E ILOA NE KOE?

Ne a mea faiga‵ta ne fepaki mo Helota i te ‵toe faitega o te faletapu i Ielusalema?

Muamua la, ne faite ne Solomona a te faletapu i Ielusalema i luga i se mauga kae fai foki ke faite a ‵pui fakaopoopo i te feitu ki saegala mo te feitu ki togala o te mauga ko te mea ke levolo ‵lei a te kogā koga i tafa o te faletapu. Ne manako a Helota ki se faletapu telā e gali atu i te faletapu ne faite ne Solomona, telā ne fakafou kae toe fakalasi atu ne ia te faletapu tenā.

Ne fakalasi atu ne tino ga‵lue a Helota a te koga laugatasi tenā ki te feitu ki matū o te faletapu ko te mea ke fakalauefa atu a kogā koga mai tua. I te feitu ki saute, ne fakalasi atu a te tulaga ki se 105 futu (32 m). Ke fai a te mea tenei, ne ‵tau o isi ne galuega e fai ki fatu kae faite foki se ‵pui matolu fakaopoopo. I te taimi e tasi, ne nofo loa ki te 165 futu (50 m) te maluga o te ‵pui tenei.

Ne taumafai a Helota ke mo a ma fakamasei atu ki lagonaga o te kau Isalaelu io me fakalavelave ki galuega mo te faiga o taulaga i te faletapu. Ne fai mai a te tino tusitala Isalaelu ko Josephus me ne akoakogina foki a faitaulaga Isalaelu i te faitega o mea ki fatu mo galuega faka-kamuta ko te mea ke seai se tino galue telā e seai sena taliaga e sona ulu atu ki koga tapu.

Ne mate atu a Helota kae seki palele a te galuega. I te 30 T.A., ne kātoa ei te 46 tausaga o te ‵toe faitega o te faletapu. (Ioane 2:20) Ne fakaoti te galuega ne te mokopu o Helota ko Akelipa II, i te kogaloto o te senitenali muamua T.A.

Kaia ne mafau‵fau ei a tino i Melita me i te apositolo ko Paulo se tino tatino?

Kāti ne fakamalosigina a nisi tino i Melita ne akoakoga a te lotu Eleni. Mafaufau ki mea ne ‵tupu mai tua o te kasaga o te vaka sa Paulo i Melita, e pelā mo te ‵tala ne fakamau i te tusi o Galuega. I te taimi ne tuku atu ei ne te apositolo ne lakau ki loto i te afi ke tafu te afi mo fakamafanafana a tino ne faima‵laga fakatasi atu latou, ne ū tena lima ne se gata poisini. I konā, ne fai atu a tino o te fenua: “A te tagata tenei se tino tatino, me e tiga eiloa ne sao mai a ia mai te tai, ka se ola eiloa a ia me tenei eiloa tena fakasalaga.”​—Galuega 28:4.

A te tugapati Eleni mō te “fakasalaga” ko te “di’ke.” E mafai o fakauiga a te pati tenā ki te fakamasinoga tonu. Kae i akoakoga a te kau Eleni, a Dike ko te igoa o te atua fafine o fakamasinoga. Ne fai pelā me ne tausi ne ia a faifaiga a tino kae lipoti atu a faifaiga sē fakamaoni ‵funa ki a Seu, ko te mea ke fakasala a te tino ‵se. Tela la, e ‵tusa mo te tusi e tasi, kāti ne mafau‵fau a tino i Melita penei: “E tiga eiloa ne sao atu a Paulo i te tai, ne fakamailoga eiloa a ia ke fakasala ne te atua fafine ko Dike . . . e auala i te gata ‵poisini.” Ne ‵fuli ne tino olotou mafaufau i te taimi ne lavea atu ei me ne seki mate a Paulo i ei.