Ioelu
1 Ko te fekau a Ieova ki a Ioelu* te tama tagata a Petuelu:
2 “Faka‵logo mai ki te mea tenei, koutou e toeaina,
Kae ‵saga tonu mai, koutou e tino o te fenua.*
Kai isi eiloa se mea penei ne tupu i otou aso
Io me ko aso o otou tupuga?+
3 Fakailoa atu te mea tenā ki otou tama,
Kae ke na fakailoa atu ne otou tama ki olotou tama,
Kae ko olotou tama ki te suā kautama.
4 A mea ne ‵toe mai i seakelise fakamasei mea, ne kai ne te mumuga seakelise;+
Kae ko mea ne ‵toe mai i te mumuga seakelise, ne kai ne seakelise e seai ne kapakau;
Kae ko mea ne ‵toe mai i seakelise e seai ne kapakau, ne kai ne seakelise fe‵kai.+
5 Ala mai, koutou e tino ko‵nā,+ kae ‵tagi mautuutu!
‵Tagi fanoa‵noa, koutou katoa tino inu uaina,
Me i te uaina magalo ko oti ne ave kea‵tea mai i otou gutu.+
6 Me ne oko mai se atufenua ki toku fenua, e malosi kae e se mafai o lau aka.+
Ana nifo ne nifo o se leona,+ kae ko ana kauvae e pelā mo kauvae o se leona.
7 Ne fakamasei ne ia taku vine kae ‵fuli taku lakau ko te mati ke fai fua pelā me se tafito,
Ne ‵fole katoatoa a lakau konā kae ‵pei kea‵tea,
Kae ko olotou kaula ko ‵kena eiloa.
8 Tagi fanoanoa e pelā me se tamafine ‵ma e pei ki gatu lautaga
E tagi ki te tagata ne avaga mo ia kae koi talavou.
9 Ko oti ne taofi aka a taulaga meakai+ mo taulaga meainu+ mai i te faletapu o Ieova;
E ‵tagi fanoa‵noa eiloa a faitaulaga, kolā ko tavini a Ieova.
10 A fatoaga ko oti ne fakamasei, a te laukele ko fanoanoa;+
Me i saito ko oti ne fakamasei, a te uaina fou ko masa, a sinu ko seai.+
11 A tino ‵toki lakau ko fanoa‵noa, a tino ga‵lue i togavine ko ‵tagi fanoa‵noa,
Ona ko saito mo kalite,
Me i fuataga o te fatoaga ko oti ne fakamasei.
12 A te vine ko pakupaku,
A te lakau ko te mati ko magemage.
A te pomekalanite, te pama, mo te apolo,
Ko lakau katoa i te fatoaga ko paku‵paku;+
Me i te fiafia ko oti ne ‵fuli ki te masiasi i loto i te fenua.
13 ‵Pei ki gatu lautaga kae fanoa‵noa koutou e faitaulaga;
‵Tagi fanoa‵noa koutou e tavini o te fatafaitaulaga.+
O‵mai ki loto kae ‵moe i te po mo otou gatu lautaga, koutou e tavini a toku Atua;
Me ko oti ne taofi aka a taulaga meakai+ mo taulaga meainu+ mai i te fale o te otou Atua.
14 Folafola atu ke fai se fakalikilikiga; fakailoa atu ke fai se maopoopoga ‵malu.+
Fakamaopoopo mai a toeaina katoa, fakatasi mo tino katoa o te fenua,
Ki te fale o Ieova te otou Atua,+ kae ka‵laga atu ki a Ieova mō se fesoasoani.
15 Ka‵lofa eiloa i a koutou ona ko te aso tenā!
Me i te aso o Ieova ko pili mai,+
Kae ka oko mai e pelā me se fakamaseiga mai i te Atua Malosi Katoatoa!
16 E a, e seki ave kea‵tea a meakai mai i ‵tou mua,
Mo te ‵lifu mo te fia‵fia mai te fale o te ‵tou Atua?
17 A fuaga ko paku‵paku mai lalo o olotou sevolo.
Ko oti ne ofa a fale e ‵teu ei a mea.
Ko oti ne fakamasei a fale ‵teu saito, me i saito ko paku‵paku.
18 Ko ‵tagi foki a lafu manu!
A lafu pulumakau ko olo valevale fua mo te ‵numi, me ko seai ne olotou laukele moukuā!
Kae ko lafu mamoe ko amo ne latou te fakasalaga.
19 Ieova, ka kalaga atu au ki a koe;+
Me i laukele moukuā o te koga lavaki ko oti ne ‵ka i te afi,
Kae ko lakau katoa o te fatoaga ne ‵ka i te ulaga o te afi.
20 Ke oko foki ki manu fe‵kai e ma‵nako malosi latou ki a koe,
Me i tamā vaitafe ko ‵masa pakupaku
Kae ko oti ne fakamasei i te afi a laukele moukuā o te koga lavaki.”