Se talavou tagata e kilokilo ki tino e olo ki se Fale Tapuaki

E FESILI MAI A TALAVOU

Kaia e ‵Tau o ‵Kau ki Fakatasiga i se Fale Tapuaki?

E lua taimi i te vaiaso e fai ei ne Molimau a Ieova olotou fakatasiga i olotou Fale Tapuaki. Ne a mea e fai i ei, kae ne a mea aoga ka maua ne koe ma kau atu ki ei?

Ne a mea e fai i se Fale Tapuaki?

A te Fale Tapuaki ko te koga e fai ei a akoakoga kolā e fakavae tonu ki akoakoga aoga mai te Tusi Tapu. A fakatasiga e fai i ei e mafai o fesoasoani atu ki a koe:

ke tauloto ki te munatonu e uiga ki te Atua.
ke malamalama i te uiga o mea kolā ko ‵tupu i aso nei.
ke fai pelā me se tino tai ‵lei atu.
ke maua a toe taugasoa ‵lei.

E iloa ne koe? A te Malo o te Atua ko te ‵toe mataupu tāua telā e fakamatala sāle mai i Fale Tapuaki o Molimau a Ieova.—Mataio 6:9, 10; 24:14; Luka 4:43.

Kaia e ‵tau o kau koe ki ei?

Ka aoga ki a koe a fakamatalaga e maua i ei. Ka fesoasoani atu ki a koe a akoakoga fakavae mai te Tusi Tapu kolā e sau‵tala ki ei i fakatasiga a Molimau a Ieova “ke maua te poto.” (Faataoto 4:5) Ko tena uiga e mafai o fesoasoani atu te Tusi Tapu ke fai ne koe a fakaikuga ‵lei i tou olaga. E mafai foki o tali aka i ei a toe fesili tāua i te olaga, e pelā mo fesili konei:

E fakasolo atu mai lalo nei a nai matua o lāuga kolā e fai i fakatasiga i Aso Sa:

Kaia e ‵Tau ei o Takitaki Koe ne te Tusi Tapu?
Tefea te Koga e Mafai o Maua Mai ei te Fesoasoani i Taimi o Puapuaga?
Mea Kolā e Fai Nei ne te Malo o te Atua mō Tatou.

“Ne kau mai se taugasoa o oku i te akoga ki se fakatasiga. Ne saga‵saga fakatasi a ia mo te motou kāiga kae ne fakaaoga ne ia omotou tusi. Oti aka, ne fai mai a ia me ko oko loa tena fiafia ki tali ne lagona ne ia mai taina mo tuagane. Ne fai mai foki a ia me e seai ne tusi mo fai a sukesukega i te lotou lotu, e pelā mo tatou.”—Brenda.

E iloa ne koe? E seai se ‵togi māfai e kau atu koe ki se Fale Tapuaki, kae seai foki ne sene e ‵tae i ei.

A te ‵kau fakatasi mo tino i ei ka fakamalosi atu ki a koe. E fai mai te Tusi Tapu me i te pogai e tasi e ‵tau ei o ‵kau fakatasi a Kelisiano ko te mea “ke fakamalosi atu te suā tino ki te suā tino.” (Epelu 10:24, 25) A te ‵kau fakatasi mo tino kolā e fakamuamua ne latou a Ieova kae fakatāua a nisi tino i lō latou se fakamalosiga eiloa i te lalolagi telā e ‵saga atu fua a tino ki a latou eiloa.

“Mai tua o se aso galue kātoa, e mafai o fanoanoa kae fi‵ta au, kae ko tino i te Fale Tapuaki e fai faeloa ne latou au ke ‵lei oku lagonaga. Ka foki au ki te fale mai tua o se fakatasiga e fiafia au kae ko toka o fakafesagai atu ki te suā aso.”—Elisa.

E iloa ne koe? E sili atu i te 120,000 o fakapotopotoga a Molimau a Ieova i te lalolagi kātoa, kae e maopoopo latou i koga e sili atu i te 60,000. I tausaga takitasi, e nofo ki se 1,500 a Fale Tapuaki e masani o faite ona ko te tokouke o tino e ‵kau atu ki ei.a

Pati a ou taugasoa

“I te taimi koi akoga au, ne kau mai se taugasoa i te akoga ki nai fakatasiga, kae ne fiafia malosi a ia ki te uke o tino mai tupulaga kese‵kese e tauloto fakatasi ki te Tusi Tapu. Fakamuli nei, ne kau mai toku pule ki se fakatasiga kae ne ofo a ia i te fakaaoga ‵soko ne tatou a te Tusi Tapu. A te kilo atu ki te lasi o tena loto fakafetai ki fakatasiga ne fai foki ei ke lasi toku loto fakafetai ki ei!”—Jessica.

“Ne iloa ne au me i fakatasiga e fesoasoani malosi mai ke mo a ma tō saga atu ki galuega o te aso mo mea e manavase ki ei. E iloa ei ne tatou a te auala ke maua se olaga fakamalie loto, te auala ke fai pelā me se tino tai ‵lei atu, mo nisi mea e uke atu. Mai tua o fakatasiga e maua faeloa ne au i ei se malosi fou.”—Timothy.

“I te otiga o se fakatasiga, ne fai mai se tagata telā ne ‵kami mai ne au: ‘Au ne kau mai ko te mea ke fakamaoni aka ne au te ‵se o otou talitonuga, kae foliga mai me ko oku talitonuga e ‵se!’ Ne ofo foki a ia i te mata fia‵fia o Molimau a Ieova. Ana muna: ‘E tiga loa ne fatoa fetaui tatou, kae ko pelā loa me ko leva ne masani tatou i se fia o tausaga ona ko otou faifaiga!’”—Jacob.

“E uke a taimi e mafaufau sāle au, ‘Ka oti te fakatasiga au loa ko fano.’ Kae i te taimi e fai ei te fakatasiga ko galo atu ei te lagonaga tenā. Ka oti te fakatasiga e faipati au ki tino e tokouke kae e se malamalama au me kaia ne oko mai ki a au a lagonaga konā muamua. Moi seai a fakatasiga penei e seai ne oku taugasoa ‵gali kolā ko maua nei ne au.”—Madison.

a Ke maua se koga e fai ei a fakatasiga fano ki te “Fakatasiga i Fakapotopotoga a Molimau a Ieova” kae ‵toko i te “Koga Pili Atu.”