E Mata, e Mafai Eiloa o Fakamaoni i se Lalolagi sē Fakamaoni?

“E ma‵nako eiloa matou ke fakamaoni matou i mea katoa kolā e fai ne matou.”​—EPELU 13:18.

E UI eiloa e mafai o fakamalosi mai ki a tatou a ‵tou tulaga agasala, te lalolagi e ola tatou i ei, mo te Tiapolo, e mafai eiloa ne tatou o ‵teke atu olotou fakamalosiga! E pefea la? Mai te fakapilipili atu ki te Atua kae fakagalue a fakatakitakiga mai tena Muna, ko te Tusi Tapu. Ke mafaufau ki fakaakoakoga e lua.

FAKATAKITAKIGA I TE TUSI TAPU: “Ke se amio fakatasi koutou mo te lalolagi nei.”​—Loma 12:​2, Tusi Tapu i te ‵Gana Tuvalu.

Se tala tonu: A Guilherme se tagata Brazil telā e teletele ‵lei tena pisinisi. E taku tonu mai ne ia me e sē se mea faigofie ke tumau i te fakamaoni. Ne fai mai a ia, penei: “E faigofie ki te tino fai pisinisi ke fai ne ia a faifaiga sē fakamaoni, kāti ke fakataunu ei a fakamoemoega o te kamupane io me ke teletele ‵lei te kamupane i se lalolagi fakatau‵fai.” Ne toe fai mai a ia: “A te tukuatuga mo te taliaga o ‵togi fakakolekole ko fai pelā me se faifaiga masani ki tino e tokouke. Kafai koe se tino fai pisinisi telā e uke a mea tau tupe e ‵tau o saga ki ei, se mea faigata eiloa ke tumau koe i te fakamaoni.”

Ne manuia eiloa a Guilherme i te ‵teke atu ki fakamalosiga ke sē fakamaoni a ia. Ana muna: “Ke oko foki eiloa ki pisinisi kolā e talia i ei a faifaiga sē fakamaoni, e mafai eiloa o tumau se tino i te fakamaoni. E ‵tau eiloa o malosi tou tulaga i mea tau amioga. Ne fesoasoani malosi mai te Tusi Tapu ke lavea ne au a te tāua o te tumau i te fakamaoni. A te tino fakamaoni e maua ne ia se loto lagona ‵ma, se tulaga filemu i loto i a ia, mo te āva ki a ia eiloa. E mafai eiloa o fai a ia mo fakaakoakoga ‵lei ki tino i ana tafa.”

FAKATAKITAKIGA I TE TUSI TAPU: “Ka ko tino kolā e ma‵nako ke maumea latou, ko pa‵ku atu latou ki te fakaosoosoga, ka ko maleigina foki latou ne te uke o manatu va‵lea mo manako ma‵sei, kolā e ‵futi ne latou ki lalo o fakamasei kae fakamalepe valevale. Me i te manako ki tupe, ko te mafuaga tenā o mea ma‵sei katoa.”​—1 Timoteo 6:​9, 10, Tusi Tapu i te ‵Gana Tuvalu.

Se tala tonu: A André ko te pule o te kamupane telā e faka‵piki ne ia a mea kolā e puipui ei a fale. E tasi te koga telā ne ga‵lue latou i ei ko te kalapu futipolo lasi ‵ki. I te taimi e tasi, mai tua o se tafaoga lasi ne fai, ne fanatu a André ki loto i te ofisa o te kalapu o fakailoa atu te aofaki e ‵tau o ‵togi mai ne te kalapu ki tena kamupane e ‵tusa mo te lotou galuega ne fai. I te taimi tenā, ne fakalavelave malosi a te matagaluega o mea tau tupe o te kalapu i te lauga o tupe ne maua mai i tiketi kolā ne ‵togi atu. Ona ko te fakavavave ne ‵togi atu ei ne te takitaki o te matagaluega a tupe ki tino kolā ne maua mai i ei olotou mea, e aofia i ei te ‵togi o te galuega ne fai ne André.

“I toku auala ki te fale, ne iloa aka ei ne au me silia a tupe ne ‵togi mai ne te takitaki o te matagaluega,” ko pati a André. “Ne iloa ne au me ka se iloa lele ne tou tagata me ko oi ne maua ne ia a tupe silia. Kae ne iloa foki ne au me e ‵tau o ‵togi ne tou tagata ki ana tupe totino a te tupe telā ne galo! Ne fakaiku ei ne au ke toe foki atu ki konā. Ne mafai ne au o ulu atu i vasia o tino e tokouke ke toe faka‵foki atu a tupe silia. Ne poi masei te takitaki o te matagaluega. E seai aka eiloa se tino kai fakafoki mai ne ia ne tupe ki a ia.”

Ne toe fai mai a ia, penei: “Ne āva malosi mai a te takitaki o te matagaluega ona ko te faifaiga fakamaoni tenā.” Ne faka‵soko mai a André. “I te fia tausaga ko ‵teka atu, ko au tokotasi eiloa koi maua ne au se galuega i te kalapu, mai te fia o tino kolā ne fai sale ne latou olotou galuega. E loto fakafetai au me mai te fakagaluegaga o tulaga ma‵luga o te Tusi Tapu e uiga ki amioga ‵lei, ne maua ei ne au se igoa ‵lei.”

Se mea fakamalosi loto ke iloa atu me e mafai eiloa o ‵teke atu tatou ki fakamalosiga sē fakamaoni mai te fesoasoani o te Atua. Kae e se mafai eiloa o fakaseai katoatoa a pulega sē fakamaoni ne taumafaiga a tino taki tokotasi. A te fakalavelave tenei ko tō lasi telā ko se mafai ei ne tino sē ‵lei katoatoa o faka‵lei aka ne latou i a latou eiloa. E mata, e fakauiga i ei me ka sē mafai eiloa o palele atu a pulega sē fakamaoni? E fakaasi mai i te ‵toe mataupu i te fakasologa tenei a te tali fakamalosi loto mai i te Tusi Tapu.