Te Tusi a Maleko
3 Ne toe ulu atu a ia ki loto i se sunako e tasi kae ne nofo atu i ei se tagata e ‵mate tena lima.+ 2 Ne lamalama a ia ne te kau Falesaio i te mea ma faka‵lei ne ia te tagata tenā i te Sapati, ko te mea ke fai ne olotou ‵losiga e uiga ki a ia. 3 Ne fai atu a ia ki te tagata telā e ‵mate tena lima: “Tu ki luga kae vau ki te kogaloto.” 4 Ne fai atu a ia ki a latou: “E mata, e saoloto i te Sapati ke fai se mea ‵lei io me fai se mea masei, ke fakasao se ola io me tamate se tino?+ Kae ne seki fai‵pati eiloa latou. 5 I te otiga ne kilokilo atu ki a latou mo te kaitaua, kae fanoanoa malosi i te ma‵keke o olotou loto,+ fai atu ei a ia ki te tagata tenā: “‵Fola mai tou lima.” Kae ne ‵fola atu ne ia tena lima, ko te mea eiloa ko ‵lei tena lima. 6 Ne olo a Falesaio ki tua kae fono fakavave mo tino o te potukau a Helota+ ke tamate ne latou a ia.
7 Kae ne olo atu a Iesu mo ana soko ki te tai, kae ne tau‵tali atu i a ia a tino e tokouke mai i Kalilaia mo Iuta.+ 8 Ne olo atu foki ki a ia a tino e tokouke mai i Ielusalema mo Itumaia mo koga i te suā feitu o te Iolitana mo koga i tafa o Tulo mo Saitonu, i te ‵logoga i mea e uke kolā ne fai ne ia. 9 Ne fai atu a ia ki ana soko ke fakatoka se tamā pōti mō ia ko te mea ke se fakatauteke mai a te vaitino ki a ia. 10 Me ne faka‵lei ne ia a tino e tokouke, tenā ne fakatauteke mai ei a tino kolā e pokotia i masaki ma‵sei ke pa‵tele atu fua latou ki a ia.+ 11 Ke oko foki ki agaga ma‵sei,+ i so se taimi e lavea ei ne latou a ia, e to‵tuli ifo latou i ana mua kae ka‵laga atu: “A koe ko te Tama a te Atua.”+ 12 Kae e uke a taimi ne fakatonu malosi atu ei a ia ki a latou ke mo a ma fakailoa atu ki tino a mea e uiga ki a ia.+
13 Ne kake aka a ia ki luga i se mauga kae fakatonu atu ke olo aka foki a tino kolā ne manako a ia ki ei,+ kae ne olo aka ei latou ki a ia.+ 14 Kae ne fili* ne ia se potukau e toko 12 kolā ne fakaigoa foki ne ia ki apositolo, ko latou kolā ka olo fakatasi mo ia kae uga atu ne ia ke olo o talai 15 kae ke maua foki ne latou te malosi o afuli kea‵tea a temoni.+
16 Kae ne aofia i te potukau e toko 12+ telā ne fili ne ia ko Simona, telā ne fakaigoa foki ne ia ki a Petelu,+ 17 Iakopo te tama a Sepetaio mo Ioane te taina o Iakopo (ne fakaigoa foki ne ia a lāua konei ki a Poaneki, telā e fakauiga ki “Tama a te Fa‵tili”),+ 18 Anitelea, Filipo, Patolomaio, Mataio, Toma, Iakopo te tama a Alefaio, Tataio, Simona te tino loto finafinau,* 19 mo Iuta te Isikaliota, telā ne fakatogafiti fakamuli ne ia a Iesu.
Tenā ne fanatu ei a ia ki loto i se fale, 20 kae ne toe mumu atu te vaitino ki ei, tenā ne seki mafai ei ne latou o ‵kai. 21 Kae i te ‵logoga o ana kāiga i te mea tenā, olo atu ei latou o puke mai a ia, kae fai aka: “Ko masei tena ulu.”+ 22 Ne fai atu foki a failautusi kolā ne olo atu mai i Ielusalema: “Ko nofo i a ia a Pelesepulo,* kae afuli kea‵tea ne ia a temoni e auala i te pule o temoni.”+ 23 Tela la, i te otiga ne kalaga atu ki a latou ke o‵mai ki a ia, ne faipati atu a ia ki a latou e auala i tala fakatusa: “E mafai pefea ne Satani o afuli kea‵tea a Satani? 24 Kafai e mavaevae se malo i a ia eiloa, e se mafai o tumau te malo tenā;+ 25 kae kafai e ‵nofo mavae‵vae se kāiga, ka se mafai o tumau te kāiga tenā. 26 Kafai foki e taua atu a Satani ki a ia eiloa kae mavaevae, e se mafai o tumau a ia kae ka iku atu eiloa ki tena fakaseaiga. 27 E tonu, e seai se tino e ulu ki loto i te fale o se tagata mafi e mafai o kaisoa ne ia ana kope seiloga ke saisai muamua ne ia te tagata mafi tenā. Tenā fua te auala e mafai ei ne ia o puke a kope mai tena fale. 28 Au e fai ‵tonu atu ki a koutou me ka fakamagalogina a agasala katoa a tino, faitalia a agasala e fai ne latou mo muna ma‵sei a latou e fai. 29 Kae ko so se tino telā e muna masei ki te agaga tapu e se mafai o fakamagalo ke oko eiloa ki te se-gata-mai,+ ko te agasala telā e se mafai o fakamagalo.”+ 30 Ne fai atu ne Iesu a pati konei me ne fai mai latou: “E nofo i a ia se agaga masei.”+
31 Ne o‵mai a tena mātua mo ana taina+ kae ‵tu i tua, kae uga atu ne latou se tino ke kalaga ki a ia.+ 32 Ne saga‵saga fakatamilo a te vaitino i feitu katoa o Iesu, fai atu ei a latou ki a ia: “Kiloke! A tou mātua mo ou taina kolā i tua, e ‵sala ki a koe.”+ 33 Kae ne tali atu a ia ki a latou: “Ko oi toku mātua kae ko oi foki oku taina?” 34 Tenā ne kilo atu ei tou tagata ki a latou kolā e ‵nofo fakapukupuku i ana feitu kae fai atu: “Kiloke, ko toku mātua mo oku taina konei!+ 35 So se tino e fai ne ia te loto o te Atua, a ia tenā ko toku taina mo toku tuagane mo toku mātua.”+