MATAUPU E 37
E Mata, e ‵Tau Au o Papatiso?
Fakamailoga a fakamatalaga mai lalo me e ‵tonu io me e ‵se:
A te papatisoga se mea e ‵tau o fai ne Kelisiano.
□ Tonu
□ ‵Se
A te pogai tāua o te papatisoga ke puipui ei koe mai te agasala.
□ Tonu
□ ‵Se
A te papatisoga e fai ei ke fanatu koe i te auala ki te fakaolataga.
□ Tonu
□ ‵Se
Kafai koe seki papatiso, ka se fakamasino koe ne te Atua mō au faifaiga.
□ Tonu
□ ‵Se
Kafai ko papatiso ou taugasoa, ko tena uiga, ko toka foki koe mō te papatisoga.
□ Tonu
□ ‵Se
KAFAI ko ola koe e ‵tusa mo tulaga o te Atua, ko ati aka ne koe se va fakataugasoa mo te Atua kae faipati atu ki nisi tino e uiga ki tou fakatuanaki, se mea masani ke mafaufau koe ki te papatisoga. Kae e iloa pefea ne koe māfai ko toka koe ki ei? Ke tali aka te fesili tenā, mafaufau ki fakamatalaga ‵tonu io me ‵se kolā ne fakaasi atu mai luga.
● A te papatisoga se mea e ‵tau o fai ne Kelisiano.
Tonu. Ne fakatonu ne Iesu ana soko ke papatiso. (Mataio 28:19, 20) A te ‵tonuga loa, ne papatiso foki a Iesu. Ke fakaakoako ki a Keliso, e ‵tau mo koe o papatiso māfai ko matua ‵lei koe ke fai te fakaikuga tenā kae manako tonu koe ki ei.
● A te pogai tāua o te papatisoga ke puipui ei koe mai te agasala.
‵Se. A te papatisoga se fakailoga i mua o tino katoa e uiga ki tau tukuatuga ki a Ieova. A tou tukuatuga e sē se feagaiga telā e mafai ne koe o fulitua atu ki ei mai te faiga ‵funa o mea kolā e manako koe ki ei. I lō te fai penā, e tuku atu tou olaga ki a Ieova ona ko te mea e manako koe ke ola e ‵tusa mo ana tulaga.
● A te papatisoga e fai ei ke fanatu koe i te auala ki te fakaolataga.
Tonu. E fai mai te Tusi Tapu me i te papatisoga se mea tāua ‵ki e ‵tau o fai ke maua te fakaolataga. (1 Petelu 3:21) Kae e se fakauiga te mea tenei me i te papatisoga e fai pelā me se feagaiga telā e mafai o ‵togi ke puipui ei koe i taimi o fakalavelave. E papatiso koe ona ko te mea e alofa koe ki a Ieova kae e manako ke tavini atu ki a ia ki te se-gata-mai mo tou loto kātoa.—Maleko 12:29, 30.
● Kafai koe seki papatiso, ka se fakamasino koe ne te Atua mō au faifaiga.
‵Se. E fai mai te Iakopo 4:17: “Kafai e iloa ne se tino a te mea tonu e ‵tau o fai kae se fai ne ia, a te mea tenā se agasala ki a ia”—papatiso io me ikai. Tela la, kafai ko iloa ne koe te mea tonu kae ko matua ‵lei koe ke mafaufau ‵mafa ki tou olaga, kāti tenei loa te taimi ke sau‵tala e uiga ki ei mo ou mātua io me se Kelisiano matua ‵lei. I te auala tenā e mafai ei o iloa ne koe a te auala ke gasolo atu ki mua i te papatisoga.
● Kafai ko papatiso ou taugasoa, ko tena uiga, ko toka foki koe mō te papatisoga.
‵Se. A te fakaikuga ke papatiso, e ‵tau eiloa o vau mai i tou loto fiafia. (Salamo 110:3) E ‵tau fua o papatiso koe māfai ko iloa ‵lei ne koe a mea e aofia i te fai mo fai se Molimau a Ieova kae ko mautinoa foki me ko toka ‵lei koe mō te tiute tenei.—Failauga 5:4, 5.
