E Mata, e Fakatalave ne Koe te Faka‵fonuga o Tau Pepa?

Se a te mea tenā? Ko te faka‵fonuga o te pepa ko te AMD (Advance Medical Directive) telā ne fakatoka mō tino papatiso. Ona ko te mea “e se iloa ne koutou me ne a mea ka ‵tupu ki otou olaga i te aso a taeao,” se mea tāua ke na fakaiku aka i te taimi muamua kae fakaasi atu i se tusi a togafiti fakatokita mo auala kolā ka talia ne koe i tulaga fakavave penā. (Iako. 4:14; Galu. 15:28, 29) E mafai o fesoasoani atu ki a koe, a te vitio ko te Transfusion-Alternative Health Care​—Meeting Patient Needs and Rights telā ko oti ne ‵lomi. Ke onoono ki ei, kae fakatasi mo te faiga o te ‵talo ke toe sau‵tala ki ei mai te fakaaogaga o fesili mai lalo.​—Ke masaua: Ona ko te mea e aofia i te vitio tenei a ata toe‵toe o tipitipiga kolā ne fai, se mea ‵lei ke filifili faka‵lei ne mātua me e mata, e ‵lei ke onoono fakatasi ki ei mo olotou tama‵liki io me ikai.

(1) Kaia ko ‵toe iloilo aka ei ne nisi tokita mo nisi tagata ‵poto i mea tau fa‵kaimasaki a te fakaaogaga o te toto? (2) Ke fakamatala mai a tipitipiga ‵lasi kae faiga‵ta e tolu kolā ne fai e aunoa mo te fakaaogaga o te toto. (3) E tokofia a tokita kese‵kese mo tokita tipitipi i te lalolagi kātoa ne fakaasi mai te lotou loto fia‵fia o fesoasoani ki tino ma‵saki e aunoa mo te fakaaogaga o te toto? Kaia e fia‵fia ei latou ke fai penā? (4) Ne a mea ‵fou e uiga ki te fakaaogaga o te toto ne fatoa iloa aka ona ko sukesukega ki mea tau fa‵kaimasaki kolā ne fai? (5) Ne a masaki fakama‵taku e maua māfai e fakaaoga te toto? (6) Ne a fakaikuga ne fai ne tokita e tokouke e uiga ki nisi vailakau kolā e mafai o fakaaoga i tafa o te toto? (7) Se a te mea e fakamāfua aka ne ia te oge toto? E pefea te lasi o tena fakamasei ki tino? Ne a fesoasoani e mafai o fai ki se tino telā e oge toto? (8) E mafai pefea o fai ke uke a sela ‵kula i te foitino o se tino masaki? (9) Ne a togafiti e fakaaoga nei ke fakamu‵tana te toto telā e fano i te taimi e fai ei se ‵tipiga? (10) E mata, e mafai o fakaaoga a nisi togafiti i tafa o te toto ki tama‵liki io me ko tino kolā ko oko atu ki se tulaga fakamataku ‵ki? (11) Se a te ‵toe fakatakitakiga tāua kae ‵lei mō togafiti e uiga ki mea tau fa‵kaimasaki? (12) Kaia e tāua ei mō Kelisiano ke na fai olotou filifiliga ki nisi togafiti kolā e se fakaaoga i ei te toto? Ka fai pefea ne tatou a te mea tenā?

A te taliaga o nisi togafiti kolā e matea atu i te vitio se ikuga loa e fai ne te tino i a ia eiloa e ‵tusa mo tena loto lagona telā ko oti ne akoakogina ki te Tusi Tapu. E mata, ko oti ne fai ne koe ne fakaikuga mautinoa ki vaegā togafiti fakatokita mo faifaiga kolā ka talia ke fakaaoga ne koe mo au tama‵liki, kae ka oti ko faka‵fonu ei a te pepa ko te AMD? Ke maua se fakamatalaga katoatoa e uiga ki mea konei, ke toe onoono faka‵lei ki te mataupu e  7 o te tusi tenei ko te “God’s Love” mo fakamatalaga i loto i ei. Ona ko te mea e uke a togafiti mo fakatokaga kolā e fakaasi mai i te vitio e se maua i konei, se mea tāua ke fakatoka koe o fakamatala faka‵lei atu kae ke toka o ‵pulu ne koe tau fakaikuga e uiga ki te toto. Kae ke fakamautinoa faka‵lei ne koe me ne tusi katoa ne koe au filifiliga kolā ne fai ki loto i tau pepa ko te AMD. E ‵tau o iloa ‵lei ne tino kolā ne tusi ne koe olotou igoa i te pepa fakatasi mo ou kāiga kolā e se ne Molimau a tau fakaikuga telā ko oti ne fai.

[Fakamatalaga o te Ata i te itulau e 3]

• E mata, ko oti ne fakaiku aka ne koe me ne a togafiti fakatokita mo fakatakitakiga kolā ka talia katoatoa ne koe mo au tama‵liki?

• E mata, e fanofano mo koe a tau pepa tenei ko te AMD ona ko fakalavelave ‵tupu fakafuasei?