Te Tusi a Maleko
2 Kae i nai aso mai tua ifo ne toe fanatu a ia ki Kapanaumi, kae ne salalau atu te tala i a ia ko nofo i te fale.+ 2 Kae ne mumu atu a tino e tokouke ki a ia i konā, ko se ofi ei latou i te fale, ke oko eiloa ki tua o te mataloa, kae ne kamata o akoako atu ne ia a muna a te Atua ki a latou.+ 3 Kae ne aumai ne latou ki a ia se tino e ‵mate tena foitino telā e sau mai ne tāgata e tokofa.+ 4 Kae ne seki mafai ne latou o avatu a ia ki a Iesu ona ko te vaitino, tenā ne tapale ei ne latou te tuafale mai i luga o Iesu, kae i te otiga ne fakapu ne latou se pūga, tukutuku ifo ei ne latou te moega telā e moe i ei te tino masaki. 5 I te laveaga ne Iesu te lasi o te lotou fakatuanaki,+ fai atu ei a ia ki te tino masaki tenā: “Taku tama, au agasala ko magalo.”+ 6 Ne ‵nofo atu i konā a nisi failautusi, e saga‵saga kae fai ifo i olotou loto penei:+ 7 “Kaia e faipati ei penei te tagata tenei? Ko muna masei a ia ki te Atua. E seai se tino e mafai ne ia o fakamagalo a agasala, ko te Atua tokotasi fua e mafai ne ia.”+ 8 Kae ne iloa fakavave ne Iesu olotou mafaufauga, fai atu ei ki a latou: “Kaia e mafau‵fau ei koutou penā i otou loto?+ 9 Se a te mea e faigofie atu, ko te fai atu ki te tino masaki, ‘Au agasala ko magalo,’ io me fai atu, ‘Tu ki luga, puke tou moega, kae sasale’? 10 Kae ko te mea ke iloa ne koutou me e isi se malosi o te Tama a te tagata+ o fakamagalo a agasala i te lalolagi—”+ ne fai atu a ia ki te tino masaki: 11 “Au e fai atu ki a koe, Tu ki luga, puke tou moega, kae fano ki tou fale.” 12 I konā eiloa, ne tu aka tou tagata, puke fakavave tena moega kae sasale ki tua i mua o latou katoa. Ne ofo a latou katoa, ‵viki atu ei latou ki te Atua, olotou muna: “Ne seki lavea aka eiloa ne matou se vaegā mea penei.”+
13 Ne toe fano a ia ki tua i tafa o te vai kae ne mumu atu ki a ia a te vaitino, kae ne kamata a ia o akoako atu ki a latou. 14 I tena auala o fano, lavea ei ne ia a Levi te tama a Alefaio, e sagasaga i te ofisa ‵tae lafoga, kae fai atu ki a ia: “Tautali mai i a au.” Ne tu aka tou tagata kae tautali atu i a ia.+ 15 Fakamuli ifo, ne kai* a ia i te fale o Levi, kae e tokouke a tino ‵tae lafoga mo tino agasala ne ‵kai* fakatasi mo Iesu mo ana soko i konā, me ne tokouke a latou i konā ne tau‵tali atu i a ia.+ 16 Kae i te laveaga ne failautusi a te kau Falesaio i a ia e ‵kai fakatasi mo tino agasala mo tino ‵tae lafoga, fai atu ei latou ki ana soko: “Kaia e ‵kai fakatasi ei a ia mo tino ‵tae lafoga mo tino agasala?” 17 I te lagonaga ne Iesu a te mea tenei, fai atu ei ki a latou: “A tino kolā e ma‵losi ‵lei e se ma‵nako ki se tokita, kae ko tino fua kolā e ma‵saki. Au ne vau o kalaga ki tino agasala kae e se ki tino amio‵tonu.”+
18 Ne fakaliki‵liki sāle a soko o Ioane e pelā foki mo Falesaio. Tenā ne o‵mai ei latou kae fai atu ki a ia: “Kaia e fakaliki‵liki sāle ei a soko o Ioane mo soko o Falesaio kae ko ou soko e se fakaliki‵liki?”+ 19 Ne fai atu a Iesu ki a latou: “Kae koi ‵nofo fakatasi a te tagata ka fakaipoipo+ mo latou, e seai se pogai ke fakaliki‵liki ei ana taugasoa, e tonu au me ikai? I te taimi e ‵nofo ei latou mo te tagata ka fakaipoipo e se mafai o fakaliki‵liki latou. 20 Kae ka oko mai a aso e ave ei kea‵tea te tagata ka fakaipoipo mai i a latou,+ ko fakaliki‵liki ei latou i te aso tenā. 21 E seai se tino e ‵sui ne ia se potu laugatu fou ki se gatu mago. Kafai e fai ne ia, ka ‵futi ne te laugatu fou a te gatu mago, kae ka lasi atu i ei te masaega.+ 22 E se gata i ei, e se utu ne se tino a te uaina fou ki loto i taga uaina mua. Kafai e fai ne ia penā, ka fai ne te uaina ke ma‵pa a taga konā, ko māumāu ei te uaina fakatasi mo taga konā. Kae ko te uaina fou e utu ki loto i taga uaina ‵fou.”
23 I te oloatuga a Iesu mo ana soko i loto i te fatoaga saito i te Sapati, ne tau ne ana soko a kaufui saito.+ 24 Ne fai atu a Falesaio ki a ia: “Kiloke! Kaia e fai ei ne latou te mea telā e tapu i te Sapati?” 25 Kae ne fai atu a ia ki a latou: “E a, e seki fai‵tau koutou ki te mea ne fai ne Tavita i te taimi ne fia‵kai ei a ia mo ana tāgata?+ 26 I te tala e uiga ki a Aviata+ te faitaulaga pule, e a e seki ulu atu a Tavita ki loto i te fale o te Atua, kae kai ne ia a falaoa kolā ko oti ne ofo atu ki te Atua, telā e tapu ma kai ki ei so se tino kae na ko faitaulaga fua,+ kae ne tuku atu foki ne ia a nisi mea ki ana tāgata? 27 Tenā ne fai atu ei a ia ki a latou: “A te Sapati ne fai mō te ‵lei o te tagata,+ kae ne seki faite a te tagata mō te ‵lei o te Sapati. 28 Tela la, a te Tama a te tagata ko te Aliki foki eiloa o te Sapati.”+