki a latou i te fenua o Aikupito. 9 Kae ne gasuesue eiloa au ona ko toku igoa ko te mea ke se fakalailai i mua o atufenua kolā e ‵nofo latou i ei.+ Me ne fakaasi atu ne au a au eiloa ki a latou* i te taimi ne aumai ei ne au latou* ki tua mo te fenua o Aikupito.+ 10 Tenā ne aumai ei ne au latou ki tua mo te fenua o Aikupito kae ‵taki atu latou ki loto i te koga lavaki.+

11 “‘“Tenā ne tuku atu ei ne au aku tulafono fakavae kae fakailoa atu ki a latou a ikuga o aku fakamasinoga,+ ko te mea ke maua ne te tagata telā e tautali i ei a te ola e auala i mea konā.+ 12 Ne tuku atu foki ne au aku sapati ki a latou+ e pelā me se fakailoga i toku va mo latou,+ ko te mea ke iloa ne latou i a au, Ieova, ko te tino telā e faka‵malu ne au latou.

13 “‘“Kae ne ‵teke mai eiloa te kāiga o Isalaelu ki a au i te koga lavaki.+ Ne seki sa‵sale latou i aku tulafono fakavae, kae ne ‵teke ne latou a ikuga o aku fakamasinoga, kolā kafai e tautali se tagata i ei, ka maua ne ia te ola e auala i mea konā. Ne soli katoatoa ne latou aku sapati. Tenā ne tauto ei au ke ‵ligi ifo toku kaitaua ki luga i a latou i te koga lavaki ke fakaseai atu ei latou.+ 14 Ne gasuesue eiloa au ona ko toku igoa ko te mea ke se fakalailai i mua o atufenua, kolā ne lavea ne latou te aumaiga ne au o latou* ki tua.+ 15 Ne tauto foki au ki a latou i te koga lavaki me ka se aumai ne au latou ki loto i te fenua telā ne tuku atu ne au ki a latou+​—se fenua telā e ‵tafe i ei a susu mo hani,+ ko te ‵toe fenua gali eiloa i fenua katoa​— 16 ona ko te mea ne ‵teke ne latou a ikuga o aku fakamasinoga, ne seki sa‵sale latou i aku tulafono fakavae, kae ne soli foki ne latou aku sapati, me i olotou loto ne tau‵tali atu i tua o olotou tupua fakatakalia‵lia.+

17 “‘“Kae ne alofa eiloa au ki a latou, kae ne seki ‵ta fakapalele ne au latou; ne seki tamate ne au latou i te koga lavaki. 18 Ne fai atu au ki olotou tama i te koga lavaki,+ ‘Ke mo a ma sa‵sale i tulafono fo‵liki a otou tupuga+ io me tausi ki olotou fakamasinoga io me fakalailai a koutou eiloa ki olotou tupua fakatakalia‵lia. 19 Au ko Ieova te otou Atua. Sa‵sale i aku tulafono fakavae, kae tausi ki ikuga o aku fakamasinoga, kae tau‵tali i ei.+ 20 Kae faka‵malu aku sapati,+ kae ka fai a mea konā e pelā me se fakailoga i toku va mo koutou, ko te mea ke iloa ne koutou i a au ko Ieova te otou Atua.’+

21 “‘“Kae ne kamata o ‵teke mai a tama konā ki a au.+ Ne seki sa‵sale latou i aku tulafono fakavae, kae ne seki tausi kae tau‵tali atu latou i ikuga o aku fakamasinoga, kolā kafai e tautali se tagata i ei, ka maua ne ia te ola e auala i mea konā. Ne soli ne latou aku sapati. Tenā ne tauto ei au ke ‵ligi atu toku kaitaua ki luga i a latou kae fakaoko katoatoa atu toku kaitaua ki a latou i te koga lavaki.+ 22 Kae ne taofi aka ne au te mea tenā+ kae ne gasuesue au ona ko toku igoa,+ ko te mea ke se fakalailai i mua o atufenua, kolā ne lavea ne latou te aumaiga ne au o latou* ki tua. 23 Ne tauto atu foki au ki a latou i te koga lavaki me ka fakasalalau atu ne au latou ki atufenua kae fakamavaevae atu latou i luga i te fenua,+ 24 me ne seki tau‵tali latou i ikuga o aku fakamasinoga kae ne ‵teke ne latou aku tulafono fakavae,+ ne soli ne latou aku sapati, kae ne tau‵tali atu latou i tua o tupua fakatakalia‵lia o olotou tupuga.+ 25 Ne talia foki ne au latou ke tau‵tali i tulafono fo‵liki kolā e se ‵lei mo ikuga o fakamasinoga kolā e se maua ne latou i ei te ola.+ 26 Ne fai ne au latou ke lai‵lai i olotou taulaga eiloa​—i te taimi e ‵sunu ei ne latou olotou toekimua katoa i te afi+​—ko te mea ke fakamasei atu latou, kae ke iloa ne latou i a au ko Ieova.”’

27 “Tela la, faipati atu ki te kāiga o Isalaelu, e te tama a te tagata, kae fai atu ki a latou, ‘Konei a pati a te Aliki Sili ko Ieova ne fai mai: “I te auala foki tenei, a otou tupuga ne fai ne latou a pati sē ‵lei ki a au mai te sē fakamaoni mai ki a au. 28 Ne aumai ne au latou ki te fenua ne tauto au ke tuku atu ki a latou.+ I te taimi ne lavea ei ne latou a mauga ma‵luga mo lakau lau usiusi katoa,+ ne kamata o ofo atu ne latou olotou taulaga mo olotou taulaga fakatakalia‵lia. Ne ofo atu ne latou olotou taulaga manogi ‵gali kae ‵ligi ki tua olotou taulaga meainu i konā. 29 Tenā ne fesili atu ei au ki a latou, ‘Se a te uiga o te koga maluga telā e olo koutou ki ei? (Koi fakaigoa eiloa ki te Koga Maluga ke oko mai ki te aso nei.)’”’+

30 “Nei la, fai atu ki te kāiga o Isalaelu, ‘Konei a pati a te Aliki Sili ko Ieova ne fai mai: “E a, ko fakalailai ne koe a koe eiloa i te auala ne fakalailai ei ne ou tupuga a latou mai te tau‵tali atu i olotou tupua fakatakalia‵lia ke fai a faifaiga talitāgata i te feitu faka-te-agaga mo latou?+ 31 Kae e a, ko fakalai‵lai foki ne koutou a koutou eiloa ke oko mai ki te aso nei mai te ofoatuga o taulaga ki otou tupua fakatakalia‵lia katoa, kae ‵sunu otou tama‵liki i te afi?*+ E a, e ‵tau mo au o tali atu i te taimi eiloa tenā ki otou fesili, e te kāiga o Isalaelu?”’+

“‘E pelā eiloa mo au e ola,’ ko te folafolaga a te Aliki Sili ko Ieova, ‘Ka se tali atu eiloa au ki otou fesili.+ 32 Kae ko te mea i otou mafaufau i te taimi ne fai aka ei koutou, “Ke na fai tatou e pelā mo nisi atufenua, e pelā mo kāiga o nisi fenua, kolā e tapuaki ki lakau mo fatu,”+ ka se tupu eiloa a te mea tenā.’”

33 “‘E pelā eiloa mo au e ola,’ ko te folafolaga a te Aliki Sili ko Ieova, ‘ka pule au e pelā me se tupu ki a koe mo te lima malosi mo te lima mafi, mo te kaitaua lasi.+ 34 Ka aumai ne au koutou ki tua mai i te fenua kae fakamaopoopo fakatasi koutou mai i fenua kolā ne fakasalalau atu koutou ki ei ki te lima malosi mo te lima mafi, mo te kaitaua lasi.+ 35 Ka aumai ne au koutou ki te koga lavaki o te fenua kae aofia i se fakamasinoga mo koutou i konā, mata ki mata.+

36 “‘I te taimi eiloa ne aofia ei au i te fakamasinoga fakatasi mo otou tupuga i te koga lavaki o te fenua o Aikupito, ka aofia foki au i te fakamasinoga fakatasi mo koutou,’ ko te folafolaga a te Aliki Sili ko Ieova. 37 ‘Ka fai ne au koutou ke olo mai lalo i te tokotoko a te tausi mamoe+ kae aumai koutou ke ‵nofo mai lalo i te feagaiga. 38 Kae ka ave kea‵tea ne au mai i a koutou a tino ‵teke mo latou kolā e ‵teke mai ki a au.+ Me ka aumai ne au latou ki tua mo te fenua fakaa‵tea ne ‵nofo latou i ei, kae ka se ulu atu eiloa latou ki loto i te fenua o Isalaelu;+ kae ka iloa ei ne koutou i a au ko Ieova.’

39 “E pelā mo koutou, e te kāiga o Isalaelu, konei a pati a te Aliki Sili ko Ieova ne fai mai: ‘Koutou taki tokotasi olo o tavini ki otou tupua fakatakalia‵lia.+ Ka oti aka, kafai e se faka‵logo mai koutou ki a au, ka se toe mafai eiloa ne koutou o fakalailai a toku igoa tapu e auala i otou taulaga mo otou tupua fakatakalia‵lia.’+

40 “‘Me i luga i toku mauga tapu, i luga i se mauga maluga o Isalaelu,’+ ko te folafolaga a te Aliki Sili ko Ieova, ‘ko te koga telā ka tavini mai ei ki a au a te kāiga kātoa o Isalaelu, ko latou katoa i te fenua.+ Ka fiafia au ki a latou i konā, kae ka manako au ki otou meaalofa mo fuataga muamua o otou taulaga, ko otou mea tapu katoa.+ 41 Ona ko te manogi gali, ka fiafia eiloa au ki a koutou māfai ko aumai ne au koutou ki tua mo te fenua kae fakamaopoopo fakatasi koutou i fenua ne fakasalalau atu koutou ki ei;+ kae ka faka‵malu ei au i mua o koutou, i mua o mata o atufenua katoa.’+

42 “‘Kae ka iloa ei ne koutou me i a au ko Ieova+ māfai ko aumai ne au koutou ki te fenua o Isalaelu,+ ki te fenua ne tauto au ke tuku atu ki otou tupuga. 43 Kae i konā, ka masaua ei ne koutou otou amioga mo otou faifaiga katoa kolā ne fakalailai ei ne koutou a koutou eiloa,+ kae ka takalia‵lia koutou ki a koutou eiloa ona ko mea ma‵sei katoa ne fai ne koutou.+ 44 Tenā ko iloa ei ne koutou i a au ko Ieova māfai ko saga atu au ki a koutou ona ko toku igoa,+ kae e se ona ko otou amioga ma‵sei io me ona ko te otou fai mea piko‵piko, e te kāiga o Isalaelu,’ ko te folafolaga a te Aliki Sili ko Ieova.”

45 Kae ne toe oko mai te fekau a Ieova ki a au, ana muna: 46 “Te tama a te tagata, ‵fuli atu ou mata ki te feitu ki saute kae folafola atu ki te feitu ki saute, kae ‵valo atu ki te vao o te feitu ki saute. 47 Fai atu ki te vao o te feitu ki saute, ‘Fakalogo mai ki te fekau a Ieova. Konei a pati a te Aliki Sili ko Ieova ne fai mai: “Ko faka‵ka nei ne au se afi ke ula atu ki a koe,+ kae ka ‵ka i ei a lakau lanu launiu katoa mo lakau paku‵paku katoa i loto i a koe. A te ulaga afi ka se mafai o tamate,+ kae ko mata katoa ka ‵paku i ei, mai te feitu ki mātū ke oko ki te feitu ki saute. 48 Kae ka lavea mai ne tino katoa me i a au Ieova, ne faka‵ka ne au te afi ko te mea ke se mafai o tamate.”’”+

49 Kae ne fai aka au: “Oi aue, e te Aliki Sili ko Ieova! E fai mai latou e uiga ki a au, ‘E a, ko faipati mai fua a ia nei ki tala fakatusa?’”*