Te Tusi a Maleko

4 Ne toe kamata o akoako atu tou tagata i tafa o te tai kae ne mumu atu ki a ia se vaitino. Tenā ne sopo ei a ia ki te pōti o sagasaga i ei, tai momea atu ki tai, kae ne ‵nofo a tino katoa i te tafatai.+ 2 Kae ne kamata o akoako atu ne ia a mea e uke ki a latou e auala i tala fakatusa,+ kae i te taimi ne akoako atu ei a ia ne fai atu a ia ki a latou:+ 3 “Faka‵logo mai. Kiloke! E isi se tino ‵toki lakau ne fano o ‵toki a fuaga.+ 4 I te taimi ne ‵toki ei ana fuaga, ne ‵to atu a nisi fuaga i tafa o te auala. Ne o‵mai a manu eva, kai ei ne latou. 5 Ne ‵to atu a nisi fuaga ki te laukele fatufatua telā e se uke a one i ei, kae ne ‵somo fakavave aka a fuaga konā me e se matolu te one i ei.+ 6 Kae i te taimi ne ‵kasa ei te la, velasia ei a fuaga konā, kae mage‵mage me seai ne olotou aka. 7 Ne ‵to atu a nisi fuaga i va o lakau tala‵tala, ne ola aka a lakau tala‵tala kae ola sai‵tia ei a fuaga konā kae e se ‵fua mai.+ 8 Kae ko nisi fuaga ne ‵to ki luga i te laukele ‵lei, kae ne ola aka kae gasolo o uke, kamata ei o ‵fua mai i taki 30, taki 60, mo taki 100.”+ 9 Tenā ne toe fai atu ei a ia: “A te tino telā e isi ne ana taliga, ke na fakalogo la ki ei.”+

10 I te taimi ne nofo tokotasi ei a Iesu, ne kamata o fakafesilisili a ia ne tino i ana tafa fakatasi mo te toko Sefululua e uiga ki tala fakatusa konā.+ 11 Ne tali atu a ia ki a latou: “Ko oti ne tuku atu ki a koutou a mea ‵funa kae tapu+ o te Malo o te Atua, kae ka taku atu ki tino i tua a mea katoa e auala i tala fakatusa,+ 12 me e tiga eiloa e ‵kilo atu ki ei kae e se lavea ne latou, e tiga eiloa e fakalogo‵logo latou, e lagona ne latou kae e se malama‵lama i te uiga o mea konā; kae e se ‵fuli mai ke maua ne latou te fakamagaloga.”+ 13 E se gata i ei, ne fai atu a ia ki a latou: “Kafai e se iloa ne koutou te tala fakatusa tenei, ka malamalama la pefea koutou i nisi tala fakatusa?

14 “Ne ‵toki ne te tino ‵toki lakau te muna.+ 15 A tino konei ko fuaga kolā ne ‵toki i tafa o te auala telā ne ‵toki i ei te muna; kae i te taimi eiloa ne lagona ei ne latou a te muna tenā, ko Satani eiloa ko vau+ kae ave ne ia kea‵tea te muna telā ne ‵toki i loto i a latou.+ 16 E penā foki a tino konei ko fuaga kolā ne ‵toki i laukele fatufatua; i te taimi ne lagona ei ne latou te muna, talia ei ne latou mo te fia‵fia.+ 17 E ui i ei, ne seai ne olotou aka kae ne tumau fua latou mō se vaitaimi; kae i te taimi eiloa ne oko atu ei a fakalavelave mo fakasauaga ona ko te muna, ne pa‵kū ei latou. 18 Kae e isi ne fuaga ne ‵toki i va o lakau tala‵tala. Konei a tino ne lagona ne latou a te muna,+ 19 kae ne fai ne te manavase+ ki mea o te olaga tenei mo te ‵gali fakaloiloi o koloa+ mo te manako+ ki nisi mea katoa ke pokotia ei olotou loto kae ola sai‵tia te muna, telā ko seai ei ne ana fuataga. 20 Kae ko fuaga kolā ne ‵toki i te laukele ‵lei ko latou kolā ne lagona ne latou te muna kae ne talia ne latou mo te fia‵fia kae ne ‵fua mai i taki 30, taki 60 mo taki 100.”+

21 Ne fai atu foki a ia ki a latou: “E a, e isi se moli e tuku mai lalo i se kete io me se moega? E a, e se tuku atu ki luga i se tugamoli?+ 22 Me e seai se mea ‵funa ka se fakaasi mai; e seai se mea e ufi faka‵lei ke galo ka se tuku faka‵sau mai ki tua.+ 23 So se tino e isi ne ana taliga, ke na fakalogo la ki ei.”+

24 Ne toe fai atu a ia ki a latou: “‵Saga tonu ki mea kolā e lagona ne koutou.+ Ko te fua telā e fua atu ne koutou, ka toe fua mai foki ki a koutou, ao, ka toe fakaopoopo atu a nisi mea ki a koutou. 25 Me ko so se tino e isi ne ana mea, ka toe tuku atu ki ei a mea e uke atu,+ kae ko so se tino e seai ne ana mea, ka tapale kea‵tea mai i a ia a mea kolā e nofo mo ia.”+

26 Ne toe fai atu a ia: “Tela la, a te Malo o te Atua e fai pelā me se tagata telā e ‵pei atu ne ia a fuaga ki te laukele. 27 Ne moe i te po kae ala aka i te ao, kae ko fuaga ko ‵somo aka kae ko ma‵luga, kae e se iloa ne ia me ne ‵tupu aka pefea. 28 Ne fakaola malielie aka ne te laukele a te fuaga. A te mea muamua ko te kausaito, tafa atu ki ei ko kaufui saito, kae fakamuli loa ko fuaga i te kaufui saito kolā ko ma‵tua. 29 Kae i te taimi ko ma‵tua ei a fuataga, ko ‵kati ei ne ia ki te naifi, me ko oko ki te ‵tau e ‵kati ei a fuataga.”

30 Ne toe fai atu tou tagata: “Se a te mea ka fakatusa ne tatou ki ei te Malo o te Atua, io me se a te tala fakatusa ka fakamatala ne tatou ki ei? 31 E fai pelā me se fuaga o te sinapi, i te taimi e ‵toki ei i te laukele ko te ‵toe fuaga foliki eiloa i fuaga katoa i te lalolagi.+ 32 Kae kafai ko oti ne ‵toki, ko ola aka ei kae ka lasi atu i nisi lakau kaina katoa kae ‵lasi foki ana kaula, ko mafai ei o fai ne manu eva o te lagi olotou ofaga i malumaluga o ana kaula.”

33 Ne faipati atu ne ia te muna a te Atua ki a latou e auala i tala fakatusa e uke penā,+ e ‵tusa eiloa mo te leva telā e mafai o fakalogo‵logo latou ki ei. 34 E tonu, e se mafai o faipati atu a ia ki a latou e aunoa mo se tala fakatusa, kae e fakamatala atu ne ia a mea katoa ki ana soko i a latou aka eiloa.+

35 Kae i te afiafi o te aso tenā, ne fai atu a ia ki a latou: “‵Tou olo ki te suā feitu o te vai.”+ 36 I te otiga ne uga atu ne latou a tino ke olo, ‵sopo ei latou ki te pōti kae e isi aka foki ne nisi pōti i konā.+ 37 Ne poko se kaumatagi lasi kae ne ‵fati a galu ki loto i te pōti, kae toeitiiti eiloa ko pulu.+ 38 Kae ko Iesu e nofo i te taumuli e moe i luga i se aluga. Ne ‵fagu ne latou a ia kae fai atu: “Te Faiakoga, e a, e se lavea ne koe i a tatou ko pili o ‵mate?” 39 I konā ne tu aka ei tou tagata kae ‵liko atu ki te matagi kae fai atu ki te tai: “Malū! Filemu!”+ Ne mate te matagi kae malū palapala te tai. 40 Ne fai atu a ia ki a latou: “Kaia e ma‵taku* malosi ei koutou? E a, e seai eiloa se otou fakatuanaki?” 41 Kae ne ma‵taku malosi eiloa latou kae fai aka olotou pati i a latou eiloa: “Ko oi la te tino tenei? E faka‵logo foki te matagi mo te tai ki a ia.”+