Te Tusi a Luka

19 Ne ui atu a Iesu i loto i Ieliko. 2 E isi se tagata i konā e igoa ki a Sakaio; a ia se pule o tino ‵tae lafoga kae maumea. 3 Ne taumafai a ia ke lavea ne ia te tino e igoa ki a Iesu, kae ne seki mafai ne ia ona ko te vaitino, me i a ia e toetoe. 4 Ne tele a ia i mua kae kake aka i te lakau ko te sukamolo ko te mea ke lavea ne ia a Iesu me ko pili o oko atu ki te koga tenā. 5 I te okoatuga a Iesu ki te koga tenā, ne kilo aka ki luga kae fai atu ki a ia: “Sakaio, ke vave ifo ki lalo, me e ‵tau au o nofo i tou fale i te aso nei.” 6 Ne fanaifo fakavave a ia ki lalo kae talimalo faka‵lei ne ia a Iesu mo te fiafia. 7 I te laveaga ne latou te mea tenei, ne musu‵musu latou katoa: “Ne fai a ia e pelā me se mālō i te fale o se tagata agasala.”+ 8 Kae ne tu aka a Sakaio kae fai atu ki te Aliki: “Kiloke! Ka tuku atu ne au te āfa o aku mea ki tino ma‵tiva, e te Aliki, kae ko so se mea ne puke* ne au mai so se tino, ka toe fakafoki atu ne au ki ei e fakafa taimi.”+ 9 Ne fai atu a Iesu ki a ia: “Ko oti ne oko mai te fakaolataga ki te fale tenei i te aso nei, me i a ia foki se tama a Apelaamo. 10 Me i te Tama a te tagata ne vau o ‵sala kae faka‵sao a tino kolā ne ‵galo.”+

11 Kae koi fakalogo‵logo latou ki mea konei, ne toe fai atu ne ia se tala fakatusa, me ko pili atu a ia ki Ielusalema kae ne mafau‵fau latou me ka sae fakavave mai te Malo o te Atua.+ 12 Ne fai atu a ia: “E isi se tagata mai se kaigā aliki ne faimalaga atu ki se fenua ‵mao+ ke fakamautinoa aka i ei tena pulega fakatupu, ko toe foki mai ei. 13 Ne kalaga atu a ia ki ana tavini e tokosefulu kae tuku atu ki a latou a mina* e sefulu kae fai atu, ‘Fakagalue a mea konei ke oko ki te taimi e toe foki mai ei au.’+ 14 Kae ko tino o tena fenua ne takalia‵lia ki a ia, uga atu ei ne latou olotou sui i ana tua ke fai atu, ‘A matou e se ma‵nako ke fai te tagata tenei mo fai te motou tupu.’

15 “I tena fokimaiga mai tua ifo o te fakamautinoaga o tena pulega fakatupu,* ne kalaga atu a ia ki tavini kolā ne tuku atu ki ei a tupe,* ke iloa aka a mea ne maua mai olotou mea ne fakagalue.+ 16 Ne fanatu te tino muamua, ana muna, ‘Te Aliki, e sefulu a mina ne maua mai i tau mina.’+ 17 Ana muna ki a ia, ‘Malo, koe se tavini ‵lei! Ona ko tou fakamaoni i se mea foliki ‵ki, ka pule ne koe a fakai e sefulu.’+ 18 Ne vau te tokolua kae fai atu, ‘Ne maua a mina e lima mai i tau mina, e te Aliki.’+ 19 Ne fai atu foki a ia ki te tino tenei, ‘A koe foki ka pule ki fakai e lima.’ 20 Kae ne fanatu te suā tino, ana muna, ‘Te Aliki, tenei tau mina ne ‵funa faka‵lei ne au i se laugatu. 21 E iloa ne koe, au ne mataku i a koe, me i a koe se tagata saua; e puke ne koe a tupe kolā ne seki faulu ne koe, kae e tau ne koe a fuaga kolā ne seki ‵toki ne koe.’+ 22 Fai atu ei a ia ki te tavini tenā, ‘Ko fakamasino ne au a koe i au pati eiloa konā, te tavini matagā. Ne iloa ne koe i a au se tagata saua, e puke ne au a tupe kolā e seki faulu ne au kae tau ne au a fuaga kolā e seki ‵toki ne au,+ 23 kaia la ne seki faulu ei ne koe taku tupe* ki te page, me kafai e vau au, ko tapale ei ne au te tupe fakatasi mo tena pasene?’