Se Faifaiga Telā e Mafai o ‵Fuli i ei te Olaga
A te papatisoga se faifaiga telā e mafai o iku atu ki fakamanuiaga e uke. Kae e aofia foki i ei se tiute tāua—ko te ola e ‵tusa mo tau tukuatuga totino ki a Ieova.
E mata, ko pilipili koe ki te tulaga tenā? Kafai e penā loa, e maua ne koe se pogai ‵lei ke fiafia. A te mea telā e moe mai i ou mua ko te ‵toe tauliaga sili—ke tavini atu ki a Ieova mo te loto kātoa, kae ola i se auala telā e fakaasi atu ei me ne tuku tonu atu eiloa koe ki a ia.—Mataio 22:36, 37.
I TE ‵TOU SUĀ MATAUPU
Tauloto ki auala e mafai o fakatoka ne koe ou fakamoemoega ko te mea ke mafai o fakaaoga faka‵lei ne koe tou olaga.
TUSI FAITAU TĀUA
“Ke ofo atu otou foitino ke fai mo taulaga ola, e tapu kae talia ne te Atua, se taviniga tapu mai te fakaaogaga o te malosi o otou mafaufau.”—Loma 12:1.
MANATU
Fakatasi mo te fesoasoani ou mātua, ke ‵sala ki se tino i te fakapotopotoga telā e mafai o fesoasoani ki tou gasolo atu ki mua i te feitu faka-te-agaga.—Galuega 16:1-3.
E ILOA NE KOE . . .?
A te papatisoga se vaega tāua o “te fakamailoga” telā e mafai ei o maua ne koe te fakaolataga.—Esekielu 9:4-6.
AKU PALANI!
Ke gasolo atu au ki mua i te papatisoga, ka taumafai au ke lasi atu toku malamalama i akoakoga konei i te Tusi Tapu: ․․․․․
Mea e fia fesili atu ne au ki oku mātua e uiga ki te mataupu tenei ․․․․․
SE A TAU FAKA‵TAU?
● Kaia e tāua ‵ki eiloa te papatisoga?
● Se a te mea e mafai ei o fai se talavou ke papatiso fakavave a ia?
● Se a te pogai e mafai ei o fakatalave e aunoa mo te poto se talavou mai te tukuatuga mo te papatisoga?
[Ko manatu tāua]
“A te iloa atu me ko oti ne papatiso au, ne fesoasoani mai ke mafai o fai ne au a fakaikuga ‵poto kae ke se fanatu i auala kolā e mafai o maua mai i ei a ikuga ma‵sei.”—Holly
[Pokisi/Ata]
Fesili Masani e Uiga ki te Papatisoga
Se a te mea e fakauiga ki ei te papatisoga? A te ufi ki lalo i te vai kae toe fanaka e fakauiga me ko oti ne mate koe ki tou olaga mua, kae nei ko toe ola koe ke fai te loto o Ieova.
Se a te mea e fakauiga ke tuku atu tou ola ki a Ieova? E fakauiga i ei me ko se toe pule koe ki a koe eiloa kae tauto atu ke fakamuamua faeloa te loto o te Atua i lō nisi mea katoa. (Mataio 16:24) Se mea ‵lei ke fai ne koe se tukuatuga ‵malu i se ‵talo ki a Ieova mai mua o tau papatisoga.
Ne a au mea e ‵tau o fai ki tou olaga mai mua o tau papatisoga? E ‵tau o ola koe e ‵tusa mo te Muna a te Atua kae faipati atu ki nisi tino e uiga ki tou fakatuanaki. E ‵tau o ati aka ne koe se va fakataugasoa mo te Atua e auala i ‵talo kae sukesuke ki tena Muna. E ‵tau o tavini atu koe ki a Ieova ona ko te mea e filifili ne koe ke fai penā—kae e se ko te faimālō atu o nisi tino ki a koe.
