Nauma
3 Kalofa eiloa i te fakai fakamaligi toto!
Ko ‵fonu eiloa i te loi mo te kaisoa.
E faigata o seai ne ana mea e ‵fao!
2 E lagona atu te pa‵ke o te ‵kiniga mo te ‵tagi o teka,
Te ma‵kini o solofanua mo te mapunapuna o te kaliota.
3 A te tagata e sopo i te solofanua, te pelu malapulapu, te tao matilotilo,
Ko tino e tokouke ne tamate mo te fakaputuga o foitino ‵mate
—E seai se gatamaiga ki foitino ‵mate.
E ‵siga faeloa latou i luga i foitino ‵mate.
4 E fai penei ona ko te uke o faifaiga talitāgata a fāfine talitāgata,
Ko tou fafine telā e tinogali kae matagali, se fafine faivailakau,
Telā e malei ne ia a atufenua e auala i ana faifaiga talitāgata kae malei foki ne ia a kāiga e auala i ana faifaiga faivailakau.
5 “Kiloke! Au e ‵teke ki a koe,” ko te folafolaga a Ieova o kautau,+
“Ka ‵suke ne au tou lavalava ke pulou ki ei ou mata;
Ka fai ne au ke lavea ne atufenua tou nofo fuafua,
Kae ke lavea foki ne malo a tou masiasi.
6 Kae ka laku ne au ki luga i a koe a mea lai‵lai
Kae fai koe ke takalialiagina;
Kae ka fai ne au koe e pelā me se mea fakamaimoa.+
7 A tino katoa e lavea ne latou koe ka ‵tele kea‵tea mai i a koe+ kae fai aka,
‘A Nineva ko oti ne ofa ki lalo!
Ko oi e alofa ki a ia?’
Tefea te koga ka maua ne au i ei a tino fakamafanafana mō koe?
8 E a, e ‵lei atu koe i a Noamoni,*+ telā ne sagasaga i tafa o vai o te Naila?+
Ne fakatamilo a ia ne vai;
A tena maumea ko te tai kae ko ana ‵pui ko te tai.
9 Aitiope ko te pogai o tena malosi telā e seai se gatamaiga, e pelā foki Aikupito.
A Puti+ mo Lipia ko ou tino fesoasoani.+
10 Kae ko ia ne ave foki fakapagota;
Ne puke fakapagota a ia.+
Ana tama‵liki ne tuki palapala foki i ‵kōna o auala katoa.
Ne fai olotou vili ki ana tāgata fakaaloalogina,
Kae ko ana tāgata sili katoa ne saisai ki filifili.
11 A koe foki ka konā;+
A koe ka fano o ‵muni.
Ka taumafai foki koe o faka‵lafi mai te fili.
12 Ou ‵pui ma‵losi katoa ka pelā mo lakau ko mati mo olotou fuataga muamua ko ‵pala;
Kafai ko lūlū, ko ‵to ei ki lalo i gutu o tino kolā ka kai ne latou.
13 Kiloke! Au kautau ko pelā mo fāfine i te va o koe.
A mataloa o tou fenua ka tuku ma‵tala ki ou fili.
A lakau faka‵lava o ou mataloa ka ‵sunu ki te afi.
14 Asu mai a vai mō te nikoiga!+
Fakama‵losi aka ou ‵pui ma‵losi.
Fano ki lalo i te pela kae lakalaka a te kele;
Faite a puliki.
15 Ka ‵sunu koe ne te afi māfai e nofo koe i konā.
Ka ‵kati koe ki lalo ne se pelu.+
Ka kai ne ia koe e pelā mo mea e fai ne tamā seakelise.+
Fai ke tokouke koutou e pelā mo tamā seakelise!
Ao, fai ke tokouke koutou e pelā mo seakelise!
16 Ko oti ne fakaopoopo ne koe ou tino fai pisinisi ke tokouke atu i fetū o te lagi.
A te tamā seakelise e ‵fole ne ia tena pa‵kili ko eva ei kea‵tea.
17 Ou leoleo e pelā mo seakelise,
Kae ko ou ofisa e pelā mo se mumuga seakelise.
E ‵nofo latou i loto i lulu fatu i se aso ‵moko,
Kae kafai ko ‵kasa te la, ko eva ei latou kea‵tea;
Kae seai se tino e iloa ne ia te koga ne olo latou ki ei.
18 Ou tausi mamoe e tule‵moe, e te tupu o Asulia;
Ou tino tāua e ‵nofo i olotou koga ‵nofo.
Ou tino e salalau i luga i mauga,
Kae seai se tino e fakamaopoopo fakatasi ne ia latou.+
19 E seai se fakatapūga mō tou fakalavelave.
A tou pakiaga ko se mafai o fai ke mafu.