Sakalia
11 “‵Tala ou mataloa, e Lepanona,
Ko te mea ke ‵ka i te afi ou alasi.
2 Tagi fanoanoa, e te lakau ko te iunipa, me i te alasi ko siga;
A lakau ‵gali ko oti ne fakamasei!
‵Tagi, e oka o Pasana,
Me i te togavao ko siga ki lalo!
3 Faka‵logo aka! Ko te ‵tagi fanoanoa o tausi mamoe,
Me ko oti ne ofa ki lalo te lotou ‵malu.
Faka‵logo aka! Ko te ‵tagi o tamā leona,
Me i te vaopupu lasi i tafa o te Iolitana ko oti ne fakamasei.
4 “Konei a pati a Ieova toku Atua ne fai mai, ‘Tausi a mamoe kolā ka ave o tamate,+ 5 e tamate latou ne tino kolā e ‵togi ne latou a mamoe+ kae e se fakasala latou i ei. Kae ko latou kolā e fakatau atu ne latou a mamoe+ e fai aka, “Ke vikia a Ieova, me i a au ka maumea.” Kae ko olotou tausi mamoe e se a‵lofa atafai ki a latou.’+
6 “‘Me ka se toe fakaasi atu ne au te alofa atafai ki tino e ‵nofo i te fenua,’ ko te folafolaga a Ieova. ‘Tela la, ka tuku atu ne au a tāgata taki tokotasi ki lima o olotou tuakoi mo olotou tupu; kae ka tuki pala ne latou te laukele, kae ka se faka‵sao ne au latou mai i olotou lima.’”
7 Kae ne kamata au o tausi ki te lafu mamoe telā ka ave o tamate,+ ona ko koutou, e mamoe puapuaga o te lafu. Tenā ne puke ei ne au a tokotoko e lua, kae ne fakaigoa ne au te mea e tasi ko Gali, kae ko te suā mea ko ‵Kau Fakatasi,+ kae ne kamata o tausi ne au a te lafu mamoe. 8 Kae ne faka‵tea ne au a tausi mamoe e tokotolu i te masina e tasi, me ne kamata o se lava toku kufaki ki a latou, kae ne takalia‵lia mai foki latou ki a au. 9 Kae ne fai atu au: “Ka se tumau au i te tausi atu ki a koutou. A te tino telā ka mate ke na mate eiloa, kae ko te tino telā ka fakaseai atu ke na fakaseai atu eiloa. Kae ko latou kolā e ‵toe, ke kai eiloa ne latou a ‵kano o te suā tino.” 10 Tenā ne puke ei ne au a taku tokotoko ko Gali+ kae ‵kati, ofa ei ne au taku feagaiga ne fai mo tino katoa. 11 Ne ofa te feagaiga i te aso tenā, kae ko mamoe puapuaga o te lafu kolā e kilo‵kilo mai ki a au ne iloa ne latou me ko te fekau eiloa tenā mai i a Ieova.
12 Tenā ne fai atu ei au ki a latou: “Kafai e ‵lei ki a koutou, tuku mai toku ‵togi; kae kafai e se ‵lei, taofi atu.” Kae ne tuku mai ne latou toku ‵togi, e 30 tupe siliva.+
13 Tenā ne fai mai ei a Ieova ki a au: “Lafo atu ki te koga ‵teu koloa—ko te ‵togi tāua telā ne fakatautau ne latou ki a au.”+ Tenā ne puke ei ne au te 30 tupe siliva kae ‵pei atu ki te koga ‵teu koloa i te fale o Ieova.+
14 Tenā ne ‵kati ei ne au te lua o aku tokotoko, ko ‵Kau Fakatasi,+ e ofa ei te kautaina i te va o Iuta mo Isalaelu.+
15 Kae ko Ieova ne fai mai ki a au: “Nei la, puke te mea faigaluega a se tausi mamoe sē aoga.+ 16 Me ka fai ne au ke tu aka se tausi mamoe i te fenua. Ka se tausi ne ia a mamoe kolā ko fakaseai;+ ka se ‵sala a ia ki tamā mamoe io me faka‵lei ne ia a mamoe e pa‵kia+ io me fagai a latou kolā e mafai o ‵tu. I lō te fai penā, e kai ne ia a ‵kano o te mamoe putaputa+ kae saesae a alofivae o mamoe.+
17 Kalofa eiloa i taku tausi mamoe sē aoga,+ telā ko tiaki ne ia te lafu!+
Ka ‵kati ne te pelu a tena lima kae ‵suki a tena mata fakaatamai.
A tena lima kātoa ka gaugau,
Kae ko tena mata fakaatamai ka ‵kivi eiloa.”