E mata, e ‵tau o fia ou tausaga ke papatiso ei koe? A tausaga e se ko te ‵toe mea tāua. Kae e ‵tau o matua ‵lei koe—ke malamalama i te uiga o te tukuatuga.
Kae e a māfai ko fai atu ou mātua me e ‵tau o faka‵tali koe? Kāti e ma‵nako lāua ke tai momea aka tou atamai i te olaga Kelisiano. Ke fakatāua malosi lā pati fakatonutonu kae fakaaoga faka‵lei te taimi tenei ke fakamalosi aka tou va fakataugasoa mo Ieova.—1 Samuelu 2:26
[Pokisi]
Koga mo tusi ou manatu
E a e mafaufau koe ke papatiso?
Onoono ki tou gasolo ki mua mai te mafaufau ki fesili mo fakamatalaga mai lalo. Masaua o faitau muamua ki tusi fai‵tau kae koi tuai o tusi au tali ki lalo.
Ne a auala e fakaasi atu nei ne koe tou loto talitonu ki a Ieova?—Salamo 71:5. ․․․․․
Ne fakaaoga pefea ne koe a te malosi o tou mafaufau ke iloa ne koe a te mea tonu mai te mea ‵se?—Epelu 5:14. ․․․․․
E ‵talo fakafia sāle atu koe? ․․․․․
E pefea te manino ‵lei o mea e ‵talo atu koe ki ei, kae ne a mea e fakaasi mai i ei e uiga ki tou alofa ki a Ieova?—Salamo 17:6. ․․․․․
Fakamau ki lalo so se fakamoemoega e manako koe o kausaki atu ki ei e uiga ki au ‵talo. ․․․․․
E pefea te uke o taimi e fai ei au sukesukega ki te Tusi Tapu?—Iosua 1:8. ․․․․․
Ne a mea e aofia i au sukesukega totino? ․․․․․
Tusi ki lalo so se fakamoemoega e manako koe ke kausaki ki ei e uiga ki au sukesukega totino. ․․․․․
E mata, e magoi tau galuega talai? (Fakaakoakoga: E mata, e mafai ne koe o fakamatala atu a akoakoga faigofie i te Tusi Tapu ki nisi tino? E mata, e toe foki atu koe ki tino fia‵fia? E mata, e taumafai malosi koe ke kamata se akoga faka-te-Tusi Tapu?)
□ Ao □ Ikai
E mata, e kau atu koe ki te galuega talai māfai foki e se ‵kau atu ou mātua ki ei?—Galuega 5:42.
□ Ao □ Ikai
Tusi ki lalo so se fakamoemoega e manako koe o kausaki ki ei e uiga ki tau galuega talai.—2 Timoteo 2:15. ․․․․․
E mata, e mafai o fai mai me e kau atu faeloa koe ki fakatasiga Kelisiano io me se kau atu faeloa?—Epelu 10:25. ․․․․․
Ne a tusaga e fai ne koe i fakatasiga? ․․․․․
E mata, e kau atu koe māfai e se mafai o ‵kau atu ou mātua (māfai e ‵tau o maua ne koe a te taliaga mai i a lāua)?
□ Ao □ Ikai
E mata, e mafai o fai atu koe me e fiafia tonu koe o fai te loto o te Atua?—Salamo 40:8.
□ Ao □ Ikai
E mata, e mafai o tusi ne koe ki lalo a taimi mautinoa ne ‵teke atu ei koe ki fakamalosiga sē ‵lei mai taugasoa?—Loma 12:2. ․․․․․
Ne a au palani ke fakatumau te malosi o tou alofa ki a Ieova?—Iuta 20, 21. ․․․․․
E mata, ka tavini koe ki a Ieova faitalia me ko se fai penā ou mātua mo taugasoa?—Mataio 10:36, 37.
□ Ao □ Ikai
[Ata]
E pelā mo te fakaipoipoga, a te papatisoga se faifaiga telā e mafai o ‵fuli i ei te olaga—e se ‵tau o manatu mā‵ma ki ei