Sakalia

5 Ne toe kilo aka au kae lavea ne au se peluga tusi e eva. 2 Ne fesili mai a ia ki a au: “Se a tau mea e lavea?”

Ne tali atu au: “E lavea ne au se peluga tusi e eva, telā e 20 kupita* te loa kae 10 kupita te lauefa.”

3 Tenā ne fai mai ei a ia ki a au: “Tenei te mala telā ko oko atu ki koga katoa o te lalolagi, me i tino katoa kolā e kai‵soa,+ e pelā mo te mea e tusi i tena feitu e tasi, ne seki fakasala; kae ko tino katoa kolā e fai olotou tautoga,+ e pelā mo te mea e tusi i tena suā feitu, ne seki fakasala. 4 ‘Ko oti ne uga atu ne au te mala,’ ko te folafolaga a Ieova o kautau, ‘kae ka ulu atu ki loto i te fale o te tino kaisoa mo te fale o te tino e tauto fakaloiloi i toku igoa; kae ka nofo eiloa i loto i te fale tenā kae fakamasei ne ia te fale tenā fakatasi mo laupapa mo ana fatu.’”

5 Tenā ne vau ei ki mua a te agelu telā ne fai‵pati mo au kae fai mai ki a au: “Kilo aka ou mata, fakamolemole, kae onoono atu ki te mea telā ko fano ki tua.”

6 Ne fesili atu au: “Se a te mea tenā?”

Ne tali mai a ia: “A te mea tenei e fano ki tua se ato e fua ki ei a saito.”* Ne toe faka‵soko mai a ia: “E penei olotou foliga i koga katoa o te lalolagi.” 7 Kae ne lavea ne au me ne sau aka a te ‵pono pukupuku telā ne faite ki pōlo fiti, kae e isi se fafine e sagasaga mai i loto i te ato tenā. 8 Ne fai mai a ia: “A ia tenei ko Amioga Masei.” Tenā ne toe ‵pei ei ne ia tou fafine ki loto i te ato tenā, kae teke atu ne ia te ‵pono telā ne faite ki pōlo fiti ki te gutu o te ato tenā.

9 Tenā ne kilo aka ei au kae lavea ne au a fāfine e tokolua e o‵mai ki mua, kae ma‵kini eiloa i te matagi. E isi ne lā kapakau e pelā mo kapakau o te sikala. Kae ne sau aka ne lāua te ato tenā i te va o te lalolagi mo te lagi. 10 Ne fesili atu au ki te agelu ne fai‵pati mo au: “E ave ne lāua ki fea a te ato tenā?”

11 Ne tali mai a ia: “Ki te fenua ko Sina*+ ke faite se fale mō tou fafine; kae kafai ko toka, ko tuku atu ei a ia ki konā i tena koga tonu.”