24 “Tenā ne fai atu ei a ia ki tino e takatu‵tu i konā, ‘Puke te mina tenā mai i a ia kae tuku atu ki te tino telā e sefulu ana mina.’+ 25 Kae ne fai atu latou ki a ia, ‘Te Aliki, a ia tenei e sefulu ana mina!’— 26 ‘Au e fai atu ki a koutou, so se tino telā e isi ne ana mea, ka tuku ki ei a mea e uke atu, kae ko te tino telā e seai ne ana mea, ka ave kea‵tea mai i a ia a nai mea kolā e maua ne ia.+ 27 E se gata i ei, aumai ki konei oku fili kolā ne seki ma‵nako ke fai au mo olotou tupu ke tamate latou i oku mua.’”

28 I te otiga ne fai atu ne ia a pati konā, mua atu ei a ia i a latou o fano ki Ielusalema. 29 I tena piliatuga ki Petefake mo Petania i te mauga e igoa ki te Mauga o Olive,+ uga atu ei ne ia a soko e tokolua,+ 30 ana muna: “Olo ki te fakai foliki tenā e lavea ne koulua, kae kafai e oko koulua ki ei, ka maua i ei ne koulua se tamā asini e ‵sai, telā e seki sopo aka eiloa se tagata i ei. ‵Tala, ko aumai ei ki konei. 31 Kae kafai e fesili atu se tino ki a koulua, ‘Kaia e ‵tala ei ne koulua te asini?’ E ‵tau o fai atu koulua: ‘E manako ki ei te Aliki.’” 32 Tenā ne olo ei a lāua kolā ne uga atu kae ne maua ne lāua te asini e pelā eiloa mo ana pati ki a lāua.+ 33 Kae koi ‵tala ne lāua te tamā asini kae fai atu a tino i a latou te asini ki a lāua: “Kaia e ‵tala ei ne koulua te tamā asini?” 34 Ne fai atu lāua: “E manako ki ei te Aliki.” 35 Ne ‵taki atu ne lāua te asini ki a Iesu, kae ne ‵fola olotou gatu ki luga i te tamā asini kae fakasopo atu a Iesu ki luga i ei.+

36 I tena auala o fano, ne ‵fola ne latou olotou gatu i te auala.+ 37 I tena piliatuga ki te auala telā e fanaifo mai te Mauga o Olive, ne kamata o fia‵fia a soko katoa kae paka‵laga kae tavae atu ki te Atua i se leo maluga ona ko galuega ‵mana katoa kolā ko oti ne lavea ne latou, 38 olotou muna: “Ke manuia a te tino telā e vau e pelā me se Tupu i te igoa o Ieova!* Ke maua te filemu i te lagi mo te ‵malu i te koga maluga!”+ 39 Kae ne fai atu a nisi Falesaio mai te vaitino ki a ia: “Te Faiakoga, ‵liko atu ou soko.”+ 40 Ne tali atu a ia: “Au e fai atu ki a koutou, kafai e se ka‵laga a latou konei, ko fatu ka ka‵laga.”

41 I tena piliatuga, ne kilo atu a ia ki te fakai, tagi ei a ia,+ 42 ana muna: “Moi fai ne iloa ne koe i te aso tenei a mea e uiga ki te filemu—kae nei la ko oti ne ‵funa mai i a koe.+ 43 Me ka oko mai eiloa a aso ka faite fakatamilo ei ne ou fili se ‵pui ki lakau ko oti ne fakamakai‵kai kae ka nikoi ne latou a koe kae oso* atu ki a koe mai feitu katoa.+ 44 Ka tuki palapala ne latou ki lalo i te laukele a koe mo au tama‵liki i loto i a koe,+ kae ka se tiaki ne latou se fatu i luga i te suā fatu,+ me ne seki iloa ne koe te taimi e fakamasino ei koe.”

45 Tenā ne ulu atu ei a ia ki loto i te faletapu kae afuli ne ia ki tua a tino kolā e fakatau olotou mea i ei,+ 46 ana muna ki a latou: “E tusi i te tusi, ‘A toku fale ka taku ko te fale ‵talo,’+ kae ko fai ne koutou mo fai se ana o tino kai‵soa.”+

47 Ne akoako atu faeloa a ia i loto i te faletapu i aso takitasi. Kae ne salasala a faitaulaga pule mo failautusi mo tino ma‵luga o te fenua ke tamate a ia;+ 48 kae ne seki maua ne latou se auala ke fai ei te mea tenei, me ne mumu atu faeloa a tino katoa o fakalogo‵logo ki a ia.+