Hosea
9 “Tino Isalaelu, sa fia‵fia,+
Sa fai ke fia‵fia koutou e pelā mo nisi tino.
Me i a koutou ne takasē‵se kea‵tea mai te otou Atua ona ko otou faifaiga talitāgata.+
Ne fia‵fia eiloa koutou ki te peofuga o te fafine talitāgata i koga solo saito katoa.+
2 Kae ka se fagai latou ne te koga solo saito mo te mea ‵tau uaina,
Kae ka se toe ai ne uaina ‵fou e maua mai i ei.+
3 Ka se ‵nofo faeloa latou i te fenua o Ieova;+
I lō te fai penā, a Efalaima ka toe foki atu ki Aikupito,
Kae ka ‵kai latou ki mea sē ‵ma i Asulia.+
4 Ka se toe ‵ligi ne latou a taulaga uaina ki a Ieova;+
A olotou taulaga ka se fakafiafia atu ki a ia.+
Ka fai latou e pelā mo te falaoa o te fanoanoa;
Kae ko tino kolā e ‵kai ki ei ka lai‵lai.
Me i te lotou falaoa ne fai mō latou eiloa;
Ka se oko mai ki loto i te fale o Ieova.
5 Se a te mea ka fai ne koe i te aso o te maopoopoga,
I te aso o te ‵kaiga fiafia a Ieova?
6 Kiloke! e ‵tau o ‵tele kea‵tea latou ona ko te fakamaseiga.+
Ka fakamaopoopo fakatasi ne Aikupito a latou,+ kae ka tanu latou ne Mefisi.+
A lakau tala‵tala ka ‵solo i luga i olotou kope siliva tāua,
Kae ko vao lakau makai‵kai ka fai mo olotou faleie.
7 Ka oko mai eiloa a aso o te iloiloga,+
Ka oko mai a aso e taui atu ei,
Kae ka iloa ne Isalaelu te mea tenā.
A te lotou pelofeta ka fakavalevale, kae ko te tagata e fakaosofia ne te agaga ka valea;
Ona ko te uke o otou mea ‵se, ka lasi eiloa te takalialiaga ki a koutou.”
8 A te leoleo+ o Efalaima ne ‵nofo mo toku Atua.+
Kae ko auala katoa o ana pelofeta+ ko fai nei pelā me ne matasele a te tino ‵po manu eva;
Ko isi ne takalia‵liaga i loto i te fale o tena Atua.
9 Ko ‵goto malosi latou ki lalo i te fakamaseiga, e pelā eiloa mo aso o Kipea.+
Ka masaua ne ia te lotou mea ‵se kae fakasala ona ko olotou agasala.+
10 “Ne maua ne au a Isalaelu e pelā me ne fuagavine i te koga lavaki.+
Ne lavea ne au ou tupuga e pelā mo mati muamua i luga i te lakau ko te mati.
Kae ne olo atu latou ki a Paala o Peolo;+
Ne tuku atu ne latou a latou eiloa ki te mea fakatakalialia,+
Kae ko fakatakalia‵lia latou e pelā eiloa mo te mea e a‵lofa latou ki ei.
11 A te ‵malu o Efalaima ko eva kea‵tea e pelā me se manu eva;
Ko seai ne tino e fa‵nau, seai ne tino fai‵tama, kae ko seai se faka‵fuaga o tama‵liki.+
12 Kafai foki loa e puti aka ne latou ne tama‵liki,
Ka fai ne au ke seai ne olotou tama‵liki ke oko eiloa ki te taimi ko seai ei se tagata e ‵toe;+
Ao, kalofa eiloa i a latou māfai ko fulitua atu au ki a latou!+
13 A Efalaima, telā ne ‵toki i se laukele moukuā, ne fai pelā mo Tulo ki a au;+
Nei la, ko ‵tau mo Efalaima o aumai ana tama ki tua ke tamate.”
14 Ieova, avatu ki a latou a mea kolā e ‵tau o tuku atu ne koe ki a latou;
Se moegatama telā e ‵to a tama i ei mo ū kolā e ‵masa.
15 “A olotou amioga ma‵sei katoa ne fai i Kilikala,+ me tenā te koga ne takalialia ei au ki a latou.
Ka afuli kea‵tea ne au latou mai i toku fale ona ko olotou faifaiga matagā.+
Ka se toe alofa au ki a latou;+
Kae ko olotou pelenise katoa e loto ma‵keke.
16 A Efalaima ka ta ki lalo.+
Ka paku‵paku olotou aka, kae ka seai ne fuagalakau e ‵fua mai i a latou.
Kafai foki loa e fa‵nau latou, ka fai ne au ke ‵mate olotou tama pele.”