Sakalia

14 “Kiloke! Ko oko mai te aso, ko te aso o Ieova, telā ka vaevae ei au mea i a koe* eiloa. 2 Ka fakamaopoopo mai ne au a atufenua katoa ke taua atu ki Ielusalema; kae ka puke te fakai kae ‵fao a mea i fale kae pukemālō a fāfine. Kae ko te āfa o te fakai ka ave fakapagota, kae ko te ‵toega o tino ka se ave kea‵tea mai i te fakai.

3 “A Ieova ka fanatu o taua ki atufenua konā+ e pelā ma taua atu a ia i te aso o te taua.+ 4 I te aso tenā, ka ‵tu ei ana vae i luga i te Mauga o Olive,+ telā e ‵fuli ki Ielusalema i te feitu ki saegala; kae ko te Mauga o Olive ka vaelua, mai te feitu ki saegala ki te feitu ki togala, kae māfua mai i ei se vanu lasi; kae ko te āfa o te mauga ka gasue ki te feitu ki mātū, kae ko te suā āfa ki te feitu ki saute. 5 A koe ka tele ki te vanu o aku mauga, me i te vanu o mauga ka oko atu eiloa ki Aselu. E ‵tau mo koe o tele kea‵tea, e pelā mo tau telega kea‵tea ona ko te mafuie i aso o te tupu o Iuta ko Usia.+ Kae ko Ieova toku Atua ka vau, kae ko tino tapu katoa ka fakatasi mo ia.+

6 “I te aso tenā ka seai se mainaga fakapito+—⁠a mea katoa ka liu poloka.* 7 Kae ka fai pelā me se aso telā e iloa atu me se aso o Ieova.+ E sē se ao, io me se po; kae i te afiafi ka isi se mainaga. 8 I te aso tenā ka ‵tafe mai ei a vai ola+ mai loto i Ielusalema,+ a te āfa o latou e ‵tafe ki te tai i te feitu ki saegala*+ kae ko te suā āfa e ‵tafe ki te tai i te feitu ki togala.*+ Ka tupu te mea tenā i te tau ‵vela mo te tau ‵moko. 9 Kae ko Ieova ka fai mo Tupu i te lalolagi kātoa.+ I te aso tenā ka tokotasi eiloa a Ieova,+ kae tasi foki tena igoa.+

10 “A te laukele kātoa ka fai pelā mo te Alapaa,+ mai i Kepa+ ke oko ki Limoni+ i te feitu ki saute o Ielusalema; kae ka tu aka a ia kae ka ‵nofo a tino i ei,+ mai i te Mataloa o Peniamina+ ke oko atu eiloa ki te koga e lavea atu i ei te Mataloa Muamua, ke oko atu ki te Mataloa o Matulimanu, kae mai te Taoa o Hananelu+ ke oko atu eiloa ki mea ‵tau uaina a te tupu. 11 Kae ko tino ka ‵nofo i loto i a ia; kae ka se toe ai eiloa se pati fetū o te fakamaseiga,+ kae ka ‵nofo a tino i Ielusalema mo te tokagamalie.+

12 “Kae tenei te mala ka fakaoko atu ne Ieova ki tino katoa kolā e fai taua atu ki Ielusalema:+ A olotou ‵kano ka ‵pala i te taimi e ‵tu ei latou i olotou vae, a olotou mata ka ‵pala i koga e ‵tu i ei, kae ko olotou alelo ka ‵pala i loto i olotou gutu.

13 “I te aso tenā a te ‵numi mai i a Ieova ka salalau atu i loto i a latou; kae ko tino taki tokotasi ka puke ‵mau ki lima o olotou taugasoa, kae ka ‵teke atu olotou lima ki lima o olotou taugasoa.*+ 14 A Iuta ka aofia foki i te taua i Ielusalema; kae ko te maumea o atufenua ‵pili mai ka tuku fakatasi, ko aulo mo siliva mo gatu e uke ‵ki.+

15 “Kae ka oko atu se mala e pelā mo te mala tenā ki solofanua, miula, kamela, asini, mo lafu manu katoa i loto i koga konā.

16 “So se tino e ‵toe mai i atufenua katoa kolā e ‵teke mai ki Ielusalema ka olo aka i tausaga takitasi+ o ifo* ki te Tupu, ko Ieova o kautau,+ kae fakamanatu te ‵Kaiga Fiafia o Fale Fakamalumalu.*+ 17 Kae kafai e isi se tino mai i kāiga o te lalolagi e se fanaka ki Ielusalema o ifo ki te Tupu, ko Ieova o kautau, ka seai se vaiua e ‵to ki luga i a latou.+ 18 Kae kafai e se olo aka a te kāiga o Aikupito kae e se ulu atu ki loto, ka seai ne vaiua mō latou. Kae ka oko atu ki a latou a te mala telā ne fakaoko atu ne Ieova ki atufenua kolā e se olo aka o fakamanatu a te ‵Kaiga Fiafia o Fale Fakamalumalu. 19 Tenei te fakasalaga o te agasala a Aikupito mo te agasala a atufenua katoa kolā e se olo aka o fakamanatu te ‵Kaiga Fiafia o Fale Fakamalumalu.

20 “I te aso tenā ka tusi ei a pati konei ‘A Ieova e tapu!’+ i luga i pēle o solofanua. Kae ko ulo ‵tunu meakai*+ i te fale o Ieova ka fai pelā me ne pōla+ i mua o te fatafaitaulaga. 21 Kae ko ulo ‵tunu meakai* katoa i Ielusalema mo Iuta ka fai pelā me ne mea tapu a Ieova o kautau, kae ko latou katoa kolā e ofo atu olotou taulaga ka o‵mai ki loto kae fakaaoga a nisi mea i ei mo ‵tunu a mea. I te aso tenā ka se toe ai eiloa se tino Kanana* i te fale o Ieova o kautau.